សិស្សវិទ្យាល័យឧដុង្គជូនរូបសញ្ញាក្រសួងបរិស្ថានផលិតពីគ្រាប់ធញ្ញជាតិដល់រដ្ឋមន្ត្រី ខណៈដែលវាគឺជាសក្ខីភាពនៃជោគជ័យលើការបញ្ជ្រៀបស្តីពីបរិស្ថាន
ថ្ងៃ សុក្រ, 1 កញ្ញា, 2017សិស្សានុសិស្សចំនួន៤រូប និងលោកគ្រូៗមកពីវិទ្យាល័យឧដុង្គ ខេត្តកំពង់ស្ពឺ ដែលដឹកនាំដោយក្រុម Blue Media នៅថ្ងៃទី០១ ខែសីហានេះ បានចូលជួបឯកឧត្តមរដ្ឋមន្ត្រីក្រសួងបរិស្ថាន ដើម្បីប្រគល់រូបសីញ្ញា (Logo)ក្រសួងបរិស្ថានដែលជាស្នាដៃផ្ទាល់របស់សិស្សានុសិស្សផលិតចេញពីគ្រាប់ធញ្ញជាតិ។
តំណាងក្រុមការងារ យុវតី ស៊ុន រស្មី បញ្ជាក់ពីមូលហេតុនៃការធ្វើរូបសញ្ញានេះថា ដោយសារតែចូលចិត្តការច្នៃប្រឌិត និងស្រឡាញ់បរិស្ថាន ដូចនេះហើយបានជាក្រុមការងារដែលសុទ្ធតែជាសិស្សថ្នាក់ទី១០ទាំងនេះ បានដុតដៃដុតជើងខិតខំធ្វើរូបសញ្ញានេះ។
ដោយឡែកឯកឧត្តម សាយ សំអាល់ រដ្ឋមន្ត្រីបរិស្ថាន បានថ្លែងការកោតសរសើរចំពោះភាពច្នៃប្រឌិតរបស់យុវសិស្សទាំង៤ដែលបានផលិតដោយដៃផ្ទាល់លើរូបសញ្ញារបស់ក្រសួង។
ឯកឧត្តមរដ្ឋមន្ត្រី បានសង្កត់ធ្ងន់ថា “នេះគឺជាសក្ខីភាពនៃការបញ្ជ្រៀបគោលនយោបាយរបស់បរិស្ថានចំពោះប្រជាពលរដ្ឋ ហើយវាក៏ជាសិល្បៈដើម្បីទាក់ទាញឱ្យមានការយល់ដឹងពីបរិស្ថាន។ ការដែលយុវសិស្សក្មេងៗយល់ដឹងពីវិស័យបរិស្ថាននេះ គឺជាការផ្លាស់ប្តូរផ្នត់គំនិតរបស់ប្រជាជន”។
រូបសញ្ញាសម្គាល់ក្រសួងបរិស្ថាននេះ មានទំហំ៦០ គុណ ៨០ សង់ទីម៉ែត្រដែលជាការងារដោយដៃរបស់យុវសិស្សនៃវិទ្យាល័យឧត្តុងទាំងបួនដែលបានប្រើពេល៨ថ្ងៃបិទគ្រាប់សណ្តែក និងគ្រាប់អង្ករម្តងមួយៗឱ្យក្លាយទៅជារូបសញ្ញារបស់ក្រសួងបរិស្ថាន។ រូបនេះ បានប្រើប្រាស់សណ្តែកអង្គុយចំនួនៃ ០.៥ គីឡូ សណ្តែកក្រហម២០ក្រាម សណ្តែកបាយ១០ក្រាម សណ្តែកសៀង ៣០ ក្រាម សណ្តែកលឿង១០ ក្រាម និងអង្ករ១០ក្រាម៕
ព័ត៌មានបន្ថែម
ថ្ងៃ អង្គារ, 12 តុលា, 2021
ក្រសួងបរិស្ថានបានរៀបចំការប្រឡងជ្រើសរើសនិស្សិត ឱ្យចូលបម្រើការងារក្នុងក្របខណ្ឌក្រសួងបរិស្ថាន សម្រាប់ឆ្នាំ២០២១
ថ្ងៃ ចន្ទ, 11 តុលា, 2021
ចកវ៉កកម្ពុជា ឬចកវ៉កភ្នំក្រវាញ Cambodian Laughingthrush (Garrulax ferrarius)
