ក្រសួងបរិស្ថាន ពិតជាមានការសោកស្តាយចំពោះទង្វើគ្មានការទទួលខុសត្រូវ និងភាពមិនយល់ដឹងអំពីរបៀបរបប និងនីតិវិធីនៃការបំពេញការងារ នៅក្នុងក្របខណ្ឌនៃការងាររដ្ឋបាលសាធារណៈរបស់ប្រធានប្រតិភូគណបក្សខ្មែរក្រោក ដឹកនាំដោយ ឯកឧត្តម សុខ សុវណ្ណវឌ្ឍនាសាប៊ុង សមាជិកឧត្តមក្រុមប្រឹក្សាពិគ្រោះ និងផ្តល់យោបល់ អំឡុងពេលចុះបំពេញបេសកកម្មនៅក្នុងតំបន់ឧទ្យានជាតិព្រះសីហនុ (រាម) ភូមិសាស្ត្រស្រុកព្រៃនប់ ខេត្តព្រះសីហនុ កាលពីថ្ងៃទី២ ខែឧសភា ឆ្នាំ២០២០។ ចរិតក្រអឺតក្រទម និងការប្រើប្រាស់ពាក្យសម្តីប្រមាថ មួលបង្កាច់ ចោទប្រកាន់ ដោយគ្មានមូលដ្ឋានភស្តុតាងច្បាស់លាស់របស់ប្រធានប្រតិភូគណបក្សខ្មែរក្រោក មកលើអាជ្ញាធរមូលដ្ឋាន និងមន្ត្រីមានសមត្ថកិច្ច គឺមិនសាកសមជាអ្នកមានសមត្ថកិច្ច និងជាដៃគូរាជរដ្ឋាភិបាល ចុះបំពេញបេសកកម្មនោះទេ។ ចំពោះមុខនៃការប្រមាថ និងការចោទប្រកាន់ដោយគ្មានភស្តុតាងរបស់​ ឯកឧត្តម សុខ សុវណ្ណវឌ្ឍនាសាប៊ុង ក្រសួងបរិស្ថាន សូមជម្រាបជូនសាធារណជនជាតិនិងអន្តរជាតិ បានជ្រាបថា៖

១-ក្រសួងបរិស្ថានបើកចំហរ និងតែងតែផ្តល់កិច្ចសហកាដល់សមាជិកឧត្តមក្រុមប្រឹក្សាពិគ្រោះ និងផ្តល់យោបល់ជានិច្ច ប៉ុន្តែស្នើសុំឱ្យប្រធានប្រតិភូគណបក្សខ្មែរក្រោក ស្វែងយល់អំពីបែបបទការងាររដ្ឋបាលសាធារណៈ និងនីតិវិធីច្បាប់ក្នុងការចុះបំពេញការងារ ដោយគួរជូនដំណឹង និងស្នើសុំកិច្ចសហការពីក្រសួងបរិស្ថាន ដែលជាស្ថាប័នជំនាញមានសមត្ថកិច្ច គ្រប់គ្រងលើឧទ្យានជាតិព្រះសីហនុ (រាម)។ ការដែលប្រធានគណបក្សនយោបាយមួយចុះបំពេញការងារដោយមិនដឹងទិសតំបន់បែបនេះ មិនបាននាំមកនូវផលប្រយោជន៍ដល់សង្គមជាតិឡើយ ប៉ុន្តែផ្ទុយទៅវិញ គឺបង្កើតនូវភាពអនាធិបតេយ្យ និងជាការលើកទឹកចិត្តដល់ជនល្មើសរុករានទន្ទ្រានកាន់កាប់ដីរដ្ឋដោយខុសច្បាប់ទៅវិញទេ។

