សិក្ខាសាលា​ថ្នាក់​តំបន់​ស្តីពី​ «ការ​ធ្វើ​ឱ្យ​ប្រសើរឡើង​នូវ​កិច្ច​សហប្រតិបត្តិការ​ និង​ភាព​ស៊ី​សង្វាក់គ្នា​រវាង​អនុសញ្ញា​នានា​ពាក់ព័ន្ធ​នឹង​ជីវៈចម្រុះ​នៅ​ក្នុង​តំបន់​អាស៊ាន​ តាមរយៈ​ក្របខណ្ឌ​ការងារ​ស្តីពី​ជីវៈ​ចម្រុះ​សាកល​ក្រោយ​ឆ្នាំ​២០២០»

នា​ព្រឹក​ថ្ងៃ​ពុធ ១រោច ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៣ ខែ​វិច្ឆិកា ឆ្នាំ​២០១៩ ឯកឧត្តម អ៊ាង សុផល្លែត រដ្ឋលេខាធិការ​ក្រសួង​បរិស្ថាន បាន​អញ្ជើញ​ជា​អធិបតី​ក្នុង​ពិធី​បើក​សិក្ខាសាលា​ថ្នាក់​តំបន់​ស្តីពី​ «ការ​ធ្វើ​ឱ្យ​ប្រសើរឡើង​នូវ​កិច្ច​សហប្រតិបត្តិការ​ និង​ភាព​ស៊ី​សង្វាក់គ្នា​រវាង​អនុសញ្ញា​នានា​ពាក់ព័ន្ធ​នឹង​ជីវៈចម្រុះ​នៅ​ក្នុង​តំបន់​អាស៊ាន​ តាមរយៈ​ក្របខណ្ឌ​ការងារ​ស្តីពី​ជីវៈ​ចម្រុះ​សាកល​ក្រោយ​ឆ្នាំ​២០២០» នៅ​សណ្ឋាគារ​កាំបូឌីយ៉ាណា រាជធានី​ភ្នំពេញ។

សិក្ខា​សាលា​នេះ​រៀបចំ​ឡើង​ក្រោម​កិច្ច​សហការ​រវាង​អគ្គលេខាធិការដ្ឋាន​ក្រុម​ប្រឹក្សា​ជាតិ​អភិវឌ្ឍន៍​ដោយ​ចីរភាព​នៃ​ក្រសួង​បរិស្ថាន ​ជា​មួយ​កម្ម​វិធី​បរិស្ថាន​សហប្រជាជាតិ​(UNEP) មជ្ឈមណ្ឌល​ជីវៈ​ចម្រុះ​អាស៊ាន (ACB) ដោយ​មាន​ការ​ចូលរួម​ពី​សមាជិក​តំណាង​ប្រទេស​សមាជិក​អាស៊ាន​ លេខាធិការដ្ឋាន​អនុសញ្ញា​សហប្រជាជាតិ​ស្តីពី​ជីវៈចម្រុះ(CBD Secretariat) តំណាង​អន្តរ​ក្រសួង​នៃ​ប្រទេស​កម្ពុជា​ចំនួន​៧​ក្រសួង និង​អ្នក​ពាក់ព័ន្ធ​សរុប​ចំនួន​៤០​រូប ក្នុង​​គោលបំណង​ដើម្បី៖ ១)ពិភាក្សា​រៀបចំ​សេចក្ដី​ថ្លែង​ការណ៍​អាស៊ាន​សម្រាប់កិច្ច​ប្រជុំ​ SBSTTA 23 និង​ប្រមូល​ធាតុ​ចូល​សម្រាប់​សេចក្ដី​ថ្លែងការណ៍​រួម​របស់​អាស៊ាន​នា​កិច្ច​ប្រជុំ COP-CBD លើកទី១៥ និង២) កសាង​សមត្ថភាព​របស់ AMS ពាក់ព័ន្ធ​នឹង​ការ​ធ្វើ​សមាហរណកម្ម​អនុសញ្ញា​នានា​ដែល​ទាក់ទង​នឹង​ជីវៈចម្រុះ ដោយ​ផ្សារភ្ជាប់​ជា​មួយ​គោលដៅ​អភិវឌ្ឍន៍​ប្រកប​ដោយ​​ចីរភាព ការ​បញ្រ្ជាប​យេនឌ័រ និង​ការ​កំណត់​នូវ​ជម្រើស​ហិរញ្ញប្បទាន​ ដែល​នឹង​ត្រូវ​យក​ទៅ​ពិភាក្សា​នៅ​ក្នុង​កិច្ច​ប្រជុំ​ក្របខណ្ឌ​ការងារជីវៈចម្រុះសកលក្រោយឆ្នាំ២០២០​ (Post-2020 GBF)។

