រមណីយដ្ឋានថ្ងៃបាំងឆ័ត្រ ខេត្តកែប៖ ការរៀបចំសេដ្ឋកិច្ចចក្រាជាការចូលរួមចំណែកកិច្ចគាំពារបរិស្ថាន ការគ្រប់គ្រងសំណល់ និងការប្រើប្រាស់ធនធានប្រកបដោយប្រសិទ្ធភាព

គោលបំណងនៃកិច្ចប្រជុំនេះ​ រួមមាន៖ ១).​ពិភាក្សា និងស្វែងរកធាតុចូលសំខាន់ៗ ពីអ្នកជំនាញដើម្បីលើកសំណើសកម្មភាព និងពេលវេលាជាក់លាក់សម្រាប់អនុវត្តន៍សេដ្ឋកិច្ចចក្រា ២).ជំរុញការពិភាក្សាក្នុងការរៀបចំគម្រោងសាកល្បងសេដ្ឋកិច្ចចក្រាខ្នាតតូចសម្រាប់ខេត្តកែប ៣).ស្វែងយល់ពីការអនុវត្តន៍ល្អនៃសេដ្ឋកិច្ចចក្រារបស់សណ្ឋាគារ ទាក់ទងនឹងការមិនប្រើប្រាស់ប្លាស្ទីក និងការផលិតជីកំប៉ុស្ត និងការប្រើប្រាស់ឡើងវិញ ដើម្បីកាត់បន្ថយសំណល់។

ជាលទ្ធផលក្នុងរយៈពេលបីថ្ងៃនេះ កិច្ចប្រជុំទទួលបាននូវ ១).បទពិសោធន៍ក្នុ្ងងការអនុវត្តន៍ល្អការមិនប្រើប្រាស់ប្លាស្ទីក និងការផលិតជីកំប៉ុស្ត និងការប្រើ​ប្រាស់ឡើងវិញ ដើម្បីកាត់បន្ថយសំណល់ដែលស្របទៅបរិបទនៃសេដ្ឋកិច្ចចក្រា ២).ធាតុចូលសំខាន់ៗពីតំណាងថ្នាក់ជាតិ ថ្នាក់ក្រោមជាតិ និងតំណាងក្រុមហ៊ុនប្រមូលសំរាម សម្រាប់គាំទ្រដល់គោលបំណងយុទ្ធសាស្ត្រ និងសកម្មភាពជាក់លាក់នៃសេដ្ឋកិច្ចចក្រា ៣).កំណត់តួអង្គ និងដៃគូក្នុងការចូលរួមគាំទ្រអនុវត្តន៍សេដ្ឋកិច្ចចក្រា និង ៤).កំណត់ពេលវេលាជាក់លាក់សម្រាប់ប្រសិទ្ធភាពអនុវត្តន៍សេដ្ឋកិច្ចចក្រា។

លោកជំទាវ ងិន លីណា ក៏បានលើកឡើងនូវជំហ៊ានបន្ទាប់ នឹងធ្វើការកែសម្រួលឯកសារយុទ្ធសាស្រ្ត និងផែនការសកម្មភាពសេដ្ឋកិច្ចចក្រា និងក្របខ័ណ្ឌកាងារ ដើម្បីកំណត់គម្រោងអនុវត្តន៍ និងថវិកា ដោយភ្ជាប់ជាមួយសូចនាករ និងគោលដៅ មុននឹងឈានទៅការរៀបចំសិក្ខាសាលាពិគ្រោះយោបល់ជាមួយអន្តរក្រសួង និងដៃគូពាក់ព័ន្ធ៕