ក្រុង​សែនមនោរម្យ៖ ខ្សែ​គោ ខ្សែលួស ខ្សែកាប ត្រូវបាន​ដាក់លក់​គ្រប់​ទីកន្លែង​ក្នុងតម្លៃថោក។ សម្ភារទាំងនេះ​ត្រូវបាន​កែច្នៃ​ជា​អង្គប់ និង​អន្ទាក់​សម្រាប់​ប្រមាញ់​សត្វព្រៃ ក្នុង​កម្រិត​វិនាសកម្ម។

លោក សេង ទៀក នាយក​អង្គការ WWF ប្រចាំ​ប្រទេស​កម្ពុជា បាន​និយាយថា៖ «អន្ទាក់​ជា​ឃាតករ​លាក់មុខ និង​សម្លាប់​សត្វព្រៃ​ដោយ​ស្ងាត់ស្ងៀម​បំផុត ថ្វីដ្បិតតែ​អន្ទាក់​មានតម្លៃ​ថោក ងាយស្រួល​រក និង​ងាយស្រួល​ដំឡើង តែ​វា​អាច​សម្លាប់សត្វ​ដ៏​មាន​ប្រសិទ្ធភាព​បំផុត។

ថ្លែង​ក្នុង​កិច្ចប្រជុំ​ផ្សព្វផ្សាយ​របាយការណ៍​ស្ថានភាព​សត្វ​ក្រចកជើង​ចម្ពាម​នៅ​តំបន់​ព្រៃ​ទេសភាព​ខ្ពង់រាប​ភាគ​ខាងកើត​ក្នុង​ខេត្ដ​មណ្ឌលគិរី លោកបាន​បន្ដថា៖ «អន្ទាក់​ធ្មេញ​ដែក និង​អន្ទាក់​ឆក់​អាច​សម្លាប់​សត្វព្រៃ​ផង ក៏មាន​លទ្ធភាព​អាច​សម្លាប់​មនុស្ស​ផងដែរ។ ដូច្នេះ អន្ទាក់​ធ្វើឱ្យ​ព្រៃ​ធម្មជាតិ​គ្មាន​សត្វព្រៃ»។

លោក សេង ទៀក និយាយថា ក្នុង​ទសវត្សរ៍​ទី៥០ ប្រទេស​កម្ពុជា ​ត្រូវបាន​អ្នកវិទ្យាសាស្ដ្រ និង​អ្នកស្រាវជ្រាវ​ពិពណ៌នា​ថា ជា​ឋានសួគ៌​របស់​សត្វព្រៃ​ក្នុង​ទ្វីបអាស៊ី និង​ជា​តំបន់​មួយ​ដែលមាន​សត្វព្រៃ​ច្រើនជាងគេ​ក្នុង​ពិភពលោក បន្ទាប់ពី​ទ្វីបអាហ្វ្រិក។

លោក​អះអាងថា៖ «ការលើកឡើង​នេះ ក៏មាន​ភ័ស្ដុតាង​បញ្ជាក់​ក្នុង​ភាពយន្ដ​ឯកសារ​ស្ដីពី​ការស្រាវជ្រាវ​សត្វ​គោព្រៃ ទន្សោង ខ្ទីង ក្របីព្រៃ​នៅ​កម្ពុជា​ដោយ​អ្នកវិទ្យាសាស្ដ្រ​ជនជាតិ​អាមេរិក​ក្នុង​ឆ្នាំ ១៩៥១»។

Content image – Phnom Penh Post

អន្ទាក់​មានតម្លៃ​ថោក តែ​នាំ​មហន្តរាយ​ច្រើន​អនេក។ រូបថត យូ​សុះ អាប់​ឌុល​រ៉ា​ស់​ហ៊ីមថ្មីៗនេះ អង្គការ WWF ក៏​បានចេញ​របាយការណ៍​មួយ​ស្ដីពី​វិបត្ដិ​អន្ទាក់​តំបន់​អាស៊ីអាគ្នេយ៍ និង​បាន​ប៉ាន់ប្រមាណ​ថា អន្ទាក់​ប្រមាណ ១២,៣ លាន​អន្ទាក់​ កំពុង​គំរាមកំហែង​ដល់​ការរស់នៅ​របស់​សត្វព្រៃ។

