យុវជនខេត្តមណ្ឌលគិរី សរុបប្រមាណជាង១០០នាក់ ដែលជាមន្រ្តី/បុគ្គលិកវ័យក្មេងបម្រើការងារនៅតាមរដ្ឋបាលថ្នាក់ខេត្ត ក្រុង ស្រុក មន្ទីរវិស័យ និងសិស្សានុសិស្ស បានចូលរួមនៅក្នុងវគ្គបណ្តុះបណ្តាលស្តីពីការប្រែប្រួលអាកាសធាតុ ដើម្បីទទួលបានចំណេះដឹងថ្មីៗទាក់ទងនឹងការប្រែប្រួលអាកាសធាតុ និងវិធានការសម្រាប់បន្ស៊ាំនិងកាត់បន្ថយការប្រែប្រួលអាកាសធាតុនៅកម្រិតសហគមន៍។ វគ្គបណ្តុះបណ្តាលនេះ បានប្រព្រឹត្តទៅក្រោមអធិបតីភាពឯកឧត្តម ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.) និង ឯកឧត្តម ឈឹម កាន អភិបាលរងនៃគណៈអភិបាលខេត្តមណ្ឌលគិរី និងជាប្រធានសហភាពសហព័ន្ធយុវជនខេត្ត ដែលមានរយៈពេល២ថ្ងៃ គឺថ្ងៃអង្គារ-ពុធ ៦-៧រោច ខែអស្សុជ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី៣០-៣១ ខែតុលា ឆ្នាំ២០១៨ នៅសណ្ឋាគារអេម៉ារីអូ ខេត្តមណ្ឌលគិរី។

ឯកឧត្តម ទិន ពន្លក អគ្គលេខាធិការក.ជ.អ.ច. បានមានប្រសាសន៍ថា ស្របពេលដែលប្រទេសនានាទូទាំងពិភពលោក ក៏ដូចជាប្រទេសកម្ពុជា បានជួបប្រទះនូវបាតុភូតធម្មជាតិមិនប្រក្រតីកាន់តែញឹកញាប់ និងធ្ងន់ធ្ងរឡើងៗ ការប្រែប្រួលអាកាសធាតុបាននិងកំពុងធ្វើឱ្យប៉ះពាល់ដល់កំណើនសេដ្ឋកិច្ចជាតិ។ ដូចនេះ យើងមិនអាចនៅស្ងៀម ឬរង់ចាំមិនធ្វើសកម្មភាពទៀតឡើយ យើងទាំងអស់គ្នាចាំបាច់ត្រូវចាត់វិធានការឆ្លើយតបឱ្យបានទាន់ពេលវេលា។

ជាមួយគ្នានេះដែរ ឯកឧត្តម ឈឹម កាន អភិបាលរងខេត្ត និងជាប្រធានស.ស.យ.ក. ខេត្ត បានថ្លែងអំណរគុណដល់ក្រុមប្រឹក្សាជាតិអភិវឌ្ឍន៍ដោយចីរភាព និងក្រសួងបរិស្ថាន ដែលបានជ្រើសរើសយកខេត្តមណ្ឌលគិរីដែលជាខេត្តដាច់ស្រយាល ដើម្បីផ្តល់ឱកាសដល់យុវជនខេត្តអាចរៀនសូត្របង្កើនចំណេះដឹងរបស់ខ្លួន ជាពិសេសពាក់ព័ន្ធនឹងការរៀបចំគោលនយោបាយរបស់រាជរដ្ឋាភិបាល និងចំណេះដឹងវិទ្យាសាស្ត្រថ្មីៗសម្រាប់ចូលរួមដោះស្រាយបញ្ហាការប្រែប្រួលអាកាសធាតុនៅថ្នាក់មូលដ្ឋាន។

