ឯកឧត្តមរដ្ឋមន្រ្តី សាយ សំអាល់ អញ្ជើញពិនិត្យការចិញ្ចឹមជ្រូកកណ្តុរ នៅស្នាក់ការដែនជម្រកសត្វព្រៃភ្នំឱរ៉ាល់

ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន បានអញ្ជើញចុះទៅពិនិត្យ ការចិញ្ចឹមជ្រូកកណ្តុរ នៅស្នាក់ការដែនជម្រកសត្វព្រៃភ្នំឱរ៉ាល់ ខេត្តពោធិ៍សាត់ និងសំណេះសំណាលជាមួយមន្រ្តី ឧទ្យានុរក្សនៃមន្ទីរបរិស្ថានខេត្តកាលពីថ្ងៃទី២១ ខែសីហា ឆ្នាំ២០១៨ ។

ឯកឧត្តម សាយ សំអាល់ បានជម្រុញឱ្យមានការចិញ្ចឹមសត្វជ្រូកកណ្តុរ (ជ្រូកពូជជនជាតិ) និងសត្វមាន់ ដែលទាំងនេះគឺជាផ្នែកមួយសម្រាប់ជីវភាពប្រជាពលរដ្ឋនៅក្នុងតំបន់នេះ មិនតែប៉ុណ្ណោះអាចយកទៅផ្គត់ផ្គង់ទីផ្សារនៅក្នុងស្រុកថែមទៀតផង ។ ឯកឧត្តមរដ្ឋមន្រ្តី បានស្នើរគ្រប់ផ្នែកពាក់ព័ន្ធទាំងអស់ត្រូវយកចិត្តទុកដាក់ឱ្យបានខ្ពស់ ជាពិសេសពិនិត្យនិងសិក្សាបន្ថែមទៀត លើជំនាញនិងបច្ចេកទេសក្នុងការចិញ្ចឹមសត្វទាំងនេះមានសុខភាពល្អ និងទទួលបានទិន្ឋផលខ្ពស់ ។
ឯកឧត្តមខៀវ បូរិន អគ្គនាយកនៃអគ្គនាយកដ្ឋានសហគមន៍មូលដ្ឋាន បានឱ្យដឹងថា គោលបំណងនៃការបង្កើតមជ្ឍមណ្ឌលនៃការចិញ្ចឹមជ្រូកកណ្តុរ (ជ្រូកពូជជនជាតិ) គឺដើម្បីផលិតកូនជ្រូកទាំងអស់នេះ ចែកជូនប្រជាកសិករនៅក្នុងសហគមន៍តំបន់ការពារធម្មជាតិ ដែលនេះជាគោលដៅរបស់ក្រសួងបរិស្ថានដែលបានជំរុញ និងលើកទឹកចិត្តប្រជាពលរដ្ឋឱ្យចិញ្ចឹមជ្រូក ដែលអាចពឹងពាក់លើចំណីក្នុងស្រុក និងការរីកលូតលាស់តាមលក្ខណៈធម្មជាតិ មិនតែប៉ុណ្ណោះអាចយកទៅផ្គត់ផ្គង់ទីផ្សារក្នុងស្រុក ក្នុងការរកប្រាក់ចំណូលសម្រាប់ជីវភាព ។ ឯកឧត្តមអគ្គនាយកបន្តថា បន្ទាប់ពីទទួលបានគោលការណ៍ក្រោយសន្និតបាតក្រសួងបរិស្ថានកាលពីឆ្នាំស២០១៧ អគ្គនាយកដ្ឋានសហគមន៍មូលដ្ឋាន បានបង្កើតស្ថានីយ៍ចិញ្ចឹមជ្រូកពូជនេះបាន២កន្លែងទាំងនៅទីនេះ និងមួយកន្លែងទៀតនៅក្នុង ខេត្តមណ្ឌលគិរី ដែលជាសហគមន៍តំបន់ការពារធម្មជាតិដែរ ។
មជ្ឍមណ្ឌលចិញ្ចឹមជ្រូកកណ្តុរ (ជ្រូកពូជជនជាតិ) នៃដែនជម្រកសត្វព្រៃភ្នំឱរ៉ាល់ នៅភូមិសាស្រ្តខេត្តពោធិ៍សាត់ មានផ្ទៃដីសរុបចំនួន៣ហិចតា ។ សូមបញ្ជាក់ថានៅក្នុងការចុះពិនិត្យមជ្ឍមណ្ឌលចិញ្ចឹមជ្រូកកណ្តុរ និងជួបសំណេះសំណាល ជាមួយមន្រ្តីបរិស្ថានខេត្តរួចមក ឯកឧត្តម រដ្ឋមន្រ្តី សាយ សំអាល់ ក៏បានអញ្ជើញដាំកូនឈើ ជានិមិត្តរូបក្នុងដែនជម្រកសត្វព្រៃភ្នំឱរ៉ាល់ផងដែរ ៕