ព្រះវិហារ ៖ ក្រុមការងារជួយសហគមន៍ការពារធម្មជាតិរបស់ក្រសួងបរិស្ថាន ដឹកនាំដោយលោកជំទាវ ម៉ុម ថានី រដ្ឋលេខាធិការក្រសួងបរិស្ថាន និងជាប្រធានក្រុមការងារ អមដំណើរដោយឯកឧត្តម ខៀវ បូរិន អគ្គនាយកនៃអគ្គនាយកដ្ឋានសហគមន៍មូលដ្ឋាន រួមជាមួយ ថ្នាក់ដឹកនាំ និងមន្រ្តីជំនាញក្រសួងបរិស្ថានមួយចំនួនទៀត នៅថ្ងៃទី១០ ខែកញ្ញា ឆ្នាំ២០២០ បានបន្តចុះពិនិត្យពីតម្រូវការនិងការប្រឈមជាក់ស្តែងរបស់សហគមន៍តំបន់ការពារធម្មជាតិភ្នំត្នោត-ភ្នំពក នៅក្នុងភូមិសាស្រ្តដែនជម្រកសត្វព្រៃភ្នំត្នោត-ភ្នំពក ក្នុងស្រុកសង្គមថ្មី ខេត្តព្រះវិហារ ដើម្បីលើកកម្ពស់ជីវភាពសហគមន៍ក្នុងពេលមានវិបត្តិកូវីដ-១៩។
លោក ពៅ យ៉ាក ប្រធានគណៈកម្មាធិការសហគមន៍តំបន់ការពារធម្មជាតិភ្នំត្នោត-ភ្នំពក បានឱ្យដឹងថា សហគមន៍បច្ចុប្បន្នមានបញ្ហាប្រឈមនៅក្នុងការអភិវឌ្ឍជីវភាព ដោយសមាជិកភាគច្រើនជាអ្នកធ្វើស្រែចំការ ប្រកបរបរចិញ្ចឹមជីវិត។ ប៉ុន្តែកន្លងមក សហគមន៍មានបញ្ហាប្រឈម និងតម្រូវការជាអាទិភាពគឺ ១). ទឹកប្រើប្រាស់ ២).មិនទាន់មានការកំណត់ព្រំច្បាស់លាស់នៃតំបន់ស្នូល និងតំបន់អភិវឌ្ឍន៍ដោយចីរភាព និង៣).ទីផ្សារកសិកម្មមិនមានស្ថេរភាព។ ដោយឡែក សហគមន៍មានបំណងឱ្យសមាជិកមានចំណូលបន្ថែមពីការងារកសិកម្ម ដែលក្នុងនោះសហគមន៍បានលើកឡើងពីសក្តានុពលធម្មជាតិនៅក្នុងដែនគ្រប់គ្រងព្រៃឈើសហគមន៍ទំហំចំនួន៦៤៤៣ហិកតា មានទីតាំងវប្បធម៌ ប្រាសាទបុរាណ ព្រៃឈើ និងសត្វព្រៃជាច្រើន សម្រាប់បម្រើឱ្យវិស័យទេសចរណ៍ធម្មជាតិ។ លោក ពៅ យ៉ាក បានបន្ថែមថា សហគមន៍នៅខ្វះមធ្យោបាយ និងបច្ចេកទេសសម្រាប់ពង្រឹងផ្នែកទេសចរណ៍ធម្មជាតិ ក៏ដូចជាវិស័យទឹកស្អាតប្រើប្រាស់ក្នុងមូលដ្ឋាន។
ក្នុងឪកាសនេះ ក្រុមការងារបានផ្តួចផ្តើមគំនិត និងលើកទឹកចិត្តអោយប្រជាពលរដ្ឋផ្លាស់ប្តូរការគិត ងាកមករកចំណូលលើការផ្តល់សេវាទេសចរណ៍ធម្មជាតិ តាមរយៈការកែច្នៃ និងចូលរួមការពារ អភិរក្សព្រៃឈើ និងសត្វព្រៃក្នុងតំបន់ និងការប្រកបរបស់កសិកម្មដោយមានផែនការច្បាស់លាស់។ ជាមួយគ្នានេះដែរ លោកជំទាវ ម៉ុម ថានី បានលើកឡើងពីគម្រោងដែលអាចចូលរួមលើកកម្ពស់សមត្ថភាពសហគមន៍ តាមរយៈការបណ្តុះបណ្តាលជំនាញវិជ្ជាជីវៈ បច្ចេកទេសកសិកម្ម និងការគាំទ្រជាសម្ភារៈចាំបាច់ សម្រាប់ការថែទាំសុខភាព អនាម័យបរិស្ថាន