កិច្ចប្រជុំក្រុមការងារទំនាក់ទំនងផ្លាស់ប្តូរឥរិយាបថសង្គមទាក់ទងនឹងការអប់រំបរិស្ថាន

ឯកឧត្តម ជួប ប៉ារីស អគ្គនាយក នៃអគ្គនាយកដ្ឋានចំណេះដឹង និងព័ត៌មានបរិស្ថាន ក្រសួងបរិស្ថាន និង លោកស្រី ឡូរ៉ា ឈីស្មូន អនុប្រធាន ការិយាល័យសន្តិសុខស្បៀង និងបរិស្ថាន នៃ ទីភ្នាក់ងារជំនួយអាមេរិក USAID ប្រចាំកម្ពុជា កាលពីថ្ងៃអង្គារ ៣កើត ខែអាសាឍ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី២៣ ខែមិថុនា ឆ្នាំ២០២០ បានអញ្ជើញចូលរួមជាអធិបតីក្នុងកិច្ចប្រជុំក្រុមការងារទំនាក់ទំនងផ្លាស់ប្តូរឥរិយាបថសង្គម នៃគម្រោងអនាគតបៃតងកម្ពុជាUSAID លើកទី២ នាទីស្តីការក្រសួងបរិស្ថាន។ កិច្ចប្រជុំនេះ មានការចូលរួមពីសមាជិក មកពីពហុវិស័យដូចជា នាយកដ្ឋានអប់រំក្រៅប្រព័ន្ធ នៃក្រសួងអប់រំ យុវជន និងកីឡា អគ្គនាយកដ្ឋានទូរទស្សន៍ជាតិកម្ពុជា នៃក្រសួងព័ត៌មាន អង្គការដៃគូដែលបានទទួលមូលនិធិពីទីភ្នាក់ងារជំនួយអាមេរិកUSAID ផ្តោតលើការងារបរិស្ថាន អង្គការមិនមែនរដ្ឋាភិបាល និង វិស័យឯកជន។
កិច្ចប្រជុំ បានធ្វើបច្ចុប្បន្នភាពអំពី សមាសភាពសមាជិកក្រុមការងារ ការសិក្សាអំពីចំណេះដឹង ឥរិយាបថ និងការអនុវត្ត របាយការណ៍ពិនិត្យឡើងវិញលើឯកសារមានស្រាប់ របាយការណ៍ប្រព័ន្ធទិន្និន័យក្រុមគោលដៅ និងការធ្វើផែនទីដៃគូពាក់ព័ន្ធ និងបានបង្ហាញរបាយការណ៍បឋមនៃការតាមដានប្រព័ន្ធផ្សព្វផ្សាយ។
កិច្ចប្រជុំ បានប្រព្រឹត្តទៅដោយមានការចូលរួមផ្តល់យោបល់ពីសមាជិកលើប្រធានបទនីមួយៗ ជាពិសេសចំពោះការចូលរួមរបស់ភាគីពាក់ព័ន្ធទាំងអស់ក្នុងការសហការគ្នាលើកកំពស់ការយល់ដឹងឈានទៅរកការផ្លាស់ប្តូរឥរិយាបទនិងសកម្មភាពវិជ្ជមានឆ្ពោះទៅរកកិច្ចការពារបរិស្ថាន និងធនធានធម្មជាតិប្រកបដោយចីរភាព ។
សូមបញ្ជាក់ថា គម្រោងអនាគតបៃតងកម្ពុជាUSAID ដែលផ្តោតលើសកម្មភាពការងារអប់រំបរិស្ថាន មានរយៈពេល៥ឆ្នាំ (២០១៩-២០២៤) ដែលមានថវិកាសរុប ៥ លានដុល្លាសហរដ្ឋអាមេរិក អនុវត្តដោយ ក្រុមហ៊ុន ECODIT និង អង្គការ FHI 360។