លោក​បានឱ្យដឹងថា៖ «តំបន់​ការពារ​ធម្មជាតិ​ចំនួន ១១ នៅក្នុង​ប្រទេស​កម្ពុជា ឡាវ វៀតណាម ម៉ាឡេស៊ី និង​ឥណ្ឌូនេស៊ី បាន​ប្រមូល​អន្ទាក់​សរុប​ជាង ៣៧ ម៉ឺន​អន្ទាក់ ​ក្នុង​រយៈពេល ៩ ឆ្នាំ​ ពីឆ្នាំ ២០១០ ដល់​ឆ្នាំ ២០១៩»។

លោក នេត្រ ភក្ត្រា រដ្ឋលេខាធិការ និង​អ្នកនាំពាក្យ​ក្រសួងបរិស្ថានបានឱ្យដឹងថា៖ «ដោយឡែកនៅ​កម្ពុជា យើង​អត់​ដឹងថា មាន​អន្ទាក់​ចំនួន​ប៉ុន្មាន​នៅក្នុង​តំបន់ការពារធម្មជាតិ​របស់​យើង​នោះទេ។ ប៉ុន្ដែ​ក្នុងមួយឆ្នាំៗ យ៉ាងហោចណាស់ ប្រមាណ ៥ ម៉ឺន​អន្ទាក់ ត្រូវបាន​ដោះចេញ​ពី​តំបន់ការពារធម្មជាតិ​របស់​យើង»។

លោក​បន្ដថា រូបភាព​តាម​កាមេរ៉ា​តាមដានមើលឃើញថា សត្វព្រៃ​មួយចំនួន​មាន​ពិការភាព និង​សត្វ​ខ្លះទៀត ជើង​ជាប់អន្ទាក់។

អ្នកនាំពាក្យ​រូបនេះ​បាន​ថ្លែង​ក្នុង​ដំណើរ​ដឹកនាំ​ក្រុម​អ្នកសារព័ត៌មាន​ទៅកាន់​តំបន់​ព្រៃ​ទេសភាព​ខ្ពង់រាប​ភាគ​ខាងកើត កាលពី​ពាក់កណ្ដាល​ខែមករា​ថា៖ «ចំពោះ​អន្ទាក់ យើង​មិនដឹងថា ពេលណា​វា​ខូច​នោះទេ។ អ៊ីចឹង វា​លាក់​មុខ រង់ចាំតែ​សត្វ​ដើរមក​ជាប់​តែម្ដង។ ជួនកាល ម្ចាស់​អន្ទាក់ក៏​ភ្លេចខ្លួន​ថា ខ្លួនឯង​បានដាក់​នៅ​កន្លែង​ណា​ថែមទៀត»។

ជាម​ន្ដ្រី​ឧ​ទ្យា​នុ​រក្ស​នៅ​ដែនជម្រកសត្វព្រៃ​ភ្នំ​ព្រេច ដែលមាន​បទពិសោធ​ការពារ​សម្បត្ដិ​ធម្មជាតិ និង​ដោះស្រាយ​បញ្ហា​អន្ទាក់​ជាង ១០ ឆ្នាំ លោក មិន ធឿន បាន​អះអាង អន្ទាក់​ស្ថិតនៅ​ពាសពេញ​ព្រៃ ដែល​រង់ចាំ​ប្រហារ​សត្វ​គ្រប់ពេលវេលា លើសពី​ការ​បរបាញ់​អាចមាន​ខុស និង​មាន​ត្រូវ។

