កិច្ចពិភាក្សា​អំពី ជំហ៊ាន​បន្ទាប់ក្នុងការរៀបចំគម្រោងគ្រប់គ្រងសំណល់​រឹង​ និងប្លាស្ទិក

នារសៀលថ្ងៃសុក្រ ១០កើត ខែមិគសិរ ឆ្នាំកុរ ឯកស័ក ព.ស.​២៥៦៣ ត្រូវនឹងថ្ងៃទី៦ ខែធ្នូ ឆ្នាំ២០១៩ នៅទីស្តីការក្រសួងបរិស្ថាន ឯកឧត្តម សៅ សុភាព រដ្ឋលេខាធិការក្រសួងបរិស្ថាន បាន​ដឹកនាំក្រុមការងារជួបប្រជុំជាមួយក្រុមការងារធនាគារពិភពលោក​ ដើម្បីពិភាក្សា​អំពី ជំហ៊ាន​បន្ទាប់ក្នុងការរៀបចំគម្រោងគ្រប់គ្រងសំណល់​រឹង​ និងប្លាស្ទិក ដោយមានការអញ្ជើញចូលរួមពី លោកជំទាវអគ្គលេខាធិការរង នៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព ឯកឧត្តមអគ្គនាយក និងអគ្គនាយករងគាំពារ​បរិស្ថាន លោកប្រធាននាយកដ្ឋានគ្រប់គ្រងសំណល់រឹង និងសហការីធនាគារពិភពលោកសរុប ១០នាក់។ កិច្ចប្រជុំនេះមានគោលបំណង៖ (១). ពិភាក្សាអំពី​ការងារ​អាទិភាពនៃការរៀបចំគោលការណ៍ណែនាំ តួនាទី​ និងទំនួលខុសត្រូវរបស់ក្រសួងស្ថាប័ន​ពាក់ព័ន្ធសម្រាប់ការរៀបចំគម្រោងគ្រប់គ្រងសំណល់រឹង និងប្លាស្ទិក (២).បង្ហាញទិន្នន័យ និងលទ្ធផលបន្ទាប់ពីការចុះសិក្សាវាយតម្លៃ​ពាក់ព័ន្ធនឹងសំណល់ប្លាស្ទិក​ និង(៣).​ ពិភាក្សាលើ​លទ្ធភាពក្នុងការអភិវឌ្ឍគោលការណ៍បច្ចេកទេសក្នុងការគ្រប់គ្រងសំណល់ប្លាស្ទិក។