ពិធីដាំដើមឈើសាមគ្គីភាពរវាងយុវជនអាស៊ី-អឺរ៉ុប

ឯកឧត្តម សុខ សូកេន រដ្ឋលេខាធិការក្រសួងការបរទេស និងសហប្រតិបត្តការអន្តរជាតិ និងជាប្រធានក្រុមការងារអន្តរក្រសួង-ស្ថាប័នរៀបចំកិច្ចប្រជុំកំពូលថ្នាក់ដឹកនាំវៃក្មេងនៃមូលនិធិអាស៊ី-អឺរ៉ុបលើកទី៤ បានរាយការណ៍សង្ខេបអំពីសាវតារ និងគោលបំណងនៃពិធីដាំដើមឈើសាមគ្គីភាពយុវជនអាស៊ី-អឺរ៉ុបដែលជាព្រឹត្តិការណ៍អម កិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុបលើកទី៤ ដឹកនាំដោយប្រទេសកម្ពុជាដែលនឹងត្រូវប្រព្រឹត្តិទៅតាមប្រព័ន្ធអនឡាញ ចាប់ពីថ្ងៃទី២២ ដល់ថ្ងៃទី២៦ ខែវិច្ឆិកា ឆ្នាំ២០២១ ក្រោមប្រធានបទ «ការអភិវឌ្ឍប្រកបដោយចីរភាពនៅក្នុងពិភពលោកក្រោយវិបត្តិកូវីដ-១៩» ផ្តោតលើ ១) សុខភាព និងសុខុមាលភាពមាំមួន (SDG3) ២) ការអប់រំប្រកបដោយគុណភាព (SDG4) ៣) ការងារសមរម្យ និងកំណើនសេដ្ឋកិច្ច (SDG8) និង៤) សកម្មភាពអាកាសធាតុ (SDG13)។ ឯកឧត្តមសង្កត់ធ្ងន់ថា ពិធីដាំដើមឈើថ្ងៃនេះ គឺជាសក្ខីភាពមួយបង្ហាញពីកិច្ចខិតខំប្រឹងប្រែងរបស់កម្ពុជាក្នុងការរួមចំណែកដល់ការសម្រេចបាននូវផែនការការអភិវឌ្ឍប្រកបដោយនិរន្តរភាព (SDGs) ជាពិសេស SDG13 តាមរយៈការលើកទឹកចិត្តឱ្យមានការចូលរួមពីគ្រប់ភាគីពាក់ព័ន្ធ ជាពិសេសយុវជនទាំងកម្រិតជាតិ និងអន្តរជាតិក្នុងការស្តារធនធានធម្មជាតិ ការគ្រប់គ្រងបរិស្ថានដើម្បីឆ្លើយតបនឹងការប្រែប្រួលអាកាសធាតុឱ្យកាន់តែមានប្រសិទ្ធភាព ក្នុងការចូលរួមលើកកម្ពស់ជីវភាព និងសុខុមាលភាពប្រជាជន។

ថ្លែងក្នុងសុន្ទរកថាបើក ឯកឧត្តម ហ៊ុន ម៉ានី បានលើកឡើងថា «ការប្រយុទ្ធប្រឆាំងនឹងជំងឺកូវីដ១៩ និងការប្រែប្រួសអាកាសធាតុជាបញ្ហាសាកលដែលទាមទារឱ្យមានការចូលរួមដោះស្រាយរួមគ្នា និងជាពិសេសការចូលរួមពីសំណាក់យុវជន»។ ឯកឧត្តមបានវាយតម្លៃខ្ពស់ចំពោះគណៈកម្មាធិការរៀបចំកិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុបលើកទី៤ ដឹកនាំដោយ ឯកឧត្ដម សុខ សូកេន និងក្រុមការងារទាំងអស់ ដែលបានយកចិត្តទុកដាក់រៀបចំពិធីដ៏មានអត្ថន័យនេះឡើង ក្នុងស្មារតីរឹតចំណងការទូតជាលក្ខណៈអន្តរជាតិបន្ថែមទៀត និងជាសកម្មភាពប្រកបដោយការយកចិត្តទុកដាក់លើការប្រែប្រួលអាកាសធាតុជាសកល ពីសំណាក់ថ្នាក់ដឹកនាំយុវជនកម្ពុជា និងអន្តរជាតិ។ ឯកឧត្ដម បានបង្ហាញពីមោទនភាពដែលប្រជាជនកម្ពុជា និងជាពិសេសយុវជននៅទូទាំងតំបន់អាស៊ី និងអឺរ៉ុបអាចចូលរួមជាមួយគំនិតផ្តួចផ្តើមនេះនិងរួមគ្នាទទួលខុសត្រូវជាមួយមហិច្ឆតាក្នុងការសម្រេចឱ្យបាននូវការអភិវឌ្ឍប្រកបដោយចីរភាព ដែលជាដំណោះស្រាយឆ្លើយតបនឹងបញ្ហាបរិស្ថាននិងការប្រែប្រួលអាកាសធាតុពិភពលោក។ ឯកឧត្តមក៏បានលើកឡើងពីសេចក្តីថ្លែងការរបស់ ឯកឧត្ដម សាយ សំអាល់ រដ្ឋមន្រ្តីនៃក្រសួងបរិស្ថានអំពីជំហររបស់កម្ពុជាក្នុងការដោះស្រាយនឹងការប្រែប្រួលអាកាសធាតុនៅក្នុងកិច្ចប្រជុំកំពូលលើកទី២៦នៃបណ្តាភាគីអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុនៅទីក្រុងក្លាសហ្កូ ចក្រភពអង់គ្លេសកាលពីសប្តាហ៌មុននេះផងដែរ។

ឯកឧត្តមបានសង្កត់ធ្ងន់ថា បញ្ហាជំងឺកូវីដ-១៩ និងការប្រែប្រួលអាកាសធាតុជាបញ្ហាសកលដែលយើងមិនអាចមើលរំលងបានឡើយ ហើយព្រឹត្តិការណ៍ដាំកូនឈើនាពេលនេះមិនត្រឹមតែឆ្លុះបញ្ចាំង អំពីការគោរពរបស់យើងចំពោះបរិស្ថានធម្មជាតិ និងការយល់ដឹងអំពីបរិស្ថានប៉ុណ្ណោះទេ ប៉ុន្តែវាក៏ជានិមិត្តរូបនៃភាពជឿជាក់លើពហុភាគីនិយម និងការរីកចម្រើនរួមគ្នា ក្រោមការប្ដេជ្ញាចិត្តយ៉ាងមុតមាំក្នុងការចូលរួមជាមួយយុវជននៅទូទាំងពិភពលោក ទាំងក្នុងក្របខ័ណ្ឌក្រុមគ្រួសារនៃសហភាពសហព័ន្ធយុវជនកម្ពុជា និងក្រុមប្រឹក្សាយុវជនអាស៊ី។ ដើមឈើដែលយើងរួមគ្នាដាំនៅថ្ងៃនេះនឹងក្លាយជានិមិត្តរូបនៃសាមគ្គីភាព ប្រកបដោយ ការអត់ធ្មត់ ស្ថេរភាព និងសេចក្តីថ្លៃថ្នូរ ព្រមទាំងអាចផ្សាភ្ជាប់មេដឹកនាំវ័យក្មេងនៃតំបន់ទាំងពីរ ឱ្យបន្តមានការពិភាក្សាអំពីចក្ខុវិស័យរួមគ្នា ដើម្បីរួមចំណែកដល់ការអភិវឌ្ឍប្រកបដោយចីរភាព សម្រាប់អនាគតរបស់ប្រជាជាតិក្នុងតំបន់ទាំងពីរ។