មន្ដ្រី​ឧ​ទ្យា​នុ​រក្សដែល​វិ​វត្ដ​ពី​ព្រានប្រមាញ់​សត្វព្រៃបាន​និយាយថា៖ «ពីមុន មានតែ​ការ​បរបាញ់​ដោយ​ប្រើ​កាំភ្លើង និង​ការ​ប្រហារ​ត្រូវបាន​ធ្វើឡើង​តែ​លើស​ត្វ​ជា​ជម្រើស​ប៉ុណ្ណោះ តែ​បច្ចុប្បន្ន មាន​អន្ទាក់ ដែល​រង់ចាំ​ប្រហារ​សត្វ​គ្រប់​ទាំងអស់»។

Content image – Phnom Penh Post

អ្នកជំនាញ​អង្គការ WWF ពិនិត្យមើល​ឧបករណ៍​ឆក់។ រូបថត យូ​សុះ អាប់​ឌុល​រ៉ា​ស់​ហ៊ីម ជាមួយ​មនោសញ្ចេតនារ​បស់​មហាជន សត្វ​ទន្សោង ១ ក្បាល​ ដែល​ត្រូវបាន​មើលឃើញ​សម្រក់​ទឹកភ្នែក ពេល​ជាប់អន្ទាក់​ព្រាន​ជាច្រើន​ថ្ងៃ មុនពេល​ត្រូវបាន​សង្គ្រោះ​នៅក្នុង​ដែនជម្រកសត្វព្រៃ សង្ឃ​រុក្ខ​វ័ន ខេត្ដ​ឧត្ដរ​មានជ័យ។ ជា​អ​កុល​ស ទន្សោង​អភ័ព្វ ១ ក្បាល​នេះ បាន​ស្លាប់​ព្រោះតែ​សុខភាព​ចុះខ្សោយ និង​អាការ​របួស​ធ្ងន់ធ្ងរ។

លោក នេត្រ ភក្ដ្រា ក៏បាន​លើកឡើង​អំពី​សត្វ​ទន្សោង ដែល​បាន​ស្លាប់​នៅ​ដែនជម្រកសត្វព្រៃ​សង្ឃ​រុក្ខ​វ័ន ខេត្ដ​ឧត្ដរមានជ័យ ដោយសារ​ជាប់អន្ទាក់​នោះ​ផងដែរ​ថា វា​បាន​ជាប់អន្ទាក់​ប្រមាណ ១០ ថ្ងៃ។

លោក​និយាយថា៖ «កត្ដា​នាំឱ្យ​ទន្សោង​នោះ​ស្លាប់ ដោយសារ ទី១ វា​អត់​ចំណី ទី២ វា​អត់​ទឹក ដែល​ធ្វើឱ្យ​សត្វ​ខ្សោយ។ វា​រើបម្រះ​ខ្លាំង ខណៈ​ជើង​ជាប់អន្ទាក់ ហើយ​ពេល​មន្ដ្រី​យើង​សង្គ្រោះ​វា​មក វា​បាន​ស្លាប់បាត់​បង់ជីវិត»។

លោក នេត្រ ភក្ត្រា អះអាងថា បញ្ហា​គ្រោះថ្នាក់​ជាង​គឺ អន្ទាក់​ខ្សែឆក់។ វា​អាចមាន​ប្រវែង​រហូតដល់​រាប់រយ​ម៉ែត្រ​ក្នុង ១ ខ្សែ។ ព្រាន​រាយ​ដាក់​ខ្សែលួស​នៅតាម​ព្រៃ ដោយ​ភ្ជាប់​ជាមួយ​ក្បាល​អាគុយ​អគ្គិសនី។ ព្រាន​នៅ​ពួន​ចាំ​ចុច​កុងតាក់​អគ្គិសនី​ពេល​ឃើញ​សត្វព្រៃ​ដើរកាត់​លួស។ វា​អាចធ្វើ​ឱ្យស្លាប់ ឬ​សន្លប់។

