ខេត្តត្បូងឃ្មុំ ៖ នាព្រឹកថ្ងៃចន្ទ ៥កើត ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៨ ខែមករា ឆ្នាំ២០២១ ឯកឧត្តម ទិន ពន្លក រដ្ឋលេខាធិការក្រសួងបរិស្ថាន តំណាងដ៏ខ្ពង់ខ្ពស់ ឯកឧត្តម សាយ សំអាល់ ប្រធានក្រុមប្រឹក្សាជាតិអភិវឌ្ឍន៍ដោយចីរភាព និងជារដ្ឋមន្រ្តីក្រសួងបរិស្ថាន បានអញ្ជើញចូលរួមជាអធិបតីសម្ពោធស្ថានីយផលិតទឹកស្អាតសហគមន៍មួយកន្លែងស្ថិតនៅក្នុងភូមិយាកត្បូង ឃុំដំរិល ស្រុកអូររាំងឪ ខេត្តត្បូងឃ្មុំ ដោយមានការចូលរួមពីថ្នាក់ដឹកនាំក្រសួងបរិស្ថាន តំណាងគណៈអភិបាលខេត្តត្បូងឃ្មុំ តំណាងដៃគូអភិវឌ្ឍន៍ អាជ្ញាធរមូលដ្ឋាន តំណាងមន្ទីរពាក់ព័ន្ធ ព្រះសង្ឃ ប្រជាពលរដ្ឋ លោកគ្រូ អ្នកគ្រូ និងសិស្សានុសិស្សមួយចំនួន។

លោក Nick Beresford នាយកកម្មវិធីអភិវឌ្ឍន៍សហប្រជាជាតិ (UNDP) ប្រចាំប្រទេសកម្ពុជា បានលើកឡើងថាការប្រើប្រាស់ទឹកស្អាតពិតជាមានសារសំខាន់ក្នុងបរិបទនៃការរីករាលដាលនៃជំងឺកូវីដ-១៩ ហើយការទទួលបានទឹកស្អាតប្រើប្រាស់នេះអាចលើកកម្ពស់ភាពធន់នឹងការប្រែប្រួលអាកាសធាតុតាមរយៈការប្រើប្រាស់ទឹកដោយសន្សំសំចៃ និងមានសុវត្ថិភាព ដល់សហគមន៍មូលដ្ឋាន និងសាលារៀន។ លោក Nick Beresford ថ្លែងអំណរគុណដល់ក្រសួងបរិស្ថាន កម្មវិធីសម្ព័ន្ធភាពប្រែប្រួលអាកាសធាតុកម្ពុជាដំណាក់កាលទី៣ និងដៃគូនានា ដែលរៀបចំឱ្យគម្រោងទឹកស្អាតនេះលេចជារូបរាងឡើង។

ឯកឧត្តម ចេង ប៊ុណ្ណារ៉ា អភិបាលរង នៃគណៈអភិបាលខេត្តត្បូងឃ្មុំ បានថ្លែងថា ការទទួលបានទឹកស្អាត និងមានសុវត្ថិភាពសម្រាប់ប្រើប្រាស់ និងបរិភោគពិតជាមានសារសំខាន់ណាស់ ដោយសារបងប្អូនប្រជាពលរដ្ឋនៅតាមតំបន់មួយចំនួនក្នុងខេត្តនេះពុំទាន់ទទួលបានទឹកស្អាតសម្រាប់បរិភោគនៅឡើយ។ ការទទួលបានទឹកស្អាត និងសុវត្ថិភាពសម្រាប់បរិភោគ និងប្រើប្រាស់ នឹងជួយលើកកម្ពស់សុខភាព និងសុខមាលភាពគ្រួសារ តាមរយៈការកាត់បន្ថយហានិភ័យពីជំងឺឆ្លងផ្សេងៗ។

ក្នុងឱកាសនោះ ឯកឧត្តម ទិន ពន្លក បានមានប្រសាសន៍ថា ការទទួលបានការផ្គត់ផ្គង់ទឹកដែលមានសុវត្ថិភាព គឺមានសារសំខាន់ណាស់សម្រាប់ប្រជាពលរដ្ឋរបស់យើង ក្នុងការធានានូវអនាម័យ និងសុខភាពល្អ ជាពិសេសនៅក្នុងបរិបទដែលប្រទេសយើង ក៏ដូចជាពិភពលោកទាំងមូល កំពុងតែប្រឈមនឹងការគំរាមកំហែងនៃជំងឺកូវីដ-១៩។ ជាពិសេស ប្រជាពលរដ្ឋអាចទទួលបាននូវទឹកស្អាតមានសុវត្ថិភាពក្នុងតម្លៃដែលទាបជាងទីផ្សារ ដែលអាចរួមចំណែក ការពារពីជំងឺផ្សេងៗ និងថែទាំសុខភាពរបស់ប្រជាពលរដ្ឋយើង ព្រមទាំងមានការកាត់បន្ថយការចំណាយទៅលើការព្យាបាលផងដែរ។ រាជរដ្ឋាភិបាលកម្ពុជាអាណត្តិទី៥នេះ មានមហិច្ឆិតាធ្វើយ៉ាងណាឱ្យ៩០% នៃប្រជាពលរដ្ឋនៅទូទាំងប្រទេសអាចទទួលបានការផ្គត់ផ្គង់ទឹកមូលដ្ឋាននៅតាមតំបន់ជនបទ និង ៣៣%ទៀតអាចទទួលបានការផ្គត់ផ្គង់ទឹកដែលប្រកបដោយសុវត្ថិភាពត្រឹមឆ្នាំ២០២៣។ ឯកឧត្តម បានបន្ថែមទៀតថា ការគិតគូរអំពីសុខភាព សុខុមាលភាពគឺជាកត្តាសំខាន់សម្រាប់ប្រជាពលរដ្ឋ ហើយការថែទាំសុខភាព និងការអប់រំជាកត្តាចំបងដែលប្រជាពលរដ្ឋ ជាពិសេសអាណាព្យាបាលត្រូវគិតគូរ និងដើម្បីការពារខ្លួនពីការឆ្លងរីករាលដាលនៃជំងឺកូវីដ-១៩។ ឯកឧត្តមក៏បានលើកទឹកចិត្តឱ្យសិស្សានុសិស្សខំប្រឹងប្រែងសិក្សារៀនសូត្រដោយអនុវត្តតាមគន្លងថ្មីក្នុងបរិបទនៃការឆ្លងរីករាលដាលនៃជំងឺកូវីដ-១៩។ ឯកឧត្តមបានសង្កត់ធ្ងន់ថា មានតែការសិក្សាទេដែលអាចផ្លាស់ប្តូរជីវភាពនិងជីវិតរស់នៅរបស់យើងទាំងអស់គ្នា។

