ទេសភាព​ស្អាត​​ ទោះជាខ្សែ​ទឹក​ក្រោម​កខ្វក់​បន្តិច​ក្ដី​​​​។ រូបភាព៖ ភ្នំពេញប៉ុស្តិ៍

ទឹក​ផុស​ព្រុចៗ​ផុស​ចេញ​ពី​ក្នុង​ដី​ថ្លា​ឈ្វេង​ត្រជាក់​ស្រេង​ជម្រៅ​ត្រឹម​កំភួន​ជើង​កំពុង​ក្លាយ​ជា​ទីឋាន​កម្សា​ន្ដ​​ពេញ​និយម​បំផុត​មួយ​នៅ​​ក្នុង​ទឹក​ដី​ក្រហម​នៃ​ខេត្ដ​កំពង់ចាម​។ ក្បាល​ហុង​ទឹក​​ រមណីយដ្ឋាន​ចុះ​បញ្ជី​ក្នុង​ឆ្នាំ​២០១១ គឺជា​ទឹក​ផុស​ត្រជាក់​ដែល​ជ្រាប​ចេញ​ពី​ប្រភព​អាង​ស្ដុកទឹក​​​ថ្ម​ដា​​ ស្ថិត​ក្នុង​ឃុំ​បឹង​ណាយ ស្រុក​ព្រៃ​ឈរ ចម្ងាយ​ប្រមាណ​ជាង ៣០ គីឡូម៉ែត្រ​ពី​ក្រុង​កំពង់​ចាម ទទួល​ភ្ញៀវ​រាប់​រយ​នាក់​រៀង​​រាល់​ថ្ងៃ ហើយ​ចំនួន​បាន​កើ​ន​ឡើង​រាប់​ពាន់​ក្នុង​រដូវ​បុណ្យ​ទាន​។

លោក ច្រឹង យី ម្ចាស់​អាហារ​ដ្ឋាន​ស្ថិត​នៅ​ក្បែរ​ប្រភព​ទឹក​ផុស​នៃ​ក្បាល​ហុង​ទឹក​​ ដែល​បាន​បើកអាជីវកម្ម​​ជិត​ពីរ​​ឆ្នាំ បាន​ឲ្យ​ដឹងថា​ រដូវ​បុណ្យ​ទាន​ មនុស្ស​មក​លេង​ទី​នេះ​ពាស​ពេញ​គ្រប់​ទីកន្លែង។ ប៉ុន្ដែ​បើទោះបីជា​ភ្ញៀវ​ទេស​ចរ​មក​កម្សាន្ដ​រមណីយដ្ឋាន​នេះ​យ៉ាង​ណា​ក្ដី ក៏​​ភាគ​ច្រើន​ពួក​គេ​គ្រាន់​តែ​មក​អង្គុយ​ក្នុង​ក្យូស​ទទួល​ទាន​អាហារ​ថ្ងៃ​ត្រង់​ ខណៈ​ភ្ញៀវ​មួយ​ចំនួន​ត្រូវ​ដើរ​ទៅ​កាន់​ប្រភព​ទឹក​ផុស​ព្រុចៗ​ចេញ​ពី​ក្នុង​ដី​គួរ​ឲ្យ​ក្បង់​ស្រោច​ប្រាណ​។ ចំពោះ​បញ្ហា​​ភ្ញៀវ​ឈូ​ឆរ​ទៅ​ជ្រំ​ប្រភព​​ក្បាល​ទឹក មជ្ឈដ្ឋាន​មួយ​ចំនួន​បាន​ចោទ​ថា ទង្វើ​នេះ​បង្ក​ឲ្យ​ផ្ទៃ​ទឹកស្ងប់​អត់​ហូរ​ និង​ល្អក់​កខ្វក់​នៅ​ផ្នែក​ខាង​ក្រោម ដែល​ជះ​ក្លិន​អសោច​ដល់​ច្រមុះ​​ភ្ញៀវ​ទេសចរ​។