ដោយ​បច្ច័យ​នេះ ពេលធ្វើ​ដំណើរ​ក្នុងព្រៃ មន្ដ្រី​ឧ​ទ្យា​នុ​រក្ស និង​សត្វ​នុ​រក្ស មានការ​ប្រុងប្រយ័ត្ន​ខ្ពស់​ចំពោះ​គ្រោះថ្នាក់​ដោយសារ​អន្ទាក់ ជាពិសេសអន្ទាក់​ឆក់។

រដ្ឋលេខាធិការ​ក្រសួងបរិស្ថាន​រូបនេះ បាន​លើកឡើងថា ស្ថានភាព ១០ ឆ្នាំ​ចុង​ក្រោយនេះ ទន្សោង​ដែលជា​សត្វព្រៃ​ដ៏​កម្រ​ក្នុង​ពិភពលោក​មាន​ចំនួន​ធ្លាក់ចុះ​រហូតដល់ ៧២ ភាគរយ​នៅ​កម្ពុជា ដែល​នៅ​សេសសល់​ត្រឹម​ប្រមាណ ៨៥៦ ក្បាល ​នៅ​ដែនជម្រកសត្វព្រៃ​ទាំង។

Content image – Phnom Penh Post

សកម្មភាព​ពិនិត្យមើល​លទ្ធផល​ការងារ​អភិរក្ស​សត្វ។ រូបថត យូ​សុះ អាប់​ឌុល​រ៉ា​ស់​ហ៊ីម ចន្លោះ​ឆ្នាំ ២០១០ និង​ឆ្នាំ ២០២០ សត្វ​ឈ្លូស ជា​ប្រភេទ​សត្វ​កម្រ​មួយ​ដែរ ធ្លាក់ចុះ​ប្រមាណ ៥២ ភាគរយ ត្រឹម​ចំនួន ៣ ៣៥០ ក្បាល ខណៈ​ជ្រូកព្រៃ​ធ្លាក់ចុះ ១៨ ភាគរយ​នូវ​ចំនួន ៤ ០១៧ ក្បាល។

លោក​បាន​បញ្ជាក់ថា៖ «វា​ជា​និន្នាការ​នៃ​ការធ្លាក់ចុះ វា​មកពី​កត្ដា​ពិភពលោក ដែល​បណ្ដាលមកពី​ការបាត់បង់​ជម្រក ជាពិសេសអន្ទាក់ជា​ឃាតករ​លាក់​មុខ ដែល​ប្រហារ​សត្វ​គ្រប់​ប្រភេទ»។

លោក​លើកឡើងថា៖ «តាម​ការសិក្សា នៅក្នុង​ឆ្នាំ ២០១០ ចំនួន​សត្វព្រៃ​មាន​ច្រើន ហើយ​ចំនួន​អន្ទាក់​មាន​តិចតួច។ ប៉ុន្ដែ​ក្រោយមក ចំនួន​សត្វ​មានការ​ថយចុះ ខណៈ​ចំនួន​អន្ទាក់​មានការ​កើនឡើង។ អន្ទាក់​ជា​បញ្ហា​ប្រឈម​សម្រាប់​ជីវចម្រុះ ជា​ពិ​សសសម្រាប់​សត្វព្រៃ»។

ជាមួយ​កិច្ចខិតខំ​ប្រឹងប្រែង​របស់​មន្ដ្រី​ឧ​ទ្យា​នុ​រក្ស អង្គការ​ដៃគូ ប្រជា​សហគមន៍ ដែល​បាន​ចូលធ្វើ​សត្វ​នុ​រក្ស​នេះ តំបន់​ការពារ​ធម្មជាតិ​មួយចំនួន​មានការ​កើនឡើង​នូវ​ចំនួន​សត្វព្រៃដូចជា ទោច​ថ្ពាល់​លឿង ស្វា​កន្ទុយ​ស ក្ងោក និង​ជ្រូកព្រៃ​នៅ​ដែនជម្រកសត្វព្រៃ​កែវ​សីមា។

