នៅថ្ងៃទី២៤-២៦ ខែកញ្ញា ឆ្នាំ២០២០ ឯកឧត្តម ប្រាក់ ថាវអមិដា អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព និងលោក អ៊ូ ច័ន្ទធារិទ្ធ ប្រធាននាយកដ្ឋានវិទ្យាសាស្ត្រ និងបច្ចេកវិទ្យា បានចូលរួមកិច្ចប្រជុំកំពូលលើកទី៨ តាមប្រព័ន្ធឡាញ ស្តីពីការជំរុញយានយន្តអគ្គីសនីរបស់ប្រទេសហ្វីលីពីន (The 8th Philippine Electric Vehicle Virtual Summit)។ កិច្ចប្រជុំកំពូលនេះ មានគោលបំណងបង្ហាញពីកាលានុវត្តភាព និងបញ្ហាប្រឈមលើចង្វាក់ផលិតកម្ម និងតម្រូវការទីផ្សាររបស់ឧស្សាហកម្មយានយន្តអគ្គីសនី ក្នុងស្ថានភាពនៃការរីករាលដាលជំងឺកូវីត-១៩ ដើម្បីជំរុញការផ្លាស់ប្តូរឥរិយាបទរបស់អតិថិជនចំពោះយានយន្តអគ្គីសនី ក្នុងបរិបទថ្មី។

កិច្ចប្រជុំកំពូលលើកទី៨នេះ ត្រូវបានផ្តល់កិត្តិយសនិងចូលរួមបើកជាផ្លូវការដោយប្រធានគណកម្មការថាមពល របស់ព្រឹទ្ធសភាហ្វីលីពីន ថ្នាក់ដឹកនាំផ្នែកថាមពល ផ្នែកគមនាគមន៍ និងផ្នែកពាណិជ្ជកម្មនិងឧស្សាហកម្ម និងអនុប្រធានក្រុមហ៊ុនអេឡិកត្រូនិកម៉ានីឡា និងបានផ្តោតលើប្រធានបទមួយចំនួន ដែលរួមមាន៖

ទី១. ទស្សនៈវិស័យឆ្នាំ២០២០ ចំពោះអនាគតឧស្សាហកម្មយានយន្តថាមពលអគ្គីសនី (2020 Long-Term Electric Vehicle Outlook) តាមរយៈបទពិសោធន៍របស់ប្រទេសម៉ាឡេស៊ី ហ្វីលីពីន សាំងហ្គាពួរ ថៃ ចិន និងអូស្ត្រាលី ជាដើម។

ទី២. ការរៀបចំហេដ្ឋារចនាសម្ព័ន្ធសម្រាប់សាកអាគុយ (Developing Public Charging Infrastructure in Response to the New Normal)

ទី៣. បញ្ហាប្រឈមចំពោះប្រព័ន្ធ/ ទីតាំងផ្តល់សេវាកម្មសាកអាគុយយានយន្តអគ្គីសនី នៅតំបន់អាស៊ីអាគ្នេយ៍ (Challenges to EV Charging in Southeast Asia) ដែលជាបទពិសោធន៍ របស់ប្រទេសម៉ាឡេស៊ី ហ្វីលីពីន សាំងហ្គាពួរ និងថៃ

ទី៤. ការស្តារ ដំណើការឡើងវិញ និងតួនាទីឧស្សាហកម្មយានយន្តអគ្គីសនីក្នុងបរិបទនៃគន្លងថ្មី (Recovery, Reopening and Role of EVs under the New Normal)

ទី៥. វិធានការគោលនយោបាយ ចំពោះការលើកកម្ពស់ឧស្សាហកម្មយានយន្តអគ្គីសនី ក្រោយដំណាក់កាលរាតត្បាតដោយជំងឺកូវីត-១៩ (Policy Measures to See More EVs on the Ground Post Pandemic

ទី៦. ការជំរុញការបញ្ចេញកាបូនទាបក្នុងវិស័យគមនាគមន៍របស់ប្រទេសហ្វីលីពីន(Promotion of Low Carbon Urban Transport in the Philippines)

ទី៧. កិច្ចសន្ទនាកំរិតនយោបាយពាក់ព័ន្ធនឹងវិស័យគមនាគមន៍ផ្លូវគោក(Policy Dialogue with LTO: Revisiting EV Guidelines)។

ក្នុងកិច្ចប្រជុំកំពូលនេះដែរ សមាគមយានយន្តប្រើថាមពលអគ្គីសនីហ្វីលីពីនបានប្រមូលផ្តុំភាគីពាក់ព័ន្ធគ្រប់កំរិត ដែលរួមមាន ស្ថាប័នកំណត់គោលនយោបាយ រៀបចំលិខិតបទដ្ឋានគតិយុត្ត អ្នកស្រាវជ្រាវ អ្នកជំនាញបច្ចេកទេស ក្រុមហ៊ុនដឹកជញ្ជូន និងអតិថិជន ដើម្បីប្រមូលផ្តុំមតិនិងយោបល់ ក៏ដូចជាការចែករំលែកនូវបទពិសោធន៍ទាំងការផលិតនិងប្រើប្រាស់ ដែលរួមមាន៖