ក្យូស​បម្រើ​ម្ហូបអាហារតម្លៃ​​ពី​៥​ពាន់ទៅ ៥​ម៉ឺន​រៀល​​​។ របថត៖ ភ្នំពេញប៉ុស្តិ៍

លោក ស៊ាន សុគន្ធ ប្រធាន​មន្ទីរ​ទេស​ចរណ៍​ខេត្ដ​កំពង់​ចាម ​បាន​ប្រាប់​​ថា វា​ជា​តំបន់​ទឹក​ផុស​ធម្មជាតិ ហើយ​ក្រោយ​ពី​មន្ទីរ​ទេសចរណ៍​រៀបចំ​ជា​តំបន់​រមណីយដ្ឋាន ក្បាល​ហុង​ទឹក ​ត្រូវបាន​ហ៊ុមព័ទ្ធ​ មិន​ឲ្យ​មនុស្ស​ចូល​លុក​លុយ​បន្ដ​ទៀត​។ លោក​បាន​បន្ដ​ថា​៖ «​កាលពី​សង្គម​ចាស់ បរិវេណ​ទឹក​ផុស​មាន​ល្បឿន​ ៦ ម៉ែត្រ​គុប​ក្នុង​មួយ​វិនាទី។ ​​ដោយ​សារ​បច្ចុប្បន្ន យើង​អស់​ព្រៃ អស់​អី​ផង វា​នៅ​សល់​តែ​ពី ២ ទៅ ៣ ម៉ែត្រ​គុប​ក្នុង​មួយ​វិនាទី​ទេ​។ ប៉ុន្ដែ​ឆ្នាំ​នេះ​ យើង​សង្កេត​​ឃើញ​ថា ទឹក​មាន​សម្ទុះ​ជាង​បណ្ដា​ឆ្នាំ​កន្លង​មក​»។

 

មាន់ដុត​ទឹក​ឃ្មុំ​​អាហារ​ដ៏ពេញនិយម​សម្រាប់​ទេសចរ​។ រូបថត៖ ភ្នំពេញប៉ុស្តិ៍

ពី​ប្រភព​ក្បាល​ទឹក​ដែល​ហូរ​រលេញ​ថ្លា​ឈ្វេង​ចម្ងាយ​ប្រមាណ​ពី ២០ ទៅ ៣០​ ម៉ែត្រ​ផុត​របង​ហ៊ុមព័ទ្ធ​បន្ដិច ផ្ទៃ​ទឹក​ចា​ប់​ផ្ដើម​មាន​សភាព​ល្អក់​ ភាយ​ក្លិន​ស្អុយ​ និង​​មិន​ថ្លា​ស្អាត​រហូត​ដល់​រមណីយ​ដ្ឋាន​ព្រះ​ធាតុ​ទឹកឆា​ ដែល​ត្រូវបាន​ភ្ញៀវ​ទេសចរ​បំភ្លេច​ទៅ​ហើយ​។ លោក ស៊ាន សុគន្ធ ​បាន​បញ្ជាក់​ថា៖ «​​ដោយ​​អត់​យល់​ពី​បច្ចេកទេស​ អ្នក​ខ្លះ​និយាយ​ថា ប្រជាពលរដ្ឋ​ចូល​ទៅ​ជញ្ជាន់​ ធ្វើ​ឲ្យ​ហាប់​ដី ធ្វើ​ឲ្យ​ប្រភព​ទឹក​ក្រោម​ដី មិន​សូវ​ចេញ។ ប៉ុន្ដែ​អ្នក​ជំនាញ​អះអាង​ថា វា​នៅ​តែ​បន្ដ​ចេញ បើ​ទោះបីជា​កន្លែង​នោះ​មាន​សភាព​ហាប់​ ក៏​វា​ត្រូវ​ចេញ​នៅ​កន្លែង​ផ្សេង​ដែរ​»។ យ៉ាង​ណា​មិញ លោក ស៊ាន សុគន្ធ បាន​និយាយ​ថា​ អាជ្ញាធរ​​មិន​ចង់​ឲ្យ​ភ្ញៀវ​ទេសចរ​ទៅ​លេង​​ជញ្ជាន់​នោះ​ឡើយ​ ដោយ​អាជ្ញាធរ​ចង់​ដាំ​ដើម​ឈើ​បន្ថែម​។