លោក នេត្រ ភក្ដ្រា បាន​និយាយដៃ​កាន់​សៀវភៅ​ស្ដីពី​ការស្រាវជ្រាវ​ស្ថានភាព​សត្វ​ក្រចកជើង​ចម្ពាម រយៈពេល ១០ ឆ្នាំ​ថា៖ «ឆ្នាំ ២០២០ អន្ទាក់​ជិត ៥ ម៉ឺន ត្រូវបាន​ដោះចេញ​ពី​ដែនជម្រកសត្វព្រៃ​នៅ​ទូទាំងប្រទេស​កម្ពុជា​ក្នុងចំណោម​តំបន់​ការពារ ៦៨ កន្លែង។ ដោយឡែក ក្នុង​ខេត្ដ​មណ្ឌលគិរីអន្ទាក់​ជិត ១ ម៉ឺន ត្រូវបាន​ដោះចេញ​ពី​តំបន់ការពារធម្មជាតិ​ក្នុង​ខេត្ដ​មណ្ឌលគិរី ដែល​អាចជួយ​សង្គ្រោះ​សត្វព្រៃ​មួយចំនួន»។

លោក សេង ទៀក ក៏បាន​ទទួលស្គាល់​នូវ​លទ្ធផល​ការងារ​របស់​ក្រុមមន្ដ្រី​ឧ​ទ្យា​នុ​រក្ស និង​ដៃគូ​នូវ​កិច្ចខិតខំ​ប្រឹងប្រែង​ទប់ស្កាត់​បទល្មើស​នានា​ក្នុង​ដែនជម្រកសត្វព្រៃ និង​តំបន់ការពារធម្មជាតិ។

លោក​និយាយថា៖ «ឧ​ទ្យា​នុ​រក្ស​បំពេញការងារ​យ៉ាង​មាន​ប្រសិទ្ធភាព​បំផុត។ ចន្លោះ​ឆ្នាំ ២០១៣ ដល់​ឆ្នាំ ២០១៩ មន្ដ្រី​ឧ​ទ្យា​នុ​រក្ស បាន​ប្រមូល​អន្ទាក់​សរុប​ជាង ២ ម៉ឺន​អន្ទាក់ អន្ទាក់​ឆក់​ជាង ៥ ពាន់។ ដោយឡែក ក្នុង​ឆ្នាំ ២០២០ អន្ទាក់ ៤ ៧៧២ អន្ទាក់ ត្រូវបាន​ប្រមូល និង​សត្វព្រៃ​រស់​ចំនួន ១០៩ ក្បាល ត្រូវបាន​ដោះលែង រួមទាំង​ជនសង្ស័យ ៤២ នាក់ ​ត្រូវបាន​ចាប់ខ្លួន»។

Content image – Phnom Penh Post

លោក នេត្រ ភក្ត្រា និង លោក សេង ទៀក (ឆ្វេង​ទី២)។ រូបថត យូ​សុះ អាប់​ឌុល​រ៉ា​ស់​ហ៊ីមមន្ដ្រី​ឧ​ទ្យា​នុ​រក្ស​របស់​ក្រសួង​បរិស្ថាន​ជាង ១ ២០០ នាក់ ដែល​គ្រប់គ្រង​តំបន់​អភិរក្ស​ព្រៃ​មាន​ទំហំ​ជាង ៧,៣ លាន​ហិកតា ដែល​ស្មើ ៤១ ភាគរយ​នៃ​ផ្ទៃដី​ប្រទេស​កម្ពុជា។

