ក្នុងឆ្នាំនេះដែរ ប្រជាជនកម្ពុជានិងទូទាំងពិភពលោកនឹងចូលរួមប្រារព្ធឆន្ទៈមួយម៉ោងសម្រាប់ភពផែនដីយើង។ ឯកឧត្តម នេត្រ ភក្រ្តា រដ្ឋលេខាធិការនិងជាមន្ត្រីនាំពាក្យក្រសួងបរិស្ថានបានមានប្រសាសន៍ថា៖ «ក្នុងនាមជាប្រជាជននៃភពផែនដី យើងខ្ញុំសូមឧទ្ទិសការដឹងគុណចំពោះភពផែនដីដែលបានផ្តល់ខ្យល់អុកស៊ីសែនដល់យើងសម្រាប់ដកដង្ហើម ទឹកនិងអាហារសម្រាប់ទទួលទាន ទ្រទ្រង់ការសាយភាយលំអងរុក្ខជាតិច្រើនប្រភេទ ការពារមនុស្សជាតិពីគ្រោះធម្មជាតិនានា ព្រមទាំង ផ្តល់អត្ថប្រយោជន៍ជាច្រើនផ្សេងទៀតចាំបាច់សម្រាប់គាំទ្រដល់ជីវិតមនុស្ស។ លក្ខណៈពិសេសនៃប្រព័ន្ធអេកូឡូស៊ីធម្មជាតិរបស់ភពផែនដីទាំងអស់នេះសរបញ្ជាក់ពីទំនាក់ទំនងរបស់យើងទាំងអស់គ្នាជាមួយភពផែនដី»។

ឯកឧត្តម នេត្រ ភក្រ្តាបានបន្តថា៖ «យើងត្រូវរួមគ្នាធ្វើសកម្មភាពពេលនេះជាងពេលណាៗទាំងអស់ ដើម្បីតបស្នងដល់ភពផែនដីវិញក្នុងការរស់នៅប្រចាំថ្ងៃតាមរយៈសកម្មភាពផ្សេងៗ រាប់ចាប់តាំងពីការកាត់បន្ថយនូវធនធានដែលយើងមាន (Reduce) ការប្រើប្រាស់ឡើងវិញធនធានដែលយើងមាន (Reuse) និងការកែច្នៃឡើងវិញធនធានដែលយើងមាន(Recycle) ក៏ដូចជាការមិនបរិភោគសាច់សត្វព្រៃ មិនជាវផលិតផលពីសត្វព្រៃ ដើម្បីកាត់បន្ថយហេតុប៉ះពាល់អវិជ្ជមានលើបរិស្ថានធម្មជាតិ រហូតដល់ការរួមចំណែកសកម្មភាពធំ ឧទាហរណ៍ដូចជាការវិនិយោគលើជម្រើសថាមពលកកើតឡើងវិញ ដើម្បីចូលរួមការពារជីវៈចម្រុះនិងប្រព័ន្ធអេកូឡូស៊ីកម្ពុជា។ ប្រជាជនគ្រប់រូបត្រូវចូលរួមចំណែកក្នុងការបង្កើនឥទ្ធិពលនៃសកម្មភាពរួមជាវិជ្ជមានសម្រាប់ភពផែនដី។ ទិវាមួយម៉ោងសម្រាប់ភពផែនដីគឺជានិមិត្តរូបនៃការបង្រួបបង្រួម ហើយក្នុងឆ្នាំ២០២៣នេះ អំពាវនាវដល់ប្រជាជនក្នុងប្រទេសកម្ពុជា និងនៅលើ ពិភពលោកឲ្យអនុវត្តសកម្មភាពវិជ្ជមានបន្ថែមទៀតដើម្បីស្តារភពផែនដីឡើងវិញ សម្រាប់គាំទ្រដល់ការអភិវឌ្ឍប្រកបដោយចីរភាព»។
ឯកឧត្តម តុប សុភ័ក រដ្ឋលេខាធិការក្រសួងទេសចរណ៍បានលើកឡើងថា៖ «វិធីសាស្រ្តនៃការអនុវត្តការងារតាមទម្លាប់ចាស់លែងគ្រប់គ្រាន់ទៀតហើយ ដូចនេះយើងទាំងអស់គ្នាត្រូវតែចូលរួមបង្កើនសកម្មភាពបន្ថែមទៀត។ សុខភាពសាធារណៈ សង្គមប្រកបដោយបរិយាបន្ន និងការអភិរក្សជីវៈចម្រុះសុទ្ធសឹងជាធាតុផ្សំដ៏សំខាន់សម្រាប់ប្រទេសកម្ពុជា និងសង្គមជុំវិញពិភពលោក អនុវត្តក្នុងការស្តារភពផែនដីឡើងវិញប្រកបដោយភាពធន់និងរឹងមាំ ក្នុងន័យនេះ ការអនុវត្តស្តង់ដានៃគោលការណ៍ទេសចរណ៍ប្រកបដោយការទទួលខុសត្រូវអាចជួយដល់ប្រតិបត្តិករទេសចរណ៍ និងសហគមន៍ទេសចរណ៍ ក្នុងការស្តារវិស័យទេសចរណ៍ឲ្យកាន់តែប្រសើរឡើង»។
ព្រឹត្តិការណ៍ចុងក្រោយមួយចំនួនដែលបានកើតឡើងបានជម្រុញឲ្យមនុស្សនៅជុំវិញពិភពលោកងាកមកគិតគូរសារឡើងវិញអំពីសារៈសំខាន់នៃធម្មជាតិ ទំនាក់ទំនងរបស់ធម្មជាតិក្នុងជីវភាពរស់នៅរបស់យើងទាំងអស់គ្នា និងកត្តាគំរាមកំហែងដែលធម្មជាតិកំពុងប្រឈម។ លក្ខខ័ណ្ឌទាំងអស់នេះបានបញ្ជាក់ឲ្យឃើញអំពីទំនាក់ទំនងដែលមិនអាចកាត់ផ្តាច់បានរវាងសុខភាពរបស់មនុស្ស និងសុខភាពរបស់ភពផែនដីដែលបច្ចុប្បន្នសុទ្ធតែកំពុងស្ថិតក្រោមការគំរាមកំហែងពីសកម្មភាពផ្សេងៗ។
លោក សេង ទៀក នាយកអង្គការWWF បានឲ្យដឹងថា៖ «ធម្មជាតិគឺជាសម្ព័ន្ធមិត្តដ៏ចាំបាច់បំផុតមួយរបស់មនុស្សដើម្បីប្រយុទ្ធប្រឆាំងនឹងហេតុប៉ះពាល់នៃការប្រែប្រួលអាកាសធាតុ និងកសាងអនាគតមួយប្រកបដោយនិរន្តរភាព ព្រោះធម្មជាតិនិងជីវៈចម្រុះជាអ្នកទ្រទ្រង់ជីវិតមនុស្ស និងសុខមាលភាពក៏ដូចជាផ្តល់អត្ថប្រយោជន៍ផ្នែកសេដ្ឋកិច្ចសង្គម។ លោកបានបន្តថា៖ «ការស្តារធម្មជាតិនិងជីវៈចម្រុះឡើងវិញ ជាដំណោះស្រាយឈ្នះឈ្នះដើម្បីសង្គ្រោះសុខមាលភាព
បរិស្ថាន និងមនុស្សជាតិ»។
នៅក្នុងទិវាមួយម៉ោងសម្រាប់ភពផែនដីឆ្នាំនេះ គ្រឹះស្ថានសាធារណៈ សហគមន៍ វិស័យឯកជន និងប្រជាជនគ្រប់រូបនៅគ្រប់ទិសទីត្រូវបានលើកទឹកចិត្តឲ្យផ្តល់ពេលវេលាចំនួនមួយម៉ោងសម្រាប់ភពផែនដីតាមរយៈការធ្វើសកម្មភាពវិជ្ជមាន ទោះតិចឬច្រើនក្តី សកម្មភាពតូចឬធំក្តី ដើម្បីស្តារភពផែនដីឲ្យកាន់តែប្រសើរឡើងវិញ។
ក្រោមប្រធានបទ «ឈានទៅមុខរួមគ្នា ស្តារផែនដីស្រស់បំព្រងឡើងវិញ» នេះគឺជាខួបទី១៤ហើយដែលប្រទេសកម្ពុជាប្រារព្ធទិវាមួយម៉ោងសម្រាប់ភពផែនដី ដែលប្រព្រឹត្តឡើងដោយមានការតាំងពិព័រណ៍សមិទ្ធផលការងារបរិស្ថាន ផលិតផលការងារសហគមន៍ វេទិការពិភាក្សា ព្រមទាំងការប្រគុំតន្រ្តី ការសម្តែងសិល្បៈ សំដៅបង្កើនការយល់ដឹងពីបរិស្ថានក៏ដូចជាសម្រាប់ការកំសាន្តផងដែរ៕

