កិច្ចប្រជុំពិគ្រោះយោបល់ស្ដីពីការកាត់បន្ថយហានិភ័យនៃការវិនិយោគលើថាមពលកកើតឡើងវិញ ផ្តោតលើផ្ទាំងថាមពលពន្លឺព្រះអាទិត្យ
ថ្ងៃ សុក្រ, 29 មិថុនា, 2018នៅទីស្តីការក្រសួងបរិស្ថាន រសៀលថ្ងៃអង្គារ ១៤កើត ខែបឋមាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២៦ ខែមិថុនា ឆ្នាំ២០១៨ ឯកឧត្តម ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.) និងលោក នីក ប៊ែរេសហ្វត (Nick Beresford) នាយក UNDP ប្រចាំប្រទេសកម្ពុជា បានចូលរួមជាអធិបតី និងដឹកនាំកិច្ចប្រជុំពិគ្រោះយោបល់ស្ដីពីការកាត់បន្ថយហានិភ័យនៃការវិនិយោគលើថាមពលកកើតឡើងវិញ ផ្តោតលើផ្ទាំងថាមពលពន្លឺព្រះអាទិត្យ ដោយមានការអញ្ជើញចូលរួមពីស្ថាប័នពាក់ព័ន្ធចំនួន៥ក្នុងវិស័យថាមពល ក្រសួងបរិស្ថាន នាយកដ្ឋានចំណុះអគ្គលេខាធិការដ្ឋាន ក.ជ.អ.ច. និងអង្គការ UNDP សរុបចំនួន២៥នាក់។
កិច្ចពិគ្រោះយោបល់បានពិភាក្សានិងប្រមូលធាតុចូលរបស់អ្នកពាក់ព័ន្ធ ដើម្បីកំណត់វិធានការកាត់បន្ថយហានិភ័យជាសាធារណៈដែលអាចធ្វើទៅបាន ប្រកបដោយប្រសិទ្ធភាពចំណាយ សំដៅលើកកម្ពស់ការវិយោគវិស័យឯកជនលើផ្ទាំងថាមពលពន្លឺព្រះអាទិត្យភ្ជាប់ជាមួយនឹងបណ្ដាញ (on-grid) និងពុំភ្ជាប់ជាមួយបណ្ដាញ (off-grid) នៅកម្ពុជា។ លទ្ធផលសំខាន់ដែលទទួលបាន មានដូចខាងក្រោម៖
*** ត្រូវធ្វើការកែសម្រួលរបាយការណ៍ដោយស្វែងរកទិន្នន័យផ្លូវការបន្ថែម និងធ្វើការកែលម្អលទ្ធផល ដើម្បីទទួលបានគោលគំនិតនៃការកាត់បន្ថយហានិភ័យ សំដៅធានាបាននូវប្រសិទ្ធភាពចំណាយ លើកទឹកចិត្តលើការវិនិយោគពីវិស័យឯកជន និងការបង្កើតគោលនយោបាយគាំទ្រ
*** ស្នើឱ្យមានភាគីទីបីដែលជាអ្នកជំនាញការឯកទេស(Peer Reviewer) ធ្វើការត្រួតពិនិត្យលើរបាយការណ៍នេះ មុននឹងដាក់ឱ្យមានការពិគ្រោះយោបល់ថ្នាក់ជាតិ នាពេលខាងមុខ
*** រៀបចំបោះពុម្ពផ្សព្វផ្សាយរបាយការណ៍ចុងក្រោយ និងជាពិសេសរៀបចំគម្រោងស្នើសុំទៅកាន់មូលនិធិអាកាសធាតុបៃតង (Green Climate Fund: GCF)៕
ព័ត៌មានបន្ថែម