ក្នុង​ឱកាស​នោះ​ផង​ដែរ​ឯកឧត្ដម​រដ្ឋលេខាធិការ​បាន​លើក​ឡើង​អំពី​បច្ចុប្បន្នភាព​នៃ​ការងារ​ជីវៈចម្រុះ​កម្ពុជា​ ដោយ​កម្ពុជា​យើង​បាន​បង្កើត​ក្រុម​ការងារ​បច្ចេកទេស​ជីវៈចម្រុះ​សម្រាប់​សម្របសម្រួល​រៀបចំ និង​ជំរុញ​ការ​អនុវត្ត​យុទ្ធសាស្ត្រ និង​ផែនការ​សកម្មភាព​ជាតិ​ស្តីពី​ជីវៈចម្រុះ (NBSAP)។ សូម​បញ្ជាក់​ផង​ដែរ​ថា​ យុទ្ធសាស្ត្រ និង​ផែនការ​សកម្មភាព​ជាតិ​ស្តីពី​ជីវៈចម្រុះ​របស់​កម្ពុជា​ត្រូវ​បាន​រៀបចំ​ឡើង​លើក​ទី​១​នៅ​ឆ្នាំ​២០០២ និង​ធ្វើ​បច្ចុប្បន្ន​ភាព​នៅ​ឆ្នាំ២​០១៦៕

ព័ត៌មានបន្ថែម

មន្ទីរបរិស្ថាន​ខេត្ត​រតនគិរី​៖​ កូនដំរី​ ០១ក្បាល​ បានងាប់នៅក្នុងទឹកអូរលាវ
ថ្ងៃ ពុធ, 15 មករា, 2020 មន្ទីរបរិស្ថាន​ខេត្ត​រតនគិរី​៖​ កូនដំរី​ ០១ក្បាល​ បានងាប់នៅក្នុងទឹកអូរលាវ
ឯកឧត្តម សាយ សំអាល់ អញ្ជើញជួបពិភាក្សាការងារជាមួយឯកអគ្គរាជទូតម៉ាឡេស៊ីប្រចាំកម្ពុជា
ថ្ងៃ អង្គារ, 14 មករា, 2020 ឯកឧត្តម សាយ សំអាល់ អញ្ជើញជួបពិភាក្សាការងារជាមួយឯកអគ្គរាជទូតម៉ាឡេស៊ីប្រចាំកម្ពុជា
ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថានបានចូលរួមជាអធិបតីកម្មវិធីស្រឡាញ់បរិស្ថានរៀបចំឡើងដោយក្រុមនិស្សិតស្ម័គ្រចិត្តមកពីប្រទេសកូរ៉េខាងត្បូង និងសិស្សានុសិស្សនៅសាលាបឋមសិក្សាព្រែកព្នៅ
ថ្ងៃ ចន្ទ, 13 មករា, 2020 ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថានបានចូលរួមជាអធិបតីកម្មវិធីស្រឡាញ់បរិស្ថានរៀបចំឡើងដោយក្រុមនិស្សិតស្ម័គ្រចិត្តមកពីប្រទេសកូរ៉េខាងត្បូង និងសិស្សានុសិស្សនៅសាលាបឋមសិក្សាព្រែកព្នៅ