រូបថតដោយ ឡុង ដេវីត

ព័ត៌មានបន្ថែម

សិស្សានុសិស្សសាលាបឋមសិក្សាថ្នល់កែងថ្លែងអំណរគុណជូនចំពោះឯកឧត្តមបណ្ឌិត អ៊ាង សុផល្លែត និងលោកជំទាវ ជា សុផាកន្នី
ថ្ងៃ អង្គារ, 19 មិនា, 2024 សិស្សានុសិស្សសាលាបឋមសិក្សាថ្នល់កែងថ្លែងអំណរគុណជូនចំពោះឯកឧត្តមបណ្ឌិត អ៊ាង សុផល្លែត និងលោកជំទាវ ជា សុផាកន្នី
រយៈពេល៥ថ្ងៃ សមត្ថកិច្ចបានឃ្លុំដីទំហំជិត៤ពាន់ហិកតា និងបញ្ជូនជនសង្ស័យ១នាក់ទៅតុលាការ
ថ្ងៃ ចន្ទ, 18 មិនា, 2024 រយៈពេល៥ថ្ងៃ សមត្ថកិច្ចបានឃ្លុំដីទំហំជិត៤ពាន់ហិកតា និងបញ្ជូនជនសង្ស័យ១នាក់ទៅតុលាការ
មន្រ្តីជាន់ខ្ពស់ក្រសួងបរិស្ថានបន្តចុះផ្សព្វផ្សាយយុទ្ធសាស្រ្តរបស់រាជរដ្ឋាក្នុងការគ្រប់គ្រងធនធានធម្មជាតិ នៅក្នុងភូមិសាស្រ្តខេត្តពោធិ៍សាត់
ថ្ងៃ ចន្ទ, 18 មិនា, 2024 មន្រ្តីជាន់ខ្ពស់ក្រសួងបរិស្ថានបន្តចុះផ្សព្វផ្សាយយុទ្ធសាស្រ្តរបស់រាជរដ្ឋាក្នុងការគ្រប់គ្រងធនធានធម្មជាតិ នៅក្នុងភូមិសាស្រ្តខេត្តពោធិ៍សាត់