«យើងទាំងអស់គ្នាត្រូវរួមគ្នាការពារនិងថែរក្សាបេតិកភណ្ឌឱ្យបានគង់វង្ស និងចូលរួមថែរក្សាតំបន់រមណីយដ្ឋានឧទ្យានជាតិអង្គរ និងតំបន់ជុំវិញនេះឱ្យមានបរិស្ថានល្អស្អាត រមណីយដ្ឋានមិនមានការបំពុល ដោយប្លាស្ទិកស្របតាមពាក្យស្លោក «ទីក្រុងស្អាត រមណីយដ្ឋានស្អាត សេវាល្អ» ដើម្បីទាក់ទាញភ្ញៀវទេសចរឱ្យបានកាន់តែច្រើន។ នេះគឺជាការថ្លែងរបស់រដ្ឋលេខាធិការក្រសួងបរិស្ថាន ឯកឧត្តម នេត្រ ភក្ត្រានៅក្នុងពិធីសម្ពោធដាក់ឱ្យអនុវត្តគម្រោងថែរក្សាបរិស្ថាន ដែលត្រូវបានដាក់ឈ្មោះថា «គម្រោង អ(R)» និងចែកដបទឹកដល់សិស្សានុសិស្សនៅវិទ្យាល័យបន្ទាយស្រី ស្រុកបន្ទាយស្រី ខេត្តសៀមរាប ជាគម្រោងរបស់អង្គជឿជាក់លើសិស្សជនបទកម្ពុជា (CSRT) ដើម្បីកាត់បន្ថយការប្រើប្រាស់ដបទឹកប្លាស្ទិក កាលពីនារសៀលថ្ងៃទី២៩ ខែកុម្ភៈ ឆ្នាំ២០២០។

ឯកឧត្តម បានបញ្ជាក់ថា ការបដិសេធការប្រើប្រាស់ប្លាស្ទិកដូចជា ថង់យួរដៃ ដបទឹកបរិសុទ្ធ ជាដើមនេះ វាជួយធ្វើឱ្យបរិស្ថានស្អាត គ្មានការបំពុលដោយសំរាមប្លាស្ទិក ខណៈសំណល់ផ្នែកនេះត្រូវបានគេចាត់ទុកថាជាការបំពុលដល់បរិស្ថាន ដោយសារតែវាត្រូវការពេលវេលាជាច្រើនរយឆ្នាំដើម្បីធ្វើការបំបែកធាតុ ឬរលួយនៅលើផែនដី។
ឯកឧត្តម បន្តថា តំបន់រមណីយដ្ឋានអង្គរ គឺជាទីតាំងរមណីយដ្ឋានដ៏ល្បីល្បាញលើពិភពលោកដែលមានទេសចរគ្រប់ជាតិសាសន៍ចូលទៅទស្សនា ដែលការណ៍នេះទាមទារឱ្យយើងយកចិត្តទុកដាក់កាន់តែខ្ពស់ពីអនាម័យបរិស្ថាន បរិស្ថានស្អាត គ្មានការបំពុលដោយសំណល់ប្លាស្ទិក។ ឯកឧត្តមបានអំពាវនាវឱ្យគ្រប់ភាគីទាំងអស់ចូលរួមទាំងអស់គ្នាជាពិសេសប្រជាពលរដ្ឋដែលកំពង់រស់នៅក្នុងតំបន់ឧទ្យានជាតិ និងភ្ញៀវទេសចរទាំងអស់។ យើងត្រូវរួមសាមគ្គីគ្នាដើម្បីកម្ពុជាស្អាត។

ឯកឧត្តម នេត្រ ភក្ត្រា បានថ្លែងការក្រសួងបរិស្ថានសូមវាយតម្លៃខ្ពស់ចំពោះគម្រោងនិងសកម្មភាពរបស់អង្គការជឿជាក់លើសិស្សជនបទកម្ពុជា (CRST) ដែលបានផ្តួចផ្តើមគំនិតអនុវត្តគម្រោងការអប់រំអំពីប្លាស្ទិកក្នុងគោលបំណងផ្លាស់ប្តូរផ្នត់គំនិតប្រជាពល រដ្ឋលើទម្លាប់នៃការប្រើប្រាស់ប្លាស្ទិកដោយអនុវត្តតាមគោលការណ៍ ៤អ៊ែរ៖ កាត់បន្ថយការប្រើប្រាស់ ប្រើប្រាស់ឡើងវិញ កែច្នៃឡើងវិញ និងការបដិសេធប្រើប្រាស់ប្លាស្ទិក។ អង្គការនឹងចែកចាយដបទឹកចំនួន ៤០០០០ ដបជូនដល់ អនុវិទ្យាល័យ និងវិទ្យាល័យប្រមាណ ៥៦ នៅជុំវិញតីរួមខេត្តសៀមរាបក្នុងរយៈពេល ២ ឆ្នាំ។

ឯកឧត្តមរដ្ឋលេខាធិការក្រសួងបរិស្ថានបានគូសបញ្ជាក់ថា ការសហការចូលរួមរបស់អង្គការ CRST ក្នុងការបង្រៀនមេរៀនពីបរិស្ថានដល់សិស្សានុសិស្ស អំពីបរិស្ថាន ការកាត់បន្ថយប្លាស្ទិក ចែកដបទឹកបរិស្ថានសកម្មភាពនេះមានគោលបំណងដើម្បីបំផុសស្មារតី និងផ្លាស់ប្តូរឥរិយាបថប្រជាពលរដ្ឋអោយចេះស្រលាញ់ ថែរក្សា និងជាពិសេសធ្វើការសំអាតអនាម័យបរិស្ថាន កុំចោលសំរាមផ្តេសផ្តាស យកចិត្តទុកដាក់លើផាសុកភាព។

ព័ត៌មានបន្ថែម

កិច្ចប្រជុំស្តីពីការអនុវត្តវិធីសាស្រ្ត TEST និងការកាត់បន្ថយការប្រែប្រួលអាកាសធាតុនៃវិស័យឧស្សាហកម្ម
ថ្ងៃ សៅរ៍, 27 កុម្ភៈ, 2021 កិច្ចប្រជុំស្តីពីការអនុវត្តវិធីសាស្រ្ត TEST និងការកាត់បន្ថយការប្រែប្រួលអាកាសធាតុនៃវិស័យឧស្សាហកម្ម
តំបន់រ៉ាមសារខេត្តស្ទឹងត្រែង
ថ្ងៃ សៅរ៍, 27 កុម្ភៈ, 2021 តំបន់រ៉ាមសារខេត្តស្ទឹងត្រែង
កិច្ចប្រជុំពិនិត្យលើវឌ្ឍនភាពគម្រោង JCM-REDD+
ថ្ងៃ សៅរ៍, 27 កុម្ភៈ, 2021 កិច្ចប្រជុំពិនិត្យលើវឌ្ឍនភាពគម្រោង JCM-REDD+