ដោយឡែក ដែនជម្រកសត្វព្រៃ​ស្រែ​ពក និង​ភ្នំ​ព្រេច មាន​មន្ដ្រី​ឧ​ទ្យា​នុរក្ស ៥១ នាក់ និង​សត្វ​នុ​រក្ស ៤៦ នាក់ និង​ក្រុម​ល្បាត​សហគមន៍ ៥៨៨ នាក់ ​លើ​ផ្ទៃដី​ជិត ៦ ពាន់​គីឡូ​ម៉ែត្រការ៉េ ក្នុង​ខេត្ដ​មណ្ឌលគិរី។

ការ​រ៉ាប់រង​ល្បាត​លើ​វិសាលភាព​ផ្ទៃដី​ដ៏​ធំធេង​ទាំងនេះ មន្ដ្រី​ឧ​ទ្យា​នុ​រក្ស​ចាំបាច់​ត្រូវ​ទទួលបាន​ការបណ្ដុះបណ្ដាល​ជំនាញ​លើ​ភារកិច្ច​របស់ខ្លួន។

លោក សេង ទៀក លើក​ហេតុផល​ថា៖ «បើសិន​មានការ​ជួយ​សត្វ​ជាប់អន្ទាក់ យើង​មិនអាច​ចេះតែ​ចូល​បាន​នោះទេ ជាពិសេស​សត្វធំៗ ពីព្រោះ​ពួកវា​ជា​សត្វព្រៃ ដែល​ប្រយុទ្ធ​ការពារ​ខ្លួន​វា​ជានិច្ច»។

ក្រុម​សង្គ្រោះ​តម្រូវឱ្យមាន​ថ្នាំ​សន្លប់​សម្រាប់​បាញ់​សត្វ​ជាមុន រួច​ការ​ដោះ​អន្ទាក់ និង​ថែទាំ​នៅ​ទីកន្លែង ឬ​យកទៅ​ថែទាំ​នៅ​ទីស្នាក់ការ​មុនពេល​លែង។

លោក នេត្រ ភក្ដ្រា បាន​លើកឡើងថា៖ «មន្ដ្រី​ឧ​ទ្យា​នុ​រក្ស​របស់​យើង​ទទួល​ការបណ្ដុះបណ្ដាល​លើ​ចំណេះដឹង​ផ្នែក​ច្បាប់​ដែល​ពាក់ព័ន្ធ។ ពួកគេ​ក៏ត្រូវ​យល់​អំពី​ការសង្គ្រោះ​បឋម​ថា​តើ​ពួកគេ​ជួយ​សត្វ​តាមរបៀប​មេ​៉​ច បើ​សត្វព្រៃ​ជួប​បញ្ហា ពីព្រោះ​មន្ដ្រី​របស់​យើង​មិន​ត្រឹមតែ​ការពារ​ព្រៃ​ប៉ុណ្ណោះ​ទេ ប៉ុន្ដែ​ថែមទាំង​ជួយសង្គ្រោះ​សត្វ​ជាប់អន្ទាក់​ថែមទៀត»។

លោក​បន្ថែមថា៖ «យើង​ត្រូវមាន​ជំនាញ​បន្ថែម និង​សម្ភារ​សង្គ្រោះ​បន្ថែម ដើម្បី​ក្រុមការងារ​ដែល​ចុះ​ល្បាត​ជាមួយគ្នា ក្នុងករណី​ជួប​ជាមួយ​សត្វ​ជាប់អន្ទាក់ យើង​អាចជួយ​ទាន់ពេលវេលា»។

ជាមួយនឹង​កង្វល់​ពី​ហានិភ័យ​នៃ​ការវិនាស​សត្វព្រៃ និង​ក្ដីសង្ឃឹម​ក្នុងការ​ស្ដារ​ចំនួន​សត្វព្រៃ​ក្នុង​ដែន​ជម្រក​នានា អ្នកនាំពាក្យ​ក្រសួងបរិស្ថាន​រូបនេះ បាន​អំពាវនាវ​ដល់​ប្រជាពលរដ្ឋ​កម្ពុជា​ទាំងអស់ បញ្ឈប់​ការទទួល​ទាន​សត្វ​សាច់​ព្រៃ ហើយ​និយាយថា ទេ ចំពោះ​សាច់​សត្វព្រៃ ដើម្បី​បញ្ឈប់ការ​បរបាញ់​សត្វ​ដោយ​ខុសច្បាប់។

