ទីស្តីការក្រសួងបរិស្ថាន នាយកដ្ឋានវិទ្យាសាស្រ្ត និងបច្ចេកវិទ្យា បានរៀបចំកិច្ចប្រជុំក្រុមការងារថ្នាក់ជាតិដើម្បីសម្របសម្រួលកិច្ចសហប្រតិបត្តិការក្នុង ការប្រើប្រាស់ថាមពលនុយក្លេអ៊ែរសម្រាប់បម្រើឱ្យគោលបំណងសន្តិភាព

នៅព្រឹកថ្ងៃទី១៤ ខែវិច្ឆិកា ឆ្នាំ២០១៩ នាទីស្តីការក្រសួងបរិស្ថាន នាយកដ្ឋានវិទ្យាសាស្រ្ត និងបច្ចេកវិទ្យា បានរៀបចំកិច្ចប្រជុំក្រុមការងារថ្នាក់ជាតិដើម្បីសម្របសម្រួលកិច្ចសហប្រតិបត្តិការក្នុង ការប្រើប្រាស់ថាមពលនុយក្លេអ៊ែរសម្រាប់បម្រើឱ្យគោលបំណងសន្តិភាព ក្រោមអធិបតីភាពឯកឧត្តម ទិន ពន្លក អគ្គលេខាធិការ ក.ជ.អ.ច. និងជាប្រធានក្រុមការងារថ្នាក់ជាតិ ដោយមានការចូលរួមពីឯកឧត្តម សុខ គាង អនុរដ្ឋលេខាធិការក្រសួងបរិស្ថាន និងជាអនុប្រធានក្រុមការងារថ្នាក់ជាតិ ព្រមទាំងតំណាងអន្តរក្រសួង សរុបចំនួន ២៥នាក់។

គោលបំណងនៃកិច្ចប្រជុំនេះ គឺពិនិត្យ និងពិភាក្សាលើវឌ្ឍនភាពការងារ និងលើកជាសំណូមពរ សម្រាប់ជាមូលដ្ឋានលើការត្រៀមពិភាក្សាលើសេចក្តីព្រាងកិច្ចព្រមព្រៀង អន្តររដ្ឋាភិបាលអំពីកិច្ចសហប្រតិបត្តិការក្នុងការសាងសង់មជ្ឈមណ្ឌលវិទ្យាសាស្រ្ត និងបច្ចេកវិទ្យានុយក្លេអ៊ែរ នៅលើទឹកដីព្រះរាជាណាចក្រកម្ពុជា ជាមួយភាគីរុស្សី និងសេចក្តីព្រាងអនុស្សរណៈយោគយល់ស្តីពី កិច្ចសហប្រតិបត្តិការអភិវឌ្ឍន៍ធនធានមនុស្ស នៅក្នុងវិស័យឧស្សាហកម្មនុយក្លេអ៊ែរជាមួយភាគីចិន។