គម្រោងស្ថានីយទឹកស្អាតនេះ ត្រូវបានផ្តួចផ្តើមឡើងដោយក្រុមប្រឹក្សាជាតិអភិវឌ្ឍន៍ដោយចីរភាព និងក្រសួងបរិស្ថាន ក្រោមគម្រោងជំនួយឥតសំណងរបស់កម្មវិធីសម្ព័ន្ធភាពប្រែប្រួលអាកាសធាតុកម្ពុជាដំណាក់កាលទី៣ (CCCA3)។ គម្រោងស្ថានីយទឹកស្អាតនេះ នឹងចូលរួមចំណែកក្នុងការលើកកម្ពស់ជីវភាព និងសុខមាលភាពរបស់សហគមន៍មូលដ្ឋាន ហើយក៏នឹងផ្តល់ទឹកសម្រាប់បរិភោគដោយឥតគិតថ្លៃជារៀងរាល់ថ្ងៃ ដល់សាលារៀនចំនួនបី នៅក្នុងស្រុកអូររាំងឪ ខេត្តត្បូងឃ្មុំ ដែលជាផ្នែកមួយចូលរួមគំាទ្រគោលនយោបាយរបស់រាជរដ្ឋាភិបាលលើវិស័យផ្គត់ផ្គង់ទឹកស្អាតផងដែរ។

ព័ត៌មានបន្ថែម

កិច្ចប្រជុំពិនិត្យ ប្លង់មេនិងផែនការអភិវឌ្ឍន៍វិនិយោគទេសចរណ៍ធម្មជាតិខ្នាតតូចចំនួន ៥ ស្ថិតនៅក្នុងឧទ្យានជាតិព្រះ មុនីវង្សបូកគោ ភូមិសាស្ត្រសង្កាត់ព្រែកត្នោត ខេត្តកំពត
ថ្ងៃ អង្គារ, 26 តុលា, 2021 កិច្ចប្រជុំពិនិត្យ ប្លង់មេនិងផែនការអភិវឌ្ឍន៍វិនិយោគទេសចរណ៍ធម្មជាតិខ្នាតតូចចំនួន ៥ ស្ថិតនៅក្នុងឧទ្យានជាតិព្រះ មុនីវង្សបូកគោ ភូមិសាស្ត្រសង្កាត់ព្រែកត្នោត ខេត្តកំពត
ឯកឧត្តម សាយ សំអាល់ ប្រធានក្រុមប្រឹក្សាជាតិអភិវឌ្ឍន៍ដោយចីរភាព និងជារដ្ឋមន្ត្រីក្រសួងបរិស្ថាន បានជួបប្រជុំទ្វេភាគី ជាមួយលោក Frank Rijsberman អគ្គនាយកវិទ្យាស្ថានអភិវឌ្ឍន៍បៃតងសកល (GGGI) និងសហការី តាមរយៈប្រព័ន្ធវីដេអូ (Zoom)
ថ្ងៃ អង្គារ, 26 តុលា, 2021 ឯកឧត្តម សាយ សំអាល់ ប្រធានក្រុមប្រឹក្សាជាតិអភិវឌ្ឍន៍ដោយចីរភាព និងជារដ្ឋមន្ត្រីក្រសួងបរិស្ថាន បានជួបប្រជុំទ្វេភាគី ជាមួយលោក Frank Rijsberman អគ្គនាយកវិទ្យាស្ថានអភិវឌ្ឍន៍បៃតងសកល (GGGI) និងសហការី តាមរយៈប្រព័ន្ធវីដេអូ (Zoom)
ពិធីប្រគល់-ទទួលឧបករណ៍វាស់កម្រិតបញ្ចេញឧស្ម័ន ពីយានយន្តនិង ឧបករណ៍វាស់កម្រិតសំឡេង
ថ្ងៃ ចន្ទ, 25 តុលា, 2021 ពិធីប្រគល់-ទទួលឧបករណ៍វាស់កម្រិតបញ្ចេញឧស្ម័ន ពីយានយន្តនិង ឧបករណ៍វាស់កម្រិតសំឡេង