២-ប្រធានប្រតិភូគណបក្សខ្មែរក្រោក ឯកឧត្តម សុខ សុវណ្ណវឌ្ឍនាសាប៊ុង បានផ្សាយព័ត៌មានមិនពិតនៅលើទំព័រទំនាក់ទំនងសង្គមរបស់ខ្លួនដោយបានប្រមាថ មួលបង្កាច់ ចោទប្រកាន់អាជ្ញាធរថា «បាន
ប្រើប្រាស់អំពើហិង្សា បង្ខាំងពលរដ្ឋពីចន្លោះ ៣០ ទៅ៥០នាក់ ជាពិសេសករណីនេះធ្លាប់មានពលរដ្ឋស្លាប់ដោយការបង្ខាំងនេះទៀតផង»។ ក្នុងនាមប្រធានគណបក្សនយោបាយមួយ ឯកឧត្តម គួរប្រុងប្រយ័ត្ននិងពិចារណាឱ្យបានល្អិតល្អន់ក្នុងការផ្សព្វផ្សាយព័ត៌មាន ហើយត្រូវជៀសវាងការផ្សព្វផ្សាយព័ត៌មានមិនពិតរបៀបនេះ ដែលអាចបង្ករផលវិបាកដល់សង្គម។ ក្រសួងបរិស្ថាន សូមបញ្ជាក់ថា គ្មានការប្រើប្រាស់ហិង្សា និងបង្ខាំងពលរដ្ឋដូចការលើកឡើងនោះឡើយ។

៣- ពលរដ្ឋដែលមកតវ៉ា ហើយដែលឯកឧត្តមចាត់ទុកជាជនរងគ្រោះនោះ គឺតាមពិតពួកគាត់ជាក្រុមជនទន្ទ្រានកាន់កាប់ដីធ្លីខុសច្បាប់ ដែលដីនៅតំបន់នោះ ត្រូវបានចុះបញ្ជីដីរដ្ឋរួចហើយ។ កាលឆ្នាំ២០១៦ រដ្ឋបាល​ខេត្តព្រះសីហនុ បានបង្កើតក្រុមការងារចម្រុះ ចុះវាស់វែង និងកំណត់អត្តសញ្ញាណក្បាលដីរបស់ប្រជាពលរដ្ឋ ដែលបាននឹងកំពុងរស់នៅ និងអាស្រ័យផលលើដីដែលមានផលប៉ះពាល់ក្នុងតំបន់វិនិយោគអភិវឌ្ឍន៍​របស់ក្រុមហ៊ុន អេវើហ្គ្រីន និងក្រុមហ៊ុន យិៈ ចៀ។ រាជរដ្ឋាភិបាល បានចេញអនុក្រឹត្យលេខ ២១៧ អនក្រ.បក ចុះថ្ងៃទី១៣ ខែធ្នូ ឆ្នាំ២០១៧ ស្ដីពីការកំណត់ជាតំបន់សហគមន៍នៃឧទ្យានជាតិព្រះសីហនុរាម លើផ្ទៃដីទំហំ ៦៦៧.៩៦ ហិកតា ស្ថិតក្នុងភូមិសាស្រ្តឃុំរាម ស្រុកព្រៃនប់ ខេត្តព្រះសីហនុ រួចរាល់ហើយ។ ដោយឡែក ​ការចូលមកទន្រ្ទានកាន់កាប់ដីព្រៃក្នុងឧទ្យានជាតិព្រះសីហនុ (រាម) ពីសំណាក់ក្រុមអនាធិបតេយ្យ គឺបានចូលមកនៅខែតុលា ឆ្នាំ២០១៨ ដោយក្រុមទាំងនោះបានបែងចែកជាតំបន់សម្រាប់ពួកគេទន្រ្ទានមានដូចជា៖ ចំណុចខាងលិចក្បាលព្រែកកោះខ្យង និងចំណុចតាបិន ហើយទីតាំងដែលក្រុមប្រជាពលរដ្ឋទាំងនេះចូលទន្រ្ទានកាន់កាប់នោះ ពុំស្ថិតក្នុងអនុក្រឹត្យលេខ ២១៧ អនក្រ.បក ចុះថ្ងៃទី១៣ ខែធ្នូ ឆ្នាំ២០១៧ ស្ដីពីការកំណត់ជាតំបន់សហគមន៍នៃឧទ្យានជាតិព្រះសីហនុ (រាម)ទេ។

