ប្រធានាធិបតីអាមេរិក បញ្ជាឱ្យណាសា ទៅសិក្សាឋានព្រះចន្ទឡើងវិញដើម្បីធានាសន្តិសុខជាតិ
ថ្ងៃ អង្គារ, 12 ធ្នូ, 2017ប្រធានាធិបតីអាមេរិកឌូណាល់ត្រាំ ចង់ឱ្យអង្គការណាសាបញ្ជូនអ្នកវិទ្យាសាស្ត្រទៅសិក្សាស្រាវជ្រាវ និងបន្តការស្រាវជ្រាវបន្ថែមទៀតនៅភពព្រះចន្ទឡើងវិញ។ ការថ្លែងយ៉ាងដូចនេះគឺនៅពិធីចុះហត្ថលេខាក្នុងខួប៤៥ឆ្នាំនៃការចុះចតអាប៉ូឡូទី១៧របស់អាមេរិកលើឋានព្រះចន្ទ។
លោកបញ្ជាក់ថា ៖ “ពេលនេះ យើងនឹងមិនត្រឹមតែដោតទង់ជាតិរបស់យើង និងបន្សល់ដានបាតជើងរបស់យើងប៉ុណ្ណោះទេ។ យើងនឹងមានបេសកកម្មទៅកាន់ភពអង្គារ ហើយនឹងភពផ្សេងៗទៀតនៅថ្ងៃខាងមុខ”។
គួរំលឹកថា ក្នុងអាណត្តិលោកប្រធានាធិបតីអាមេរិក អូបាម៉ា ទិសដៅរបស់អង្គការណាសាគឺការសិក្សាពីភពអង្គារដែលជាភពមានពណ៌ក្រហម។ក្នុងខណៈដែលមានការបញ្ជាពីប្រធានាធិបតីអាមេរិកថ្មីឱ្យទៅសិក្សាពីឋានព្រះចន្ទ គេនៅមិនទាន់ដឹងច្បាស់ពីការផ្លាស់ប្តូរនេះ នឹងប៉ះពាល់ដល់ពេលវេលាបេសកកម្មនៅភពពុធដែរឬទេ។
ទាំងប្រធានាធិបតី និងអនុប្រធានាធិបតីអាមេរិក បានបញ្ជាក់ពីសារៈសំខាន់នៃយុទ្ធសាស្ត្រកងទ័ពអាមេរិកនៅលើឋានព្រះចន្ទ ដែលប្រធានាធិបតីអាមេរិកអះអាងថា ជាការពង្រឹងសន្តិសុខជាតិអាមេរិក។ ការណែនាំឱ្យទៅសិក្សាពីឋានព្រះចន្ទឡើងវិញនេះ គឺធ្វើឡើងតាមការផ្តល់យោបល់ពីក្រុមប្រឹក្សាសន្តិសុខអាវកាស៕
ព័ត៌មានបន្ថែម