ប្រធាន​មន្ទីរ​ទេសចរណ៍​ខេត្ដ​កំពង់​ចាម​បាន​ប្រាប់​​ថា ​ខែ​វស្សា​ទឹក​ចេញ​តិច ខណៈ​ខែ​ប្រាំង​មាន​ទឹក​ចេញ​ច្រើន។ លោក​បាន​ពន្យល់​ពី​បាតុ​ភូមិ​ទឹក​ផុស​នេះ​​តាម​រយៈ​ការ​សាក​សួរ​ពី​មន្ដ្រី​ធន​ធាន​ទឹក​ថា ដោយសារ​តំបន់​ខាង​លើ​គឺជា​អាង​ស្ដុក ​នៅ​​ខែ​វស្សា វា​បឺត​ទឹក​ភ្ញៀងពី​ក្រោម​ដី ហើយ​ខែ​ប្រាំង វាបាន​បញ្ចេញ​ទឹក​វិញ​។ ទោះបីជា​យ៉ាង​ណា​មិញ ភាព​កខ្វក់ និង​ក្លិន​អសោច​ភាយ​ពី​ទឹក​តាម​ដង​ព្រែក​ខាង​ក្រោម​ហាក់​មិន​បាន​ធ្វើ​ឲ្យ​រំខាន​ចិត្ដ​ភ្ញៀវ​ទេសចរ​ឡើយ​។ ក្នុង​មួយ​ថ្ងៃ​ៗ ភ្ញៀវ​នៅ​តែ​សម្រុក​មក​កម្សា​ន្ដ​នៅ​ក្បាល​ហុង​ទឹក​ច្រើន​កកកុញ​។ គួរ​បញ្ជាក់​ថា ម្ហូប​ម្ហា​ចាប់​ពី​ល្ហុង​បុក​ មីឆា​ រហូត​ដល់​មាន់​ដុត​ទឹក​ឃ្មុំ ឬ​មាន់​ស្ងោរ​ជ្រក់ អន្ទង់​អាំង និង​តុមយ៉ាំ​មាន​តម្លៃ​ចាប់ពី ៥០០០ រៀល​ទៅ​ដល់ ៥ ម៉ឺន​រៀល​៕ អត្ថបទ និងរូបភាព៖ ភ្នំពេញប៉ុស្តិ៍

ព័ត៌មានបន្ថែម

ឯកឧត្ដម សៅ សុភាព រដ្ឋលេខាធិការក្រសួងបរិស្ថាន បានអនុញ្ញាតអោយ​លោក OKUBO Masaharu នាយកប្រតិបត្តិផ្នែក Energy Business Unit I របស់ក្រុមហ៊ុន Mitsui & Co.,Ltd និងលោកJackson មន្ត្រីអង្គការ CI ជួបសម្តែងការគួរសម និងពិភាក្សាការងារ
ថ្ងៃ ពុធ, 28 សីហា, 2019 ឯកឧត្ដម សៅ សុភាព រដ្ឋលេខាធិការក្រសួងបរិស្ថាន បានអនុញ្ញាតអោយ​លោក OKUBO Masaharu នាយកប្រតិបត្តិផ្នែក Energy Business Unit I របស់ក្រុមហ៊ុន Mitsui & Co.,Ltd និងលោកJackson មន្ត្រីអង្គការ CI ជួបសម្តែងការគួរសម និងពិភាក្សាការងារ
ឯកឧត្តម រ័ត្នវិរៈ អនុរដ្ឋលេខាធិការក្រសួងបរិស្ថាន បានដឹកនាំកិច្ចប្រជុំពិភាក្សាការងារ និងសំណេះសំណាល ជាមួយមន្ត្រីរាជការ និងមន្ត្រីឧទ្យានុរក្ស នៃមន្ទីរបរិស្ថានខេត្តក្រចេះ
ថ្ងៃ ពុធ, 28 សីហា, 2019 ឯកឧត្តម រ័ត្នវិរៈ អនុរដ្ឋលេខាធិការក្រសួងបរិស្ថាន បានដឹកនាំកិច្ចប្រជុំពិភាក្សាការងារ និងសំណេះសំណាល ជាមួយមន្ត្រីរាជការ និងមន្ត្រីឧទ្យានុរក្ស នៃមន្ទីរបរិស្ថានខេត្តក្រចេះ
សេចក្តីជូនដំណឹងស្តីពីការប្រឡងជ្រើសរើសនិស្សិត និងមន្ត្រីរាជការ ចូលបម្រើការងារក្នុងក្របខណ្ឌក្រសួងបរិស្ថានឆ្នាំ២០១៩
ថ្ងៃ ពុធ, 28 សីហា, 2019 សេចក្តីជូនដំណឹងស្តីពីការប្រឡងជ្រើសរើសនិស្សិត និងមន្ត្រីរាជការ ចូលបម្រើការងារក្នុងក្របខណ្ឌក្រសួងបរិស្ថានឆ្នាំ២០១៩