ឯកឧត្តម សាយ សំអាល់ ចែករំលែកចំណេះដឹងលើគោលនយោបាយគ្រប់គ្រងបរិស្ថានជាមួយនិស្សិតនៅសាកលវិទ្យាល័យភូមិន្ទភ្នំពេញ

ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន កាលពីថ្ងៃទីអង្គារ ៧រោច ខែជេស្ឋ ឆ្នាំច សំរឹទ្ឋស័ក ព.ស ២៥៦២ ត្រូវនឹងថ្ងៃទី០៥ ខែមិថុនា ឆ្នាំ២០១៨ បានចែករំលែកចំណេះដឹងលើគោលនយោបាយគ្រប់គ្រងបរិស្ថាន និងអំពីទិដ្ឋភាពទូទៅពាក់ព័ន្ឋការការពារ និងអភិរក្សធនធានធម្មជាតិ នៅព្រះរាជាណាចក្រកម្ពុជា ជាមួយនិស្សិតសាកលវិទ្យាល័យភូមិន្ទភ្នំពេញ។ ឯកឧត្តមរដ្ឋមន្រ្តី សាយ សំអាល់ មានប្រសាសន៍ថា ក្រសួងបរិស្ថានខិតខំប្រឹងប្រែងក្នុងការធ្វើទំនើបកម្មស្ថាប័ន តាមរយៈការពង្រឹងសមត្ថភាពមន្ត្រីរាជការ និងការពង្រឹងការអនុវត្តច្បាប់ ការពង្រឹងការងារគ្រប់គ្រងរដ្ឋបាល និងហិរញ្ញវត្ថុ សាមគ្គីភាព និងការពង្រឹងការទទួលខុសត្រូវខ្ពស់។ ជាមួយគ្នានេះដែរ ក្រសួងបរិស្ថានបានផ្ទេរមុខងារ និងការធ្វើប្រតិភូកម្មទៅឱ្យរដ្ឋបាលថ្នាក់ក្រោមជាតិ និងបាន ការរៀបចំយុទ្ធសាស្ត្រ និងផែនការសកម្មភាពបរិស្ថានជាតិ និងការរៀបចំក្រមបរិស្ថានជាដើម។
ក្នុងវេទិកានេះ ឯកឧត្តមរដ្ឋមន្រ្តី បានលើកឡើងផងដែរលើស្ថានភាពជាក់ស្តែង នៃសង្គមជាតិក្នុងដំណាក់កាល ដែលមានសុខសន្តិភាព មានការអភិវឌ្ឍ និងកំណើនសេដ្ឋកិច្ចជាប្រចាំជាង៧% រយៈពេល២០ឆ្នាំជាប់ៗគ្នា នាពេលកន្លងមកនេះ។ ជាមួយគ្នានេះ ឯកឧត្តម រដ្ឋមន្រ្តីក្រសួងបរិស្ថាន បានបង្ហាញជាទូទៅការប្រឈមកើតមានក្នុងវិស័យបរិស្ថាន ដោយសារសមាសភាពផ្សំបញ្ជូលគ្នា ទី១ ផ្នែកគោលការណ៍ សិទ្ឋិ និងគោលនយោបាយ មិនទាន់អនុវត្តន៍គ្រប់ជ្រុងជ្រោយ ទី២ ការងារប្រតិបត្តិពីថ្នាក់ជាតិ ដល់ថ្នាក់ក្រោមជាតិ ជាពិសេសថ្នាក់មូលដ្ឋានមិនទាន់អនុវត្តន៍បានពេញលេញ ទី៣ ការយល់ដឹងរបស់ប្រជាពលរដ្ឋលើវិស័យបរិស្ថាននៅមិនទាន់ទូលំទូលាយ ដើម្បីចូលរួមកិច្ចគាំពារបរិស្ថាន ការទុកដាក់សំណល់ក៏ដូចជាការងារការពារ និងអភិរក្សធនធានធម្មជាតិ។
ឯកឧត្តមរដ្ឋមន្រ្តី បានបញ្ជាក់ឱ្យដឹងថា ដើម្បីដោះស្រាយបញ្ហាប្រឈម និងការកែទម្រង់បានជោគជ័យក្នុងកិច្ចការពារបរិស្ថាន អាស្រ័យដោយប្រជាពលរដ្ឋមានការយល់ដឹងច្រើន និងបានចូលរួមច្រើនថែមទៀតក្នុងកិច្ចគាំពារបរិស្ថាន ការការពារ និងអភិរក្សធនធានធម្មជាតិ។ ឯកឧត្តមរដ្ឋមន្រ្តី បានសង្តត់ធ្ងន់ថា ក្រសួងបរិស្ថានបាននិងកំពុងធ្វើកំណែទម្រង់សំខាន់ៗនៅក្នុងវិស័យបរិស្ថាន ក៏ដូចជាជំរុញឱ្យអ្នកពាក់ព័ន្ធទាំងអស់ចូលរួមអនុវត្តកម្មវិធីកំណែទម្រង់ទាំងនេះឱ្យមានប្រសិទ្ធភាព ដើម្បីធានារក្សាឱ្យបាននូវតុល្យភាពរវាងការអភិរក្សនិងការអភិវឌ្ឍ។
ឯកឧត្តម សាយ សំអាល់ បានបញ្ជាក់ថា ការងារបរិស្ថានជាកិច្ចការសកល និងមានលក្ខណៈអន្តរវិស័យ ដែលត្រូវបានពិភពលោកយកចិត្តទុកដាក់យ៉ាងខ្លាំងក្នុងពេលបច្ចុប្បន្ននេះ ហើយកត្តានាំឱ្យជោគជ័យលើវិស័យបរិស្ថាន គឺជាកត្តាមនុស្ស មនុស្សយល់ មនុស្សដឹង មនុស្សស្គាល់ ពីតួនាទីភារកិច្ច និងក្នុងការចូលរួម ចេះសាមគ្គីគ្នា បានអ្វីៗទាំងអស់កើតមាន។
សូមបញ្ជាក់ថា ក្នុងជំនួបរវាងឯកឧត្តមរដ្ឋមន្រ្តី សាយ សំអាល់ និងនិស្សិតសាកលវិទ្យាល័យភូមិន្ទភ្នំពេញ ប្រព្រឹត្តទៅចំពិធីអបអរសាទរទិវាបរិស្ថានជាតិ និងបរិស្ថានពិភពលោក ៥ មិថុនា ហើយនៅឆ្នាំនេះ ព្រឹត្តិការណ៍នេះ រៀបចំឡើងក្រោមប្រធានបទ«រួមគ្នាកាត់បន្ថយប្លាស្ទិក»។ ជាមួយគ្នានេះ ឯកឧត្តមរដ្ឋមន្រ្តីបានឆ្លើយតបនឹងសំនួរជាច្រើនរបស់និស្សិតពាក់ព័ន្ឋការគ្រប់គ្រងបរិស្ថាននៅព្រះរាជាណាចក្រលកម្ពុជា។