ប្រជុំពិភាក្សាការងារទ្វេភាគីជាមួយគណៈប្រតិភូសាជីវកម្មនុយក្លេអ៊ែរជាតិចិន នៃសាធារណរដ្ឋប្រជាមានិតចិន(CNNC)
ថ្ងៃ ចន្ទ, 2 កក្កដា, 2018នៅព្រឹក ថ្ងៃចន្ទ ៥ រោច ខែបឋមាសាឍ ឆ្នាំច សំរឹទ្ធស័ក ព.ស.២៥៦២ ត្រូវនឹងថ្ងៃទី០២ ខែកក្កដា ឆ្នាំ២០១៨ នៅទីស្តីការក្រសួងបរិស្ថាន ឯកឧត្តម ទិន ពន្លក អគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.)និងជាតំណាងរបស់ឯកឧត្តម សាយ សំអាល់ ប្រធានក.ជ.អ.ច. បានជួបប្រជុំពិភាក្សាការងារទ្វេភាគីជាមួយគណៈប្រតិភូសាជីវកម្មនុយក្លេអ៊ែរជាតិចិន នៃសាធារណរដ្ឋប្រជាមានិតចិន(CNNC) ដែលដឹកនាំដោយ ឯកឧត្តម Wang Shoujun ប្រធាន CNNC ដើម្បីលើកកម្ពស់កិច្ចសហប្រតិបត្តិការក្នុងការអនុវត្តអនុស្សរណៈនៃការយោគយល់រវាង ក.ជ.អ.ច. និង CNNC ស្តីពីកិច្ចសហប្រតិបត្តិការឧស្សាហកម្មនុយក្លេអ៊ែរសម្រាប់បម្រើឱ្យគោលបំណងសន្តិភាព ដែលបានចុះហត្ថលេខាកាលពីថ្ងៃ១២ ខែកញ្ញា ឆ្នាំ២០១៧ នៅទីក្រុងណាននីង ប្រទេសចិន។ នៅក្នុងជំនួបពិភាក្សាការងារទ្វេភាគីប្រកបដោយភាតរភាពក្នុងស្មារតីទទួលខុសត្រូវខ្ពស់ ភាគីទាំងពីរបានពិភាក្សា គ្នាផ្លាស់ប្តូរទស្សនៈ មតិយោបល់ទៅវិញទៅមក និងឯកភាពក្នុងការជំរុញ និងពង្រឹងកិច្ចសហប្រតិបត្តិការបន្ថែមទៀតដោយផ្តោតលើវិស័យនៃការអភិវឌ្ឍន៍ធនធានមនុស្ស ការលើកកម្ពស់ការយល់ដឹងជាសាធារណៈអំពីថាមពលនុយក្លេអ៊ែរ និងបច្ចេកវិទ្យានុយក្លេអ៊ែរសម្រាប់បម្រើឱ្យគោលបំណងសន្តិភាព ជាពិសេសការប្រើប្រាស់បច្ចេកវិទ្យាទាំងនេះ សម្រាប់បម្រើឱ្យឧត្តមប្រយោជន៍ជាតិនៅក្នុងវិស័យវេជ្ជសាស្រ្ត កសិកម្ម ឧស្សាហកម្ម និងបរិស្ថាន ជាដើម៕
ព័ត៌មានបន្ថែម
ថ្ងៃ សុក្រ, 5 សីហា, 2022
អាស៊ានបញ្ជាក់ឡើងវិញនូវការប្តេជ្ញាចិត្តចំពោះការឆ្លើយតបនឹងការប្រែប្រួលអាកាសធាតុ