៤-ដោយពិនិត្យឃើញមានចលនាចូលទន្រ្ទានកាន់កាប់ដីព្រៃរបស់ឧទ្យានជាតិព្រះសីហនុ (រាម) កាន់តែច្រើនឡើងៗ ការិយាល័យឧទ្យានជាតិព្រះសីហនុ (រាម) ក៏ដូចជាមន្ទីរបរិស្ថានខេត្តព្រះសីហនុ បានធ្វើសំណើតាមរយៈលិខិតលេខ ១៥៤/១៩ ឧពន.ខសន.បស្ថ ចុះថ្ងៃទី១២ ខែសីហា ឆ្នាំ២០១៩ ស្ដីពីសំណើសុំកម្លាំងគណៈបញ្ជាការឯកភាពខេត្តព្រះសីហនុ ដើម្បីចុះទប់ស្កាត់ និងរុះរើខ្ទមអនាធិបតេយ្យ នៅចំណុចខាងលិចក្បាលព្រែកកោះខ្យង និងចំណុចតាបិន ភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ នៅក្នុងតំបន់វិនិយោគអភិវឌ្ឍន៍របស់ក្រុមហ៊ុន អេវើហ្គ្រីន នៃឧទ្យានជាតិព្រះសីហនុរាម។ នៅថ្ងៃទី០២ ខែឧសភា ឆ្នាំ២០២០ ដោយពិនិត្យឃើញមានប្រជាពលរដ្ឋ បានមកប្រមូលផ្ដុំគ្នាប្រមាណជា ២០-៣០នាក់ នៅចំណុច​វាលចន្ទី ក្នុងតំបន់វិនិយោគអភិវឌ្ឍន៍ក្រុមហ៊ុន យិៈ ចៀ (ក្បែរព្រំប្រទល់តំបន់វិនិយោគអភិវឌ្ឍន៍ក្រុមហ៊ុន អេវើហ្រ្គីន) មន្ត្រីឧទ្យានុរក្ស សហការជាមួយកម្លាំងគណៈបញ្ជាការឯកភាពស្រុកព្រៃនប់ ដឹកនាំដោយលោក ព្រំ ប៊ុន្នី នាយករងរដ្ឋបាលសាលាស្រុក បានចុះធ្វើការអប់រំណែនាំពួកគាត់កុំឱ្យមានការប្រមូលផ្តុំគ្នា។ ក្នុងពេលនោះក្រុមការងារក៏បានពិនិត្យឃើញថា មានប្រជាពលរដ្ឋ ៣ នាក់ មានការជាប់ពាក់ព័ន្ធនឹងការទន្ទ្រានកាន់កាប់ដីធ្លី នៅលើទីតាំងដែលក្រុមការងារធ្លាប់បានចុះបង្រ្កាបទប់ស្កាត់កន្លងមក ហើយបានធ្វើការអញ្ជើញពលរដ្ឋទាំង ៣នាក់ (ប្រុស ១នាក់ និងស្រី ២នាក់) មកសាកសួរតាមនីតិវិធី។

