ក្នុងអាណត្តិទី៥នេះ ការគ្រប់គ្រងសំរាមរាយប៉ាយ ជាពិសេសថង់ប្លាស្ទិក គឺជាកិច្ចការងារអាទិភាពមួយ របស់​ក្រសួង​​បរិស្ថាន ដើម្បីគ្រប់គ្រង​កាកសំណល់ដែលកំពុងបំពុលសុខភាព​ប្រជាពលរដ្ឋដោយសារ​តែការរាយ​ប៉ាយ​នៅតាម​ទីសាធារណៈ និងទីកន្លែងប្រជុំជនមួយចំនួន។ ដើម្បីគ្រប់គ្រងបញ្ហាសំរាមនេះ រដ្ឋាភិបាល​តាមរយៈ​សំណើរ​បស់ក្រសួងបរិស្ថាន បានចេញអនុក្រឹត្យលេខ១១៣ សំដៅ​ធ្វើឱ្យប្រសើរ​ឡើងនូវ​ការគ្រប់គ្រងសំរាម សំណល់រឹងទីប្រជុំជនប្រកបដោយប្រសិទ្ធភាព តម្លាភាព និងគណនេយ្យភាព សំដៅធានា​បាននូវ​សោភ័ណភាព​ កិច្ចគាំពារសុខភាពសាធារណៈ និងបរិស្ថាន។

ចេញកាលពីខែធ្នូ ឆ្នាំ២០១៦ អនុក្រឹត្យមួយនេះ បានប្រគល់មុខងារគ្រប់គ្រងសំរាម សំណល់ទីប្រជុំជន​ទៅឱ្យរដ្ឋ​បាលរាជធានី ក្រុងនិងស្រុក ធ្វើប្រតិភូកម្មមុខងារគ្រប់គ្រងសំរាមទៅឱ្យរដ្ឋបាលថ្នាក់ខណ្ឌ ដោយចាត់វិធានការ​ចាំបាច់ ដើម្បីបង្កើនប្រសិទ្ធភាព និងសុវត្ថិភាពក្នុងការគ្រប់គ្រងសំរាម សំណល់រឹងទីប្រជុំជន។ បន្ថែមពីនេះ ការលើក​​កម្ពស់ការយល់ដឹងសាធារណៈ និងការចូលរួមរបស់ប្រជាពលរដ្ឋក្នុងការរៀបចំ និងការអនុវត្ត​វិធានការ​គ្រប់គ្រងឱ្យមានប្រសិទ្ធភាពបំផុត គឺជាកិច្ចការងារដែលមិនអាចខ្វះបាននោះឡើយ។

ក្រោយការចេញអនុក្រឹត្យនេះ និងវិធានការម៉ឺងម៉ាត់របស់ក្រសួងបរិស្ថាន និងស្ថាប័នក្រោមឱវាទ កិច្ចការងារ​គ្រប់គ្រង​សំរាម​ត្រូវបានអនុវត្ត​បានល្អប្រសើរមួយកម្រិត ប៉ុន្តែការចោលសំរាមរាយប៉ាយនៅទីសាធារណៈ និង​ទីប្រជុំជន​នៅតែជាបញ្ហាចោទ​នៅឡើយព្រោះថាពលរដ្ឋមួយចំនួន​ខ្វះខាតការយល់ដឹង និងការចូលរួម​ដើម្បី​បរិស្ថាន​ស្អាត និងរក្សាអនាម័យសាធារណៈ។ សំរាមទាំងនោះគេសង្កេតឃើញនៅកន្លែងមួយចំនួនដូចជាប្រឡាយទឹករំដោះទឹកស្ទឹងមានជ័យដែលពោទៅដោយសំរាមប្លាស្ទិកដែលហាក់ដូចជាប្រឡាយថង់ប្លាស្ទិកយ៉ាងដូចនេះដែរ និងទីកន្លែងមួយចំនួនទៀត​ដែលនៅ​មាន​ការ​គំនរ​សំរាមរាយប៉ាយ។

ឆ្លើយតបនឹងបញ្ហានេះ ក្រសួងបរិស្ថានដែលកំពុងធ្វើការងារយ៉ាងសកម្មលើបញ្ហាសំណល់ និងថង់ប្លាស្ទិក បានទទួចអស