សិក្ខាសាលាស្តីពីការលើកកម្ពស់កិច្ចគាំពារបរិស្ថាននៅតាមវិទ្យាល័យ

ខេត្តបាត់ដំបង៖ នៅថ្ងៃច័ន្ទ ៦រោច ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៤ ខែមិថុនា ឆ្នាំ២០១៨ និងថ្ងៃអង្គារ ៧រោច ខែជេស្ឋ ឆ្នាំច ត្រូវនឹងថ្ងៃទី០៥ ខែមិថុនា ឆ្នាំ២០១៨ ឯកឧត្តម សាបូ អូហ្សាណូ រដ្ឋលេខាធិការក្រសួងបរិស្ថាន បានដឹកនាំក្រុមការងារក្រសួងបរិស្ថាន និងមន្ទីរបរិស្ថានចុះអប់រំផ្សព្វផ្សាយអំពីកិច្ចគាំពារបរិស្ថាន និងសំណេះសំណាលជាមួយសិស្សានុសិស្សថ្នាក់ទី១២ តាមវិទ្យាល័យចំនួន០៤ នៅខេត្តបាត់ដំបងដូចជា វិទ្យាល័យនេតយ៉ង់ វិទ្យាល័យសម្តេចឪ វិទ្យាល័យក្តុលដូនទាវ និងវិទ្យាល័យព្រះមុនីវង្ស។ ឯកឧត្តមរដ្ឋលេខាធិការ បានផ្តលអនុសាសន៍អំពីចំណេះដឹងបរិស្ថាន តម្រូវការធនធានមនុស្សបរិស្ថាន ជម្រុញឱ្យសិស្សានុសិស្សខិតខំរៀនសូត្រដើម្បីទទួលបានជោគជ័យក្នុងការប្រឡងនាពេលខាងមុខ និងណែនាំយុវជន និងលោកគ្រូអ្នកគ្រូដែលមានបណ្ណបោះឆ្នោតទាំងអស់ឱ្យបំពេញកាតព្វកិច្ចជាពលរដ្ឋគឺទៅបោះឆ្នោតឱ្យបានគ្រប់គ្នា។ បន្ទាប់ពីខេត្តបាត់ដំបង ឯកឧត្តមរដ្ឋលេខាធិការនឹងដឹកនាំក្រុមការងារបន្តចុះផ្សព្វផ្សាយតាមវិទ្យាល័យនៅខេត្តប៉ៃលិនបន្តទៀត៕