ឯកឧត្តមរដ្ឋមន្ត្រី សាយ សំអាល់៖ សូមបេក្ខជនប្រឡងជាប់សញ្ញាបត្រទុតិយភូមិត្រូវបន្តខិតខំសិក្សាបន្ថែមទៀតនៅថ្នាក់ឧត្តមសិក្សានិងត្រូវចាប់យកឱកាសការងារដែលខេត្តព្រះសីហនុកំពុងត្រូវការដើម្បីធានានិរន្តរភាពក្នុងការអភិវឌ្ឍសេដ្ឋកិច្ចសង្គម
……………………………………………

«ក្នុងនាមក្រុមការងារថ្នាក់ជាតិចុះមូលដ្ឋានខេត្តព្រះសីហនុ និងអាជ្ញាធរខេត្តព្រះសីហនុ សូមចូលរួមអបអរសាទរចំពោះប្អូនសិស្សានុសិស្សជ័យលាភីនិទ្ទេសអេ (A) ទាំងអស់។ នេះជាជោគជ័យក្នុងជីវិតរបស់ប្អូនៗ ព្រមទាំងសូមចូលរួមរីករាយជាមួយនឹងមាតាបិតា អាណាព្យាបាលសិស្ស និងសូមវាយតម្លៃខ្ពស់ដល់មន្ត្រីរាជការពិសេសមន្ត្រីអប់រំ ដែលបានជួយបំប៉នដល់សិស្សានុសិស្ស បង្កលក្ខណៈងាយស្រួលក្នុងការសិក្សា ចូលរួមចំណែកក្នុងការបណ្តុះ បណ្តាលធនធានមនុស្សប្រកប ដោយគុណភាព ចូលរួមកសាង និងអភិវឌ្ឍធនធានមនុស្ស»។ នេះគឺជាប្រសាសន៍របស់ឯកឧត្តម សាយ សំអាល់ រដ្ឋមន្ត្រីក្រសួង
បរិស្ថាន និងជាប្រធានក្រុមការងារថ្នាក់ជាតិចុះមូលដ្ឋានខេត្តព្រះសីហនុក្នុងឱកាសនៃពិធីសំណេះ
សំណាលជាមួយបេក្ខជនប្រឡងជាប់សញ្ញាបត្រមធ្យមសិក្សាទុតិយភូមិនិទ្ទេស “A” នៅវិទ្យាល័យក្រុងព្រះសីហនុ ស្ថិតនៅសង្កាត់លេខ៣ ក្រុងព្រះសីហនុ ខេត្តព្រះសីហនុ កាលពីព្រឹកថ្ងៃទី១២ ខែតុលា​ ឆ្នាំ ២០១៩ នេះ។

​កម្មវិធីសំណេះសំណាលដែលរៀបចំឡើងដោយ រដ្ឋបាលសាលាខេត្តព្រះសីហនុមានការចូលរួមឯកឧត្ដម ជាម ហ៊ីម ប្រធានក្រុមប្រឹក្សាខេត្ត និងឯកឧត្តម គួច ចំរើន អភិបាល នៃគណៈអភិបាល ខេត្តព្រះសីហនុ។ លោកស្រី អ៊ុច សោភា ប្រធានមន្ទីរអប់រំយុវជន និងកីឡាខេត្តព្រះសីហនុ មានធ្វើរបាយការណ៍ថា នៅក្នុងឆ្នាំសិក្សា ២០១៨- ២០១៩ ខេត្តព្រះសីហនុមានបេក្ខជនប្រឡងសរុប ១.៥៧០នាក់ ស្រី ៧៥០ នាក់ ប្រឡងជាប់ ១.២២៤ នាក់ ស្រី ៦០៥នាក់ ស្មើនឹង ៧៧.៩៦ ភាគរយ។ ក្នុងនោះសិស្សជាប់និទ្ទេស A ចំនួន ១៣ នាក់ (ស្រី ៦នាក់) សិស្សនិទ្ទេស B ចំនួន ៤៧ នាក់ (ស្រី ២៧នាក់) និទ្ទេសC ៨៥នាក់ (ស្រី ៤៩នាក់) និទ្ទេសD ចំនួន ២២១ នាក់ (ស្រី ១២០នាក់) និងនិទ្ទេសE ៨៥៨នាក់ (ស្រី ៤០៣នាក់)។

ដោយឡែក គ្រឹះស្ថានសិក្សាមានសិស្សប្រឡងទទួលបាននិទ្ទេសA មានចំនួន៥ ក្នុងនោះ ៖ ទី១-វិទ្យាល័យក្រុងព្រះសីហនុ មាននិទ្ទេស A ៥នាក់ ស្រី ២នាក់។ ទី២-វិទ្យាល័យជីវិតចំនួន ៣នាក់។ ទី៣) វិទ្យាល័យហ៊ុនសែនមិត្តភាពចំនួន ២នាក់។ ទី៤)-វិទ្យាល័យហ៊ុនសែនវាលរេញ ២នាក់ និងទី៥) វិទ្យាល័យហ៊ុនសែនព្រៃនប់ ចំនួន ០១ នាក់។
​ឯកឧត្តម គួច ចំរើន អភិបាលខេត្ត ព្រះសីហនុ បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំមន្ត្រីការិយាល័យជំនាញ គណៈគ្រប់គ្រងវិទ្យាល័យ លោកគ្រូ អ្នកគ្រូ គ្រឹះស្ថានសាធារណៈ និងឯកជនបានខិតខំបង្ហាត់បង្រៀនក្មួយៗសិស្សជ័យលាភីក្នុងសម័យប្រឡង១៩ សីហា ២០១៩ បានទទួល លទ្ធផលល្អយ៉ាងត្រចេះត្រចង់ ក្នុងការកសាងសមត្ថភាព និងអភិវឌ្ឍធន ធានមនុស្សប្រកបដោយគុណភាពសមត្ថភាព និងគុណធម៌ ជាកត្តាគន្លឹះសម្រាប់ទ្រទ្រង់កំណើនសេដ្ឋកិច្ច និងភាពប្រកួតប្រជែង ពិសេសក្នុងពេលដែលកម្ពុជាឈានចូលជាប្រទេសចំណូលមធ្យមកម្រិតទាបក្នុងពេលដ៏ខ្លីខាងមុខ ហើយបន្តឡើងទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ តាមចក្ខុវិស័យវែងឆ្ងាយរបស់រាជរដ្ឋាភិបាល។

ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ជាប្រធានក្រុមការងារថ្នាក់ជាតិចុះមូលដ្ឋានខេត្តព្រះសីហនុ បានជំរុញឱ្យប្អូនៗជាជ័យលាភីសិស្សនិទ្ទេស A និងនិងបេក្ឋជនប្រឡង ជាប់សញ្ញាបត្រទុតិយភូមិដទៃទៀតត្រូវខិតខំសិក្សាបន្ថែមទៀតនៅថ្នាក់ឧត្តមសិក្សា និងត្រូវចាប់យកឱកាសដែលខេត្តព្រះសីហនុកំពុងត្រូវការនាពេលបច្ចុប្បន្ន ដើម្បីធានានិរន្តរ ភាពក្នុងការអភិវឌ្ឍសេដ្ឋកិច្ចសង្គម។ ឯកឧត្តម សាយ សំអាល់ ក៏បានជំរុញឲ្យមន្ត្រីអប់រំខេត្តព្រះសីហនុ បង្កើតចលនាប្រឡងប្រណាំងគ្រូគំរូ សាលារៀនគំរូ និងការប្រឡងប្រណាំងតាមសាលានីមួយៗផងដែរ ដើម្បីពង្រឹងគុណភាពសិក្សា ស្រប តាមចក្ខុវិស័យរបស់ក្រសួងអប់រំ និងរាជ រដ្ឋាភិបាលកម្ពុជា ។

ក្នុងឱកាសនោះ ឯកឧត្តមរដ្ឋមន្ត្រី សាយ សំអាល់ ប្រធានក្រុមការងារថ្នាក់ជាតិចុះមូលដ្ឋានខេត្តព្រះសីហនុរួមនឹងអាជ្ញាធរខេត្តបានចែករង្វាន់ជូនដល់សិស្សជ័យលាភីនិទ្ទេស A ចំនួន ១៣រូបដែលក្នុងម្នាក់ទទួលបានម៉ូតូ ០១គ្រឿង និងថវិកាចំនួន ១.០០០ ដុល្លារសហរដ្ឋអាមេរិក។ ដោយឡែកសិស្សនិទ្ទេស B បានទទួលបណ្ណសរសើរ ជាការលើកទឹកចិត្ត និងផ្តល់លិខិតសរសើរដល់សាលា ដែលមានសិស្សប្រឡងបាននិទ្ទេស A និងថវិកាមួយចំនួនផងដែរ ៕

   

ព័ត៌មានបន្ថែម

ឯកឧត្ដម សៅ សុភាព រដ្ឋលេខាធិការក្រសួងបរិស្ថាន បានអនុញ្ញាតអោយ​លោក OKUBO Masaharu នាយកប្រតិបត្តិផ្នែក Energy Business Unit I របស់ក្រុមហ៊ុន Mitsui & Co.,Ltd និងលោកJackson មន្ត្រីអង្គការ CI ជួបសម្តែងការគួរសម និងពិភាក្សាការងារ
ថ្ងៃ ពុធ, 28 សីហា, 2019 ឯកឧត្ដម សៅ សុភាព រដ្ឋលេខាធិការក្រសួងបរិស្ថាន បានអនុញ្ញាតអោយ​លោក OKUBO Masaharu នាយកប្រតិបត្តិផ្នែក Energy Business Unit I របស់ក្រុមហ៊ុន Mitsui & Co.,Ltd និងលោកJackson មន្ត្រីអង្គការ CI ជួបសម្តែងការគួរសម និងពិភាក្សាការងារ
ឯកឧត្តម រ័ត្នវិរៈ អនុរដ្ឋលេខាធិការក្រសួងបរិស្ថាន បានដឹកនាំកិច្ចប្រជុំពិភាក្សាការងារ និងសំណេះសំណាល ជាមួយមន្ត្រីរាជការ និងមន្ត្រីឧទ្យានុរក្ស នៃមន្ទីរបរិស្ថានខេត្តក្រចេះ
ថ្ងៃ ពុធ, 28 សីហា, 2019 ឯកឧត្តម រ័ត្នវិរៈ អនុរដ្ឋលេខាធិការក្រសួងបរិស្ថាន បានដឹកនាំកិច្ចប្រជុំពិភាក្សាការងារ និងសំណេះសំណាល ជាមួយមន្ត្រីរាជការ និងមន្ត្រីឧទ្យានុរក្ស នៃមន្ទីរបរិស្ថានខេត្តក្រចេះ
សេចក្តីជូនដំណឹងស្តីពីការប្រឡងជ្រើសរើសនិស្សិត និងមន្ត្រីរាជការ ចូលបម្រើការងារក្នុងក្របខណ្ឌក្រសួងបរិស្ថានឆ្នាំ២០១៩
ថ្ងៃ ពុធ, 28 សីហា, 2019 សេចក្តីជូនដំណឹងស្តីពីការប្រឡងជ្រើសរើសនិស្សិត និងមន្ត្រីរាជការ ចូលបម្រើការងារក្នុងក្របខណ្ឌក្រសួងបរិស្ថានឆ្នាំ២០១៩