ភ្នំពេញ៖ ឯកឧត្តម នេត្រ ភក្រ្តា រដ្ឋលេខាធិការ និងប្រធានអនុគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ១៩ ក្របខណ្ឌក្រសួងបរិស្ថាន បានថ្លែងនៅថ្ងៃទី១៥ ខែមេសា ឆ្នាំ២០២១ នេះថា មន្ត្រីនៃក្រសួងបរិស្ថានសរុបចំនួន ៨៩៣ រូបបានចាប់ផ្តើមទទួលការចាក់វ៉ាក់សាំងស៊ីណូវ៉ាក់បង្ការជំងឺកូវីដ១៩ ដូសទី២ ចាប់ពីថ្ងៃទី១៥ ខែមេសា ឆ្នាំ២០២១ សម្រាប់រយៈពេល ៣ ថ្ងៃ ក្នុងក្របខណ្ឌនៃយុទ្ធនាការចាក់វ៉ាក់សាំងបង្ការជំងឺកូវីដ១៩ ទូទាំងប្រទេស។ ឯកឧត្តម បានថ្លែងថា នៅក្នុងយុទ្ធនាការចាក់វ៉ាក់សាំងដល់មន្រ្តីរាជការនៃក្រសួងបរិស្ថាន រយៈពេល៣ថ្ងៃគឺនៅថ្ងៃទី១ដល់ថ្ងៃទី៣ខែមេសា ឆ្នាំ២០២១កន្លងទៅនេះ ក្រសួងបរិស្ថានដោយសហការជាមួយគណៈកម្មការចំពោះកិច្ចចាក់វ៉ាក់សាំងទូទាំងប្រទេស និងក្រុមគ្រូពេទ្យស្ម័គ្រចិត្ត សសយក បានចាក់វ៉ាក់សាំងស៊ីណូវ៉ាក់បង្ការជំងឺកូវីដ-១៩ ជូនដល់មន្រ្តីរាជការ មន្រ្តីជាប់កិច្ចសន្យា និងមន្រ្តីដែលស្ម័គ្រចិត្តនៃក្រសួងបរិស្ថានសរុប ៨៩៣នាក់។