លោក​បាន​បញ្ជាក់ថា៖ «យើង​ក៏​សុំ​អំពាវនាវ​ដល់​អាជ្ញាធរ​គ្រប់​ជាន់ថ្នាក់ រួមទាំង​ខេត្ដ​ស្ទឹងត្រែង រតនគិរី ក្រចេះ និង​មណ្ឌលគិរី ចូរ​សហការ​ជាមួយគ្នា​ក្នុងការ​បង្ក្រាប​ការជួញដូរ​សត្វព្រៃ និង​ការលក់​សាច់​ព្រៃ​ខុសច្បាប់​ក្នុង​តំបន់​របស់ខ្លួន»៕

ប្រភពភ្នំពេញ ប៉ុស្តិ៍

ព័ត៌មានបន្ថែម

ឯកឧត្តម សាយ សំអាល់ រដ្ឋមន្រ្តី ក្រសួងបរិស្ថាន អញ្ជើញជាអធិបតីក្នុងពិធីប្រគល់ជ័យលាភីសាលាមេត្រីបរិស្ថានថ្នាក់ជាតិលើកទី៣ ឆ្នាំ២០២១ និងពិធីសម្ពោធសួនជីវចម្រុះ«សួនព្រឹទ្ធាចារ្យជុំហ៊ល» និងសួនអំណាន«ព្រឹទ្ធាចារ្យលឹមណៃ»
ថ្ងៃ សៅរ៍, 18 កញ្ញា, 2021 ឯកឧត្តម សាយ សំអាល់ រដ្ឋមន្រ្តី ក្រសួងបរិស្ថាន អញ្ជើញជាអធិបតីក្នុងពិធីប្រគល់ជ័យលាភីសាលាមេត្រីបរិស្ថានថ្នាក់ជាតិលើកទី៣ ឆ្នាំ២០២១ និងពិធីសម្ពោធសួនជីវចម្រុះ«សួនព្រឹទ្ធាចារ្យជុំហ៊ល» និងសួនអំណាន«ព្រឹទ្ធាចារ្យលឹមណៃ»
ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន បានជួបពិភាក្សាជាមួយឯកឧត្តម Pablo Kang ឯកអគ្គរដ្ឋទូតអូស្រ្តាលី ប្រចាំនៅកម្ពុជា
ថ្ងៃ ពុធ, 15 កញ្ញា, 2021 ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន បានជួបពិភាក្សាជាមួយឯកឧត្តម Pablo Kang ឯកអគ្គរដ្ឋទូតអូស្រ្តាលី ប្រចាំនៅកម្ពុជា
ឯកឧត្តម ផៃ ប៊ុនឈឿន រដ្ឋលេខាធិការប្រចាំការក្រសួងបរិស្ថាន បានអញ្ជើញជាអធិបតីភាពប្រគល់រថយន្តសង្គ្រោះបន្ទាន់ ចំនួន ០១គ្រឿង ដែលជាអំណោយរបស់អង្គការ The Society for Promotion of Japanese Diplomacy
ថ្ងៃ ពុធ, 15 កញ្ញា, 2021 ឯកឧត្តម ផៃ ប៊ុនឈឿន រដ្ឋលេខាធិការប្រចាំការក្រសួងបរិស្ថាន បានអញ្ជើញជាអធិបតីភាពប្រគល់រថយន្តសង្គ្រោះបន្ទាន់ ចំនួន ០១គ្រឿង ដែលជាអំណោយរបស់អង្គការ The Society for Promotion of Japanese Diplomacy