មន្ត្រីកម្មវិធីរេដបូកកម្ពុជាចុះទៅពិនិត្យនិងវាយតម្លៃវឌ្ឍនភាពនៃការអនុវត្តគម្រោងសាកល្បងរេដបូកថ្នាក់ក្រោមជាតិក្នុងភូមិសាស្រ្តខេត្តពោធិ៍សាត់

គម្រោងនេះជាគម្រោងមួយក្នុងចំណោមគម្រោងសាកល្បងថ្នាក់ក្រោមជាតិបី ដែលពីរទៀតកំពុងអនុវត្តដោយរដ្ឋបាលជលផលនៅតំបន់ព្រៃលិចទឹកបឹងទន្លេសាប និងមួយទៀតអនុវត្តដោយអគ្គនាយកដ្ឋានរដ្ឋបាលការពារនិងអភិរក្សធម្មជាតិ និងអគ្គនាយកដ្ឋានសហគមន៍មូលដ្ឋាននៃក្រសួងបរិស្ថាន នៅក្នុងតំបន់ឧទ្យានជាតិភ្នំគូលែន។ ក្នុងបេសកកម្មនេះ ក្រុមការងារបានយកចិត្តទុកដាក់ផ្តោតជាសំខាន់លើការទទួលបានផលប្រយោជន៍របស់សហគមន៍ពីសកម្មភាពគម្រោងខាងលើក្នុងក្របខណ្ឌប្រព័ន្ធសុវត្ថិភាពរេដបូក។

ជាលទ្ធផល ក្រុមការងារបានពិនិត្យស្ថានភាពជាក់ស្តែងនៅក្នុងតំបន់ទីតាំងគ្រោងក្នុងការប្រើប្រាស់ឡជីវឧស្ម័ន ការធ្វើសួនដំណាំគ្រួសារ ការការពារនិងដាំស្តារព្រៃសហគមន៍ កម្មវិធីប្រាក់សន្សំ និងសេដ្ឋកិច្ចសង្គមផ្សេងៗទៀត។ ជាមួយគ្នានេះ ក្រុមការងារបានជួបពិភាក្សាជាមួយសមាជិកសហគមន៍ដើម្បីសិក្សាស្វែងយល់អំពីប្រសិទ្ធភាពនៃការអនុវត្តសកម្មភាពជាក់លាក់នីមួយៗរបស់គម្រោង វាស់ស្ទង់អំពីកម្រិតលូតលាស់ជីវភាពរបស់សហគមន៍ក្នុងតំបន់គម្រោង និងដើម្បីទទួលមតិយោបល់ថ្មីៗបន្ថែមទៀតពីប្រជាពលរដ្ឋនៅមូលដ្ឋាន។