ឯកឧត្តមបាមលើកឡើងបន្តថា ការចាក់វ៉ាក់សាំងនេះគឺជាការចាក់វ៉ាក់សាំងកាតព្វកិច្ចសម្រាប់មន្រ្តីរាជការគ្រប់រូប ដែលរាជរដ្ឋាភិបាលបានកំណត់ ហើយក៏ជាការចូលរួមនៅក្នុងការទប់ស្កាត់ ការរីករាលដាលនៃជំងឺកូវីដ-១៩ ដែលកំពុងរួតរិតមកលើពិភពលោក ក្នុងនោះរួមមានកម្ពុជាផងដែរ។ ឯកឧត្តមបានបញ្ជាក់ថា៖ «មន្ត្រីរាជការទាំងអស់នៃក្រសួងបរិស្ថានបានបង្ហាញនូវសេចក្តីសប្បាយរីករាយដែលបានចាក់វ៉ាក់សាំងបង្ការជំងឺកូវីដ១៩ និងបានគោរពថ្លែងអំណរគុណចំពោះសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលបានខិតខំប្រឹងប្រែងស្វះស្វែងរកវ៉ាក់សាំងដើម្បីចាក់ជូនមន្ត្រីរាជការ កងកម្លាំងប្រដាប់អាវុធ ក៏ដូចជាប្រជាពលរដ្ឋទូទៅ។ មន្ត្រីរាជការនៃក្រសួងបរិស្ថានទាំងអស់គ្នាពិតជាចងចាំនូវគំរូវីរភាពរបស់សម្តេចតេជោ ហ៊ុន សែន ដែលតែងតែយកចិត្តទុកដាក់ខ្ពស់ចំពោះសុខុមាលភាពរបស់ប្រជាពលរដ្ឋ គិតគូរជាប់ជានិច្ចដល់សុខទុក្ខរបស់មន្ត្រី និងប្រជាពលរដ្ឋ»។
ឯកឧត្តម នេត្រ ភក្រ្តា រដ្ឋលេខាធិការ និងប្រធានអនុគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ១៩ ក្របខណ្ឌក្រសួងបរិស្ថានបានថ្លែងថា យើងខ្ញុំទាំងអស់គ្នា និងចូលរួមក្នុងការការពារ ក៏ដូចជាទប់ស្កាត់ ការរីករាលដាលនៃជំងឺកូវីដ១៩ តាមរយៈការប្រកាន់ភ្ជាប់នូវ វិធានការ ៣កុំ និង៣ការពារ ហើយនិងគោរពនិងចូលរួមអនុវត្តបទបញ្ជានានា របស់រាជរដ្ឋាភិបាល របស់ក្រសួងសុខាភិបាល ដើម្បីទប់ស្កាត់ការរីករាលដាលនេះ»។
ឯកឧត្តម នេត្រ ភក្រ្តា ក៏បានលើកឡើងផងដែរថា អ្វីដែលជាការកត់សម្គាលរបស់មន្រ្តីរាជការនៃក្រសួងបរិស្ថាន មានការយកចិត្តទុកដាក់ខ្ពស់ និងចូលរួមក្នុងការចាក់វ៉ាក់សាំង បង្ការជំងឺកូវីដ-១៩ ដោយស្ម័គ្រចិត្តហើយសប្បាយរីករាយដែលទទួលបាននូវការការចាក់វ៉ាក់សាំងការពារខ្លួនបង្ការជំងឺកូវីដ-១៩នេះ។
ឯកឧត្តមរដ្ឋលេខាធិការប្រធានអនុគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ១៩ ក្របខណ្ឌក្រសួងបរិស្ថានបានបញ្ចាក់បន្ថែមថា វ៉ាក់សាំងមួយម្ជុលៗ ដែលយើងខ្ញុំជាមន្ត្រីរាជការបានចាក់ហើយ រហូតមកដល់ពេលេនះគឺរបងរឹងមាំសម្រាប់ការពារខ្លួន និងផ្តល់នូវទំនុកចិត្តកាន់តែខ្ពស់ថែមទៀតសម្រាប់បុគ្គលម្នាកៗដែល បានចាក់វ៉ាក់សាំងនេះ ហើយនិងខិតខំប្រឹងប្រែងធ្វើយ៉ាងណាចូលរួមអនុវត្តវិធានការសុខាភិបាលដើម្បីជួយឱ្យប្រទេសកម្ពុជារបស់យើងវិលទៅរកភាពប្រក្រតីឡើងវិញ។ ឯកឧត្តមបានថ្លែងថា បើទោះជាបានចាក់វ៉ាក់សាំងយ៉ាងណាក្តី ក៏មន្រ្តីរាជការទាំងអស់ មិនភ្លេចខ្លួននៅក្នុងការការពារខ្លួន ពីការការរីករាលដាលនៅក្នុងសហគមន៍ តាមរយៈ ការអនុវត្តវិធានការទាំងឡាយទាំងវិធានការសុខាភិបាល និងវិធានការមិនមែនសុខាភិបាលដើម្បីទប់ស្កាត់ការរីករាលនៃជំងឺកូវីដ-១៩។
ជាមួយគ្នានេះ ឯកឧត្តមរដ្ឋលេខាធិការប្រធានអនុគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ១៩ ក្របខណ្ឌក្រសួងបរិស្ថាន បានស្នើឱ្យមន្ត្រីរាជការ និងបងប្អូនប្រជាពលរដ្ឋខ្មែរទាំងអស់នាចូលរួមទទួលការចាក់វ៉ាក់សាំងបង្ការជំងឺកូវី១៩ ទៅតាមគោលនយោបាយរបស់រាជរដ្ឋាភិបាលក្នុងការពង្រឹងខឿនការពារសុខភាពប្រជាជន សម្រាប់ការបង្ការទប់ស្កាត់ការរីករាលដាលជំងឺកូវីដ-១៩។ ការលុបបំបាត់ ការបិទបញ្ចប់ការរីករាលដាលនៃជំងឺកូវី១៩ ក្នុងព្រឹត្តិការណ៍២០កុម្ភៈ គឺត្រូវតែមានការចូលរួមពីបងប្អូនប្រជាពលរដ្ឋគ្រប់ៗគ្នា។ រាជរដ្ឋាភិបាលបានដាក់ចុះនូវបទបញ្ជា និងផែនការសកម្មភាពផ្សេងៗជាពិសេសសូមឱ្យបងប្អូនប្រជាពលរដ្ឋចូលរួម អនុវត្តទាំងអស់គ្នាឱ្យបានហ្មត់ចត់ដើម្បីកាត់បន្ថយនូវហានិភ័យផ្សេងៗចំពោះសុខុមាលភាពប្រជាពលរដ្ឋ។

