សិក្ខាសាលា​ ផ្សព្វផ្សាយផែនការយុទ្ធសាស្រ្តបញ្ជ្រាបយេនឌ័រក្នុងវិស័យបរិស្ថាន ឆ្នាំ២០១៦-២០២០

ខេត្តកោះកុង​៖​ នៅថ្ងៃច័ន្ទ​ ២កើត​ ខែស្រាពណ៌ ឆ្នាំច​ សំរឹទ្ធស័ក​ ព.ស​.២៥៦២​ ត្រូវនឹងថ្ងៃទី១៣​ ខែសីហា​ ឆ្នាំ២០១៨​ ក្រុមការងារបច្ចេកយេនឌ័រក្រសួងបរិស្ថាន​ បានរៀបចំសិក្ខាសាលា​ ផ្សព្វផ្សាយផែនការយុទ្ធសាស្រ្តបញ្ជ្រាបយេនឌ័រក្នុងវិស័យបរិស្ថាន ឆ្នាំ២០១៦-២០២០ និងផ្សព្វផ្សាយអនុសញ្ញាស្តីពីការបំបាត់រាល់ទម្រង់ នៃការរើសអើងប្រឆាំងនិងនារីភេទ(ស៊ី-ដ)​ សំដៅកែប្រែ និងធានាឱ្យមានសមភាពយេនឌ័រ កែប្រែនូវវិសមភាពលើទំនាក់ទំនងរវាងស្រ្តី និងបុរសក្នុងការគ្រប់គ្រង ចាត់ចែង និងការធ្វើសេចក្តីសម្រេចចិត្តក្នុងការគ្រប់គ្រងធនធានធម្មជាតិ ដែលជាការផ្តល់លទ្ធភាពក្នុងការលើកកម្ពស់ស្ថានភាព និងសមត្ថភាពស្រ្តីក្នុងការបំពេញការងារ ដើម្បីឆ្លើយតបនឹងតម្រូវការក្នុងការធ្វើឱ្យមានសមភាព និងសមធម៌យេនឌ័រ និងដើម្បីបង្កើនឱ្យមានការចូលរួមកាន់តែប្រសើរថែមទៀតរវាងស្រ្តី និងបុរសក្នុងវិស័យបរិស្ថាន។ សិក្ខាសាលានេះ​ មានការអញ្ជើញជាអធិបតី​ដោយ​ លោកជំទាវ​ ព្រំ​ សុភី​ អនុរដ្ឋលេខាធិការ​ និងជាប្រធានក្រុមការងារបច្ចេកទេសយេនឌ័រក្រសួងបរិស្ថាន​ និងលោកជំទាវ​ ឈុន​ រ៉ាវុធ​ អភិបាលរង​ នៃគណៈអភិបាលខេត្តកោះកុង​ រួមទាំងមន្រ្តីពាក់ព័ន្ធក្រសួងបរិស្ថាន​ និងមន្ទីរ​ ស្ថាប័នពាក់ព័ន្ទ​ យុវជនខេត្តកោះកុង​ ប្រមាណ១០០នាក់។

នាឱកាសនោះ​ លោកជំទាវ​អនុរដ្ឋលេខាធិការ​ បានលើកឡើងថា​ ផែនការយុទ្ធសាស្ត្រ នេះបានរៀបចំជាទិសដៅយុទ្ធសាស្រ្តសំខាន់ៗទៅតាមនាយកដ្ឋាន ដោយដាក់ចេញនូវសកម្មភាពនានាដើម្បីកែប្រែវិសមភាពលើទំនាក់ទំនងរវាងស្រ្តីនិងបុរសក្នុងការគ្រប់គ្រង និងធើ្វសេចក្តីសម្រេចចិត្ត ដែលជាការផ្តល់លទ្ធភាពក្នុងការលើកកម្ពស់ស្ថានភាពស្រ្តី និងសមភាពយេនឌ័រ ដែលអាចឈានទៅធានាថាអាចមានការកែប្រែសម្រាប់ធានា ឱ្យមានសមភាពយេនឌ័រ ដើម្បីដោះស្រាយនូវរាល់ឧបសគ្គនានាចំពោះស្ដ្រីក្នុងការបំពេញនូវតួនាទីជាអ្នកដឹកនាំក្នុងព្រះរាជាណាចក្រកម្ពុជា និងជាពិសេសក្នុងវិស័យគ្រប់គ្រងធនធានធម្មជាតិ និងបរិស្ថានដែលជាការងារស្នូលរបស់ក្រសួង ទាំងនៅថ្នាក់ជាតិ និងថ្នាក់ក្រោមជាតិ។

លោកជំទាវ​ ឈុន​ រ៉ាវុធ​ អភិបាលរងខេត្តកោះកុង​ បានអោយដឹងថា​ តាមរយៈសិក្ខាសាលានេះ​ មានសារៈសំខាន់ណាស់ក្នុងការជំរុញ​ និងលើកកម្ពស់ដល់ស្រ្តី​ ក្នុងការចូលរួមរាល់គ្រប់សកម្មភាពក្នុងសង្គម​ និងជាផ្នែកមួយជំរុញយុទ្ធសាស្រ្តយេនឌ័រអោយមានប្រសិទ្ធភាព។ យ៉ាងណាមិញ​ ផែនការយុទ្ធសាស្រ្តនេះ​ សង្ឃឹមដែរថា នឹងបានរួមចំណែកក្នុងការសម្រេចបានូវគោលដៅ ជាយុទ្ធសាស្រ្តរបស់ក្រសួងបរិស្ថាន ក្នុងការធ្វើទំនើបកម្មស្ថាប័ន កិច្ចគាំពារបរិស្ថាន ការអភិរក្សជីវៈចម្រុះ និងការរស់នៅប្រកបដោយចីរភាព។

គូសបញ្ជាក់ថា​ សិក្ខាសាលានេះ​ មានរយៈ២ថ្ងៃ​ ដោយក្នុងសិក្ខាកាមទាំងអស់នឹងចុះទៅទស្សនៈកិច្ចសិក្សាស្វែងយល់ផ្ទាល់នៅសហគមន៍តំបន់ការពារពាមក្រសោប​ ដើម្បីស្វែងយល់បន្ថែមក្នុងការចូលរួមរបស់ស្រីសម្រាប់ការអភិរក្សធនធានធម្មជាតិ​ អភរក្សជីវៈចម្រុះ​ និងការកម្ពស់កំរិតជីវភាពឲប្រសើរឡើងក្នុងសហគមន៍តំបន់ការពារធម្មជាតិនេះ៕