ការអភិវឌ្ឍសហគមន៍មូលដ្ឋាន ចូលរួមលើកកម្ពស់ជីវភាពសហគមន៍មូលដ្ឋាននិងសហគមន៍តំបន់ការពារធម្មជាតិ

ការអភិវឌ្ឍសហគមន៍មូលដ្ឋាន បានបង្ហាញជាការងារអាទិភាពមួយនៅក្នុងសន្និបាតបូកសរុបការងារក្នុងវិស័យបរិស្ថាន ឆ្នាំ២០១៩ និងលើកទិសដៅការងារឆ្នាំ២០២០ ដែលបានប្រព្រឹត្តទៅនៅក្នុងថ្ងៃទី០៤ ខែវិច្ឆិការឆ្នាំ២០១៩ នៅទីស្តីការក្រសួងបរិស្ថាន ក្រោមអធិបតីភាព ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន និងមានការចូលរួមពីថ្នាក់ដឹកនាំ មន្រ្តីរាជការ ក្រសួងបរិស្ថាន តំណាងក្រសួង ស្ថាប័ន ពាក់ព័ន្ធ ដៃគូអភិវឌ្ឍន៍ ជាច្រើននាក់។ ឯកឧត្តម ខៀវ បូរិន អគ្គនាយក អគ្គនាយកដ្ឋានសហគមន៍មូលដ្ឋាន បានឱ្យដឹងថាអគ្គនាយកដ្ឋានសហគមន៍មូលដ្ឋាន ជាសេនាធិការរបស់ ក្រសួងបរិស្ថាន ដើម្បីលើកកម្ពស់ជីវភាពសហគមន៍មូលដ្ឋាននិងសហគមន៍តំបន់ការពារធម្មជាតិ។ ក្នុងឆ្នាំ២០១៩ កន្លងមក ក្រសួងបានខិតខំអនុវត្តបានជោគជ័យលើការងារអាទិភាពដូចខាងក្រោម៖
បានរៀបចំបង្កើតសហគមន៍តំបន់ការពារធម្មជាតិបាន ១៦៨សហគមន៍ មានប្រជាពលរដ្ឋចូលរួម ចំនួន ៤៥ ២៦៧ គ្រួសារ និងមានផ្ទៃដីសរុបចំនួន ២៨៦ ០៥២ហិកតា ស្មើនឹង ៤%នៃផ្ទៃដីសរុបនៃតំបន់ការពារធម្មជាតិនៃព្រះរាជាណាចក្រកម្ពុជា និងរៀបចំបង្កើតរចនាសម្ព័ន្ធគ្រប់គ្រងសហគមន៍ជាបណ្តាញ រួមមានបណ្តាញសហគមន៍មូលដ្ឋាន (សម្រាប់តំបន់ការពារធម្មជាតិ) បណ្តាញសហគមន៍ថ្នាក់តំបន់ (សម្រាប់តំបន់ខាងជើង និងខាងត្បូងបឹងទន្លេសាប និងខាងកើតទន្លេមេគង្គ) និងបណ្តាញសហគមន៍ថ្នាក់ជាតិ
បាននិងកំពុងគ្រប់គ្រងគម្រោងអភិវឌ្ឍន៍ទេសចរណ៍ធម្មជាតិ កសិ-ទេសចរណ៍ តំបន់សេដ្ឋកិច្ចពិសេស និងគម្រោងអភិរក្សព្រៃឈើ និងសត្វព្រៃសរុបចំនួន ១៨គម្រោង មានផ្ទៃដីសរុប ៩១.៣០០ហ.ត ក្នុងនោះ ៥គម្រោងបានដំណើរការល្អប្រសើរ ហើយ ១៣គម្រោងទៀត កំពុងបន្តអនុវត្តនីតិវិធី តាមគោលការណ៍ណែនាំរបស់រាជរដ្ឋាភិបាល និងក្រសួងបរិស្ថាន
បាននិងកំពុងគ្រប់គ្រងគម្រោងវិនិយោគអភិវឌ្ឍន៍ទេសចរណ៍ធម្មជាតិខ្នាតតូច (ក្រោម១០ហិកតា) ចំនួន១១៥គម្រោង មានផ្ទៃដីសរុបទំហំ ១០៧.៧៧៦ហ.ត ក្នុងនោះ៧៦គម្រោង បានបោះបង្គោលព្រំប្រទល់រួចរាល់ ហើយ៨គម្រោងទៀតបានរៀបចំប្លង់មេរួចហើយ
បានរៀបចំវេទិកាថ្នាក់តំបន់ស្តីពី «ការការពារនិងអភិរក្សធនធានធម្មជាតិ» ចំនួន២លើក ក្រោមប្រធានបទផ្សេងៗគ្នា ដើម្បីបន្តប្រមូលព័ត៌មាន ពិភាក្សា និងរកដំណោះស្រាយ ពាក់ព័ន្ធនឹងកិច្ចការពារ និងអភិរក្សធនធានធម្មជាតិ
បានចងក្រងឯកសារ និងទិន្នន័យស្តីពីបុរាណស្ថាន និងបេតិកភណ្ឌវប្បធម៌ ចំនួន ៧កន្លែង ស្ថិតក្នុងខេត្តបន្ទាយមានជ័យ និង១០៨កន្លែងស្ថិតក្នុងដែនជម្រកសត្វព្រៃគូលែន-ព្រហ្មទេព ខេត្តព្រះវិហារ ដើម្បីបង្កើតជាតំបន់បេតិកភណ្ឌធម្មជាតិ។

ព័ត៌មានបន្ថែម

កម្មវិធីបើកវគ្គបណ្ដុះបណ្ដាលស្ដីពី តួនាទីរបស់ក្រុមប្រឹក្សាឃុំក្នុងការចូលរួមគ្រប់គ្រងតំបន់ការពារធម្មជាតិ
ថ្ងៃ ពុធ, 25 វិច្ឆិកា, 2020 កម្មវិធីបើកវគ្គបណ្ដុះបណ្ដាលស្ដីពី តួនាទីរបស់ក្រុមប្រឹក្សាឃុំក្នុងការចូលរួមគ្រប់គ្រងតំបន់ការពារធម្មជាតិ
កិច្ចប្រជុំតាមប្រព័ន្ធអនឡាញស្ដីពី ការវាយតម្លៃសេវាកម្មអេកូឡូស៊ី​នៅកម្ពុជា
ថ្ងៃ ពុធ, 25 វិច្ឆិកា, 2020 កិច្ចប្រជុំតាមប្រព័ន្ធអនឡាញស្ដីពី ការវាយតម្លៃសេវាកម្មអេកូឡូស៊ី​នៅកម្ពុជា
ពិធីចុះហត្ថលេខាកិច្ចព្រមព្រៀងអនុវត្តន៍ «គម្រោងទប់ស្កាត់នឹងសំណល់ប្លាស្ទិកក្នុងសមុទ្រនៅកម្ពុជា»
ថ្ងៃ ពុធ, 25 វិច្ឆិកា, 2020 ពិធីចុះហត្ថលេខាកិច្ចព្រមព្រៀងអនុវត្តន៍ «គម្រោងទប់ស្កាត់នឹងសំណល់ប្លាស្ទិកក្នុងសមុទ្រនៅកម្ពុជា»