អបអរសារទរក្នុងទិវាកុមារអន្តរជាតិ ១ មិថុនា និងបង្កើនទំនាក់ទំនងនិងសាមគ្គីភាពរវាងមន្រ្តីរាជការ និងកូនៗមន្រ្តីរាជការក្រសួងបរិស្ថាន

លោកជំទាវ ឌិត នីតា ភរិយាឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន លោកជំទាវ ម៉ុម ថានី រដ្ឋលេខាធិការក្រសួងបរិស្ថាន បានអញ្ជើញជាអធិបតីក្នុងពិធីប្រារព្វខួបលើកទី៧៣ ទិវាកុមារអន្តរជាតិ ១មិថុនា ឆ្នាំ២០២២ប្រធានបទ «វិនិយោគលើនិរន្តភាពធនធានធម្មជាតិ ជីវៈចម្រុះ ជាការវិនិយោគលើអនាគតកុមារគ្រប់រូប”” Investing on the sustainability of natural resources and biodiversity is investing future for all children”ដោយមានការអញ្ជើញចូលរួមពីថ្នាក់ដឹកនាំ មន្ត្រីរាជការ កូន ក្មួយ នៃមហាគ្រួសារក្រសួងបរិស្ថាន យ៉ាងច្រើនកុះក នាព្រឹកថ្ងៃសៅរ៍ទី១១ ខែមិថុនា ឆ្នាំ២០២២ ។

ការរៀបចំ «ទិវាកុមារអន្តរជាតិ១មិថុនា ឆ្នាំ២០២២» ប្រារព្ធឡើងក្នុងគោលបំណង៖

• ចូលរួមអបអរសារទរក្នុងទិវាកុមារអន្តរជាតិ ១ មិថុនា និងបង្កើនទំនាក់ទំនងនិងសាមគ្គីភាពរវាងមន្រ្តីរាជការ និងកូនៗមន្រ្តីរាជការក្រសួងបរិស្ថាន

• បញ្ជ្រាបចំណេះដឹងស្តីពីបរិស្ថាន បណ្តុះស្មារតី និងឆន្ទៈស្រឡាញ់បរិស្ថានទៅដល់កុមារតូចៗដែលនឹងក្លាយទៅជាអ្នកបន្តវេន និងជាអនាគតអ្នកដឹកនាំវ័យក្មេង ក្នុងកិច្ចការពារ និង អភិរក្សធម្មជាតិ ជាពិសេសផ្តោតទៅលើសត្វស្លាបទឹក និងត្រីដែលជិតផុតពូជ

• បំផុសភាពក្លាហានឱ្យកុមារហ៊ានបង្ហាញចេញនូវការយល់ដឹងពីកំណើត អំពីគុណតម្លៃ សារៈសំខាន់ និងគុណប្រយោជន៍របស់បរិស្ថាន ចំពោះការរស់នៅប្រចាំថ្ងៃរបស់មនុស្សគ្រប់រូបជាពិសេសទំលាប់នៃការរស់នៅតាមគន្លងថ្មីនៃការការពារពីការឆ្លងជំងឺកូវីដ-១៩។