ការអនុម័តជ្រើសរើសគំរូនៃការអភិវឌ្ឍដែលមានចីរភាពជាងមុននិងមានទស្សនៈវិស័យវែងឆ្ងាយ ជួយឱ្យ កម្ពុជាដោះស្រាយការប្រឈម និងសម្រេចបានវឌ្ឍនភាពសេដ្ឋកិច្ច សង្គម និងបរិស្ថានមួយប្រកបដោយនិរន្តរភាព

សិក្ខាសាលានេះរៀបចំដោយអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព ដោយមានអ្នកចូលរួមសរុប២៣៤នាក់ អញ្ជើញមកពីក្រសួងស្ថាប័ន គ្រឹះស្ថានសិក្សា/ស្រាវជ្រាវ អង្គការមិនមែនរដ្ឋាភិបាល និង
វិស័យឯកជន នៅភោជនីយដ្ឋានទន្លេបាសាក់២។

ជាទស្សនវិស័យសម្រាប់ការងារពេលអនាគត ឯកឧត្តមអនុរដ្ឋលេខាធិការបានបន្តថា ក្រុមប្រឹក្សាជាតិអភិវឌ្ឍន៍ដោយចីរភាព គួរផ្តោតការយកចិត្តទុកដាក់ទៅលើអាទិភាពជាយុទ្ធសាស្ត្រ រួមមាន ការរៀបចំផែនការលំអិតនិងយុទ្ធសាស្រ្តពាក់ព័ន្ធនឹងគម្រោងទីក្រុងនិរន្តរភាព, ថាមពលនិរន្តរភាព, កម្មវិធីតម្រង់ទិសគោលនយោបាយសម្រាប់ការអភិវឌ្ឍបៃតង, ការឆ្លើយតបនឹងការប្រែប្រួលអាកាសធាតុ, ការសិក្សាស្រាវជ្រាវ វិទ្យាសាស្ត្រ ការគ្រប់គ្រងចំណេះដឹង ការចងក្រងទិន្នន័យ ការចែករម្លែកនិងផ្លាស់ប្តូរព័ត៌មានស្តីពីធនធានជីវៈចម្រុះ ប្រព័ន្ធអេកូឡូស៊ី និងជីវសុវត្ថិភាព, និងការសិក្សា និងស្រាវជ្រាវផ្នែកវិទ្យាសាស្រ្ត បច្ចេកវិទ្យាបៃតងនិងនវានុវត្ត។

សិក្ខាសាលាទី៣ស្តីពីការគ្រប់គ្រងការអភិវឌ្ឍដោយចីរភាពនឹងពិភាក្សាទៅលើទិដ្ឋភាពសំខាន់ចំនួន៤៖ ទិដ្ឋភាពទូទៅនៃកំណែទម្រង់អភិបាលកិច្ចបរិស្ថាន, ការអភិវឌ្ឍសេដ្ឋកិច្ចបៃតងនិងវិទ្យាសាស្រ្តនិងបច្ចេកវិទ្យា, ការឆ្លើយតបនឹងការប្រែប្រួលអាកាសធាតុ, និងការអភិរក្សជីវៈចម្រុះនិងជីវសុវត្ថភាព សរុបចំនួន១៤ប្រធានបទ។ ក្នុងនោះ ទិដ្ឋភាពទូទៅនៃកំណែទម្រង់អភិបាលកិច្ចបរិស្ថាននឹងផ្តោតទៅលើ សមិទ្ធផលនិងអាទិភាពចំពោះមុខរបស់ក្រុមប្រឹក្សាជាតិអភិវឌ្ឍន៍ដោយចីរភាព, សេចក្តីព្រាងក្រមបរិស្ថាននិងធនធានធម្មជាតិ, សេចក្តីព្រាងយុទ្ធសាស្រ្តនិងផែនការសកម្មភាពបរិស្ថានជាតិ និងមូលដ្ឋានបនីយកម្មគោលដៅអភិវឌ្ឍន៍ដោយចីរភាពសម្រាប់វិស័យបរិស្ថាន និងការអភិវឌ្ឍដោយចីរភាព៕