រាជរដ្ឋាភិបាលកម្ពុជា បានចេញសេចក្តីសម្រេចនៅក្នុងការ បិទខ្ទប់រាជធានីភ្នំពញ និងក្រុងតាខ្មៅដើម្បីទប់ស្កាត់ការរីករាលដាលនៃជំងឺកូវីដ១៩ ប៉ុន្តែការបិទខ្ទប់នេះ ក៏បានអនុញ្ញាតនូវមានសកម្មភាពមួយចំនួន ក្នុងនោះរាជរដ្ឋាភិបាលបានអនុញ្ញាតឱ្យអ្នកដែលបានចាក់វ៉ាក់សាំងមកទទួលការចាក់វ៉ាក់សាំងធម្មតាតាមការកំណត់របស់ក្រុមគ្រូពេទ្យ។ ឯកឧត្តមរដ្ឋលេខាធិការប្រធានអនុគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ១៩ ក្របខណ្ឌក្រសួងបរិស្ថាន បានថ្លែងអំណរគុណដល់រាជរដ្ឋាភិបាល ជាពិសេសកម្លាំងសមត្ថកិច្ចតាមតំបន់នានាបានសម្រួលដល់មន្ត្រីរាជការនៃក្រសួងបរិស្ថានបានធ្វើដំណើរមកចាក់វ៉ាក់សាំងតាមការកំណត់ ដោយពួកគាត់បានបង្ហាញបណ្ណចាក់វ៉ាក់សាំងទៅឱ្យសមត្ថកិច្ចហើយសមត្ថកិច្ច។ ជាមួយគ្នានេះ ឯកឧត្តមប្រធានអនុគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ១៩ ក្របខណ្ឌក្រសួងបរិស្ថាន បានអំពាវនាវឱ្យប្រជាពលរដ្ឋទាំងអស់អនុវត្តតាមបទបញ្ជានិងការណែនាំផ្សេងៗរបស់ រាជរដ្ឋាភិបាល និងគោរពឱ្យបាននូវសេចក្តីសម្រេចរបស់រាជរដ្ឋាភិបាលក្នុងការបិទខ្ទប់រាជធានីភ្នំពេញ និងក្រុងតាខ្មៅ និងសូមស្នាក់នៅផ្ទះ កុំចាកចេញក្រៅក្នុងករណីមិនចាំបាច់៕

 

ព័ត៌មានបន្ថែម

ឯកឧត្ដម សៅ សុភាព រដ្ឋលេខាធិការក្រសួងបរិស្ថាន បានអនុញ្ញាតអោយ​លោក OKUBO Masaharu នាយកប្រតិបត្តិផ្នែក Energy Business Unit I របស់ក្រុមហ៊ុន Mitsui & Co.,Ltd និងលោកJackson មន្ត្រីអង្គការ CI ជួបសម្តែងការគួរសម និងពិភាក្សាការងារ
ថ្ងៃ ពុធ, 28 សីហា, 2019 ឯកឧត្ដម សៅ សុភាព រដ្ឋលេខាធិការក្រសួងបរិស្ថាន បានអនុញ្ញាតអោយ​លោក OKUBO Masaharu នាយកប្រតិបត្តិផ្នែក Energy Business Unit I របស់ក្រុមហ៊ុន Mitsui & Co.,Ltd និងលោកJackson មន្ត្រីអង្គការ CI ជួបសម្តែងការគួរសម និងពិភាក្សាការងារ
ឯកឧត្តម រ័ត្នវិរៈ អនុរដ្ឋលេខាធិការក្រសួងបរិស្ថាន បានដឹកនាំកិច្ចប្រជុំពិភាក្សាការងារ និងសំណេះសំណាល ជាមួយមន្ត្រីរាជការ និងមន្ត្រីឧទ្យានុរក្ស នៃមន្ទីរបរិស្ថានខេត្តក្រចេះ
ថ្ងៃ ពុធ, 28 សីហា, 2019 ឯកឧត្តម រ័ត្នវិរៈ អនុរដ្ឋលេខាធិការក្រសួងបរិស្ថាន បានដឹកនាំកិច្ចប្រជុំពិភាក្សាការងារ និងសំណេះសំណាល ជាមួយមន្ត្រីរាជការ និងមន្ត្រីឧទ្យានុរក្ស នៃមន្ទីរបរិស្ថានខេត្តក្រចេះ
សេចក្តីជូនដំណឹងស្តីពីការប្រឡងជ្រើសរើសនិស្សិត និងមន្ត្រីរាជការ ចូលបម្រើការងារក្នុងក្របខណ្ឌក្រសួងបរិស្ថានឆ្នាំ២០១៩
ថ្ងៃ ពុធ, 28 សីហា, 2019 សេចក្តីជូនដំណឹងស្តីពីការប្រឡងជ្រើសរើសនិស្សិត និងមន្ត្រីរាជការ ចូលបម្រើការងារក្នុងក្របខណ្ឌក្រសួងបរិស្ថានឆ្នាំ២០១៩