ការផ្តល់ជាអណ្តូងទឹកស្អាតជាដើម។ ជាមួយគ្នានេះ លោកជំទាវរដ្ឋលេខាធិការក្រសួងបរិស្ថាន បានគាំទ្រដល់សហគមន៍ដែលផ្តួចផ្តើមបង្កើតគម្រោងទេសចរណ៍ធម្មជាតិ ដើម្បីប្រជាពលរដ្ឋអាចទាញយកប្រយោជន៍ពីវិស័យនេះ និងជាការរួមចំណែកកាត់បន្ថយការដាក់សម្ពាធលើព្រៃឈើ។ លោកជំទាវ បានជំរុញអោយប្រជាពលរដ្ឋចូលរួម ការពារនិងអភិរក្សធនធានធម្មជាតិល្អគង់វង្ស សម្រាប់កូនចៅយើងជំនាន់ក្រោយ។
ក្រុមការងារជួយសហគមន៍តំបន់ការពារធម្មជាតិ កំពុងពិនិត្យនិងវាយតម្លៃលើបញ្ហាប្រឈមជាក់ស្តែងរបស់សហគមន៍តំបន់ការពារធម្មជាតិ ជាពិសេសក្នុងពេលប្រទេសកម្ពុជាក៏ដូចជាពិភពលោកប្រឈមនឹងជំងឺកូវីដ-១៩ ។ បន្ទាប់មកក្រុមការងារនេះលើកសំណើជូនឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន ដើម្បីសម្រេចលើការជួយជីវភាពប្រជាពលរដ្ឋនៅតាមសហគមន៍តំបន់ការពារធម្មជាតិ អោយមានភាពប្រសើរឡើងថែមទៀត។
សូមបញ្ជាក់ដែរថា ក្នុងឱកាសអញ្ជើញចុះពិនិត្យ និងវាយតម្លៃស្ថានភាពជីវភាពសហគមន៍តំបន់ការពារធម្មជាតិនៅខេត្តព្រះវិហារនៅថ្ងៃនេះ លោកជំទាវ ម៉ុម ថានី និងក្រុមការងារជួយសហគមន៍តំបន់ការពារធម្មជាតិ បានជួបសួរសុខទុក្ខ ក្រុមគ្រួសារ លោក បេន ដេវីស ដែលបានចូលរួមការពារ និងអភិរក្សធនធានធម្មជាតិ ជាមួយសហគមន៍តាបស ក្នុងដែនជម្រកសត្វព្រៃភ្នំត្នោត-ភ្នំពក ភូមិសាស្រ្តខេត្តព្រះវិហារផងដែរ៕

ព័ត៌មានបន្ថែម

កិច្ចពិភាក្សាអំពីកិច្ចសហការលើការងារគ្រប់គ្រងសំរាម សំណល់រឹង ជាមួយក្រុមហ៊ុន Infrastructure Asia (IA) និង Singapore Corporation Enterprise (SCE)
ថ្ងៃ ពុធ, 24 កុម្ភៈ, 2021 កិច្ចពិភាក្សាអំពីកិច្ចសហការលើការងារគ្រប់គ្រងសំរាម សំណល់រឹង ជាមួយក្រុមហ៊ុន Infrastructure Asia (IA) និង Singapore Corporation Enterprise (SCE)
ពិធីប្រគល់រង្វាន់ និងវិញ្ញាបនបត្រដល់ជ័យលាភី ការប្រកួតវីដេអូបែបអត្ថាធិប្បាយ
ថ្ងៃ អង្គារ, 23 កុម្ភៈ, 2021 ពិធីប្រគល់រង្វាន់ និងវិញ្ញាបនបត្រដល់ជ័យលាភី ការប្រកួតវីដេអូបែបអត្ថាធិប្បាយ
កិច្ចប្រជុំពិភាក្សាលើសេចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅរបស់ក្រសួងបរិស្ថាន
ថ្ងៃ អង្គារ, 23 កុម្ភៈ, 2021 កិច្ចប្រជុំពិភាក្សាលើសេចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅរបស់ក្រសួងបរិស្ថាន