មន្រ្តីបរិស្ថានមកពីខេត្តចំនួន៧ បានគាំទ្រយន្តការលើកទឹកចិត្តដល់ប្រតិបត្តិករមេត្រីភាពបរិស្ថាន

មន្រ្តីនៃមន្ទីរបរិស្ថានមកពី​​​ខេត្តពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប ខេត្តកំពង់ធំ និងអ្នកពាក់ព័ន្ធ ជាច្រើននាក់ បានចូល​​​រួម​​​ក្នុង​​​កម្ម​​​វិធី​​​ផ្សព្វផ្សាយស្តីពីរង្វាន់លើកទឹកចិត្តមេត្រីភាពបរិស្ថាន ដែល​​​ត្រូវ​​​បាន​​​រៀបចំ​​​ឡេីង​​​នៅ​​​ខេត្តសៀមរាប។ វេទិកានេះរៀបចំឡើងនាថ្ងៃទី២៤ ខែសីហា ឆ្នាំ២០១៧ដោយនាយកដ្ឋានរង្វាន់ និងលើកទឹកចិត្ត នៃអគ្គនាយកដ្ឋានចំណេះដឹង និងព័ត៌មានបរិស្ថាន ក្រសួងបរិស្ថាន។

លោកពុទ្ធ សូរិទ្ធី អគ្គនាយករងនៃអគ្គនាយកដ្ឋានចំណេះដឹង និងព័ត៌មានបរិស្ថាន បានអោយដឹងថាសិក្ខាសាលាផ្សព្វផ្សាយស្តីពីរង្វាន់លើកទឹកចិត្តមេត្រីភាពបរិស្ថានដើម្បីបញ្ជ្រាបការយល់ដឹងអំពីរង្វាន់លើកទឹកចិត្តមេត្រីភាពបរិស្ថានដល់មន្ទីរបរិស្ថានខេត្តជុំវិញបឹងទន្លេសាប អំពីលិខិតបទដ្ឋានគតិយុត្ត សូចនាករ លក្ខណ:វិនិច្ឆ័យសម្រាប់វាយតម្លៃគុណវុឌ្ឍិ និងប្រភេទរង្វាន់មេត្រីភាពបរិស្ថាន។ ជាមួយគ្នានេះដែរវេទិកាក៏ជំរុញលើកទឹកចិត្តដល់ប្រតិបត្តិករមេត្រីភាពបរិស្ថាន សាធារណជន និងអ្នកពាក់ព័ន្ធ ទទួលបានចំនេះដឹងបន្ដែមពីអំពីរង្វាន់លើកទឹកចិត្តមេត្រីភាពបរិស្ថាន។

សូមបញ្ជាក់ថាបន្ទាប់ពីមានបទបង្ហាញ ពីវាគ្មិននិងអ្នកជំនាញ មន្រ្តីចូលរួមបានគាំទ្រ និងសហការក្នុងការជំរុញការចូលរួមរបស់សាធារណជន ចូលរួមសកម្មភាពមេត្រីភាពបរិស្ថាន ហើយតំណាងមន្ទីរបរិស្ថានមកពីខេត្តនានា គាំទ្រឱ្យមានការលើកទឹកចិត្តដល់ប្រតិបត្តិករមេត្រីភាពបរិស្ថាន ដែលបានចូលរួម និងមានស្នាដៃល្អ៕