នៅថ្ងៃទី១ សិក្ខាកាមបានទទួលចំណេះដឹងស្តីពីមូលហេតុនិងផលប៉ះពាល់នៃការប្រែប្រួលអាកាសធាតុ យន្តការឆ្លើយតបនៅថ្នាក់ជាតិនិងអន្តរជាតិ ជម្រើសបន្ស៊ាំនឹងការប្រែប្រួលអាកាសធាតុ ជម្រើសកាត់បន្ថយឧស្ម័ផ្ទះកញ្ចក់ និងការផ្សព្វផ្សាយចំណេះដឹងប្រែប្រួលអាកាសធាតុ។ នៅថ្ងៃទី២ សិក្ខាកាមទាំងអស់នឹងចុះរៀនសូត្រជាក់ស្តែងអំពីការគ្រប់គ្រងទូទៅក្នុងដែនជម្រកសត្វព្រៃសីមា ការអនុវត្តគម្រោងលក់ឥណទានកាបូន គម្រោងចិញ្ចឹមសត្វនិងដំណាំតាមគ្រួសារ និងសមិទ្ធផលនៃគម្រោងលក់ឥណទានកាបូនសម្រាប់ជួយជីវភាពប្រជាជនក្នុងសហគមន៍ នៅទីស្នាក់ការដែនជម្រកសត្វព្រៃកែវសីមា និងនៅក្នុងសហគមន៍អូររណា។

វគ្គបណ្តុះបណ្តាលនេះរៀបចំដោយនាយកដ្ឋានប្រែប្រួលអាកាសធាតុនៃអគ្គលេខាធិការដ្ឋានក.ជ.អ.ច. សហការជាមួយសាលាខេត្តមណ្ឌលគិរី និងសហភាពសហព័ន្ធយុវជនខេត្តមណ្ឌលគិរី ដោយមានការគាំទ្រថវិកាពីកម្មវិធីសម្ព័ន្ធភាពប្រែប្រួលអាកាសធាតុកម្ពុជា(CCCA)។

ព័ត៌មានបន្ថែម

ឯកឧត្តមរដ្ឋមន្រ្តីក្រសួងបរិស្ថាន ប្រគល់ធុងទឹកចម្រោះទឹកស្អាតជូនវិទ្យាល័យហ៊ុនសែនតាខ្មៅ ខេត្តកណ្តាល
ថ្ងៃ ពុធ, 20 តុលា, 2021 ឯកឧត្តមរដ្ឋមន្រ្តីក្រសួងបរិស្ថាន ប្រគល់ធុងទឹកចម្រោះទឹកស្អាតជូនវិទ្យាល័យហ៊ុនសែនតាខ្មៅ ខេត្តកណ្តាល
ការផ្តល់មធ្យោបាយគាំទ្រដល់រដ្ឋបាលក្រុង ស្រុក ឈានទៅមានភាពជាម្ចាស់ក្នុងការគ្រប់គ្រងសំរាម សំណល់រឹងទីប្រជុំជន ឱ្យស្អាត ឱ្យអស់ ទាន់ពេល និងមាននិរន្តរភាព គឺសម្រាប់យើងទាំងអស់គ្នា
ថ្ងៃ សៅរ៍, 16 តុលា, 2021 ការផ្តល់មធ្យោបាយគាំទ្រដល់រដ្ឋបាលក្រុង ស្រុក ឈានទៅមានភាពជាម្ចាស់ក្នុងការគ្រប់គ្រងសំរាម សំណល់រឹងទីប្រជុំជន ឱ្យស្អាត ឱ្យអស់ ទាន់ពេល និងមាននិរន្តរភាព គឺសម្រាប់យើងទាំងអស់គ្នា
ឯកឧត្តមរដ្ឋមន្ត្រីក្រសួងបរិស្ថានដឹកនាំប្រតិភូ អញ្ជើញចូលរួមពិធីគោរពព្រះវិញ្ញាណក្ខន្ធ ព្រះបរមរតនកោដ្ឋ
ថ្ងៃ សុក្រ, 15 តុលា, 2021 ឯកឧត្តមរដ្ឋមន្ត្រីក្រសួងបរិស្ថានដឹកនាំប្រតិភូ អញ្ជើញចូលរួមពិធីគោរពព្រះវិញ្ញាណក្ខន្ធ ព្រះបរមរតនកោដ្ឋ