៥-សកម្មភាពដែលប្រតិភូគណបក្សខ្មែរក្រោក ដឹកនាំដោយ ឯកឧត្តម សុខ សុវណ្ណវឌ្ឍនាសាប៊ុង បានធ្វើនៅក្នុងតំបន់ឧទ្យានជាតិព្រះសីហនុ (រាម) បានបង្ហាញយ៉ាងច្បាស់ថា ប្រតិភូគណបក្សនេះគ្មានបំណងពិតប្រាកដក្នុងការសហការជាមួយអាជ្ញាធរមូលដ្ឋាន និងស្ថាប័នមានសមត្ថកិច្ចនោះទេ ប៉ុន្តែប្រតិភូគណបក្សនេះ មានបំណងអុជអាល ប្រឆាំងនឹងមន្ត្រីអនុវត្តច្បាប់ ​និងព្យាយាមការពារជនល្មើស ដោយយកប្រជាពលរដ្ឋជាខែល។ ឯកឧត្តម សុខ សុវណ្ណវឌ្ឍនាសាប៊ុង គួរទទួលខុសត្រូវលើការផ្សព្វផ្សាយព័ត៌មានមិនពិតនៅលើទំព័រទំនាក់ទំនងសង្គម​របស់ខ្លួន ដែលបង្កឱ្យមានការប៉ះពាល់ដល់សង្គម និងការដឹកនាំរបស់រាជ
រដ្ឋាភិបាល តាមរយៈការដុតកំហឹងប្រជាពលរដ្ឋ និងចលនាឱ្យមានការស្អប់កម្លាំងសមត្ថកិច្ច។ ក្រសួងបរិស្ថានសង្ឃឹមថា ប្រតិភូគណបក្សខ្មែរក្រោកនិងជាពិសេស ឯកឧត្តម សុខ សុវណ្ណវឌ្ឍនាសាប៊ុង នឹងមានភាពចាស់ទុំ និងមានការយល់ដឹងអំពីបែបបទនិងនីតិវិធីច្បាប់ក្នុងការអនុវត្តតួនាទី និងភារកិច្ចរបស់ខ្លួន៕

ថ្ងៃអាទិត្យ ១២ កើត ខែពិសាខ ឆ្នាំជូត ទោស័ក ព.ស. ២៥៦៣
រាជធានីភ្នំពេញ ថ្ងៃទី៣ ខែឧសភា ឆ្នាំ ២០២០

  

ព័ត៌មានបន្ថែម

ក្រុមការងារលើកកម្ពស់ជីវភាពសហគមន៍តំបន់ការពារធម្មជាតិ បានពិនិត្យ និងពិភាក្សាលើតម្រូវការចាំបាច់សម្រាប់លើកកម្ពស់ជីវភាពសហគមន៍ក្នុងពេលមានវិបត្តិកូវីដ-១៩នៅខេត្តព្រះវិហារ
ថ្ងៃ ព្រហស្បតិ៍, 10 កញ្ញា, 2020 ក្រុមការងារលើកកម្ពស់ជីវភាពសហគមន៍តំបន់ការពារធម្មជាតិ បានពិនិត្យ និងពិភាក្សាលើតម្រូវការចាំបាច់សម្រាប់លើកកម្ពស់ជីវភាពសហគមន៍ក្នុងពេលមានវិបត្តិកូវីដ-១៩នៅខេត្តព្រះវិហារ
សារធាតុគីមីជាង១សែន៣ម៉ឺនប្រភេទ ត្រូវបានផលិត និងចរាចរណ៍នៅលើទីផ្សារពិភពលោក
ថ្ងៃ ព្រហស្បតិ៍, 10 កញ្ញា, 2020 សារធាតុគីមីជាង១សែន៣ម៉ឺនប្រភេទ ត្រូវបានផលិត និងចរាចរណ៍នៅលើទីផ្សារពិភពលោក
វេទិកាយុវជនជជែកពិភាក្សាអំពីបរិស្ថាន ឆ្នាំ២០២០ វគ្គប្រកួតដំបូង នៅខេត្តកំពង់ធំ
ថ្ងៃ ព្រហស្បតិ៍, 10 កញ្ញា, 2020 វេទិកាយុវជនជជែកពិភាក្សាអំពីបរិស្ថាន ឆ្នាំ២០២០ វគ្គប្រកួតដំបូង នៅខេត្តកំពង់ធំ