– ការសិក្សាស្វែងយល់អំពីបទប្បញ្ញត្តិសម្រាប់ប្រតិបត្តិករ និងការលើកទឹកចិត្តដល់អ្នក ប្រើប្រាស់

– ព័ត៌មានការវិវត្តបច្ចេកវិទ្យា និងបទពិសោធន៍នៃការផលិតនិងដាក់ឱ្យប្រើប្រាស់យានយន្តប្រើប្រាស់ថាមពលអគ្គីសនី ដូចជា Nissan, Tesla, DOE ADB e-trike project…

– ការផលិតអាគុយផ្ទុកថាមពលអគ្គីសនី (បទពិសោធន៍របស់ប្រទេសចិន…)

– ការរៀបចំទីតាំងផ្តល់សេវាកម្មសាកអាគុយ និងការកែសម្រួលប្រព័ន្ធសាក

– ការសិក្សាស្រាវជ្រាវនិងអភិវឌ្ឍបច្ចេកវិទ្យាផ្នែកថាមពល ជាដើម។

សូមបញ្ជាក់ជូនថា ក្នុងការលើកម្ពស់យានយន្តអគ្គីសនីនៅកម្ពូជា កន្លងមកនាយកដ្ឋានវិទ្យាសាស្ត្រនិងបច្ចេកវិទ្យាដោយមានកិច្ចសហការនិងគាំទ្រពី GGGI បាននិងកំពុងសិក្សារៀបចំគម្រោងស្តីពីការយកចិត្តទុកដាក់លើមធ្យោបាយធ្វើដំណើ តាមរយៈការជំរុញការប្រើប្រាស់ទោចក្រយានយន្តអគ្គីសនីនៅកម្ពុជា (Promoting Green Mobility through Electric Motocycles) ក្នុងគោលបំណងជំរុញការកែទម្លាប់អតិថិជនមកប្រើប្រាស់យានយន្តដែលប្រើប្រាស់ថាពលអគ្គីសនី។ បច្ចុប្បន្ននេះ គម្រោងកំពុងតែសិក្សាអំពីផលប្រយោជន៍ចំពោះសេដ្ឋកិច្ច សង្គម និងបរិស្ថានចំពោះការប្រើប្រាស់យានយន្តថាមពលអគ្គីសនី ធៀបជាមួយការប្រើប្រាស់ឥន្ទនៈទូទៅ ព្រមទាំងពិនិត្យមើលលិខិតបទដ្ឋានគតិយុត្តដែលមានជាធរមានក្នុងការជួយលើកកម្ពស់ការប្រើប្រាស់។

ព័ត៌មានបន្ថែម

សិស្សានុសិស្សសាលាបឋមសិក្សាថ្នល់កែងថ្លែងអំណរគុណជូនចំពោះឯកឧត្តមបណ្ឌិត អ៊ាង សុផល្លែត និងលោកជំទាវ ជា សុផាកន្នី
ថ្ងៃ អង្គារ, 19 មិនា, 2024 សិស្សានុសិស្សសាលាបឋមសិក្សាថ្នល់កែងថ្លែងអំណរគុណជូនចំពោះឯកឧត្តមបណ្ឌិត អ៊ាង សុផល្លែត និងលោកជំទាវ ជា សុផាកន្នី
រយៈពេល៥ថ្ងៃ សមត្ថកិច្ចបានឃ្លុំដីទំហំជិត៤ពាន់ហិកតា និងបញ្ជូនជនសង្ស័យ១នាក់ទៅតុលាការ
ថ្ងៃ ចន្ទ, 18 មិនា, 2024 រយៈពេល៥ថ្ងៃ សមត្ថកិច្ចបានឃ្លុំដីទំហំជិត៤ពាន់ហិកតា និងបញ្ជូនជនសង្ស័យ១នាក់ទៅតុលាការ
មន្រ្តីជាន់ខ្ពស់ក្រសួងបរិស្ថានបន្តចុះផ្សព្វផ្សាយយុទ្ធសាស្រ្តរបស់រាជរដ្ឋាក្នុងការគ្រប់គ្រងធនធានធម្មជាតិ នៅក្នុងភូមិសាស្រ្តខេត្តពោធិ៍សាត់
ថ្ងៃ ចន្ទ, 18 មិនា, 2024 មន្រ្តីជាន់ខ្ពស់ក្រសួងបរិស្ថានបន្តចុះផ្សព្វផ្សាយយុទ្ធសាស្រ្តរបស់រាជរដ្ឋាក្នុងការគ្រប់គ្រងធនធានធម្មជាតិ នៅក្នុងភូមិសាស្រ្តខេត្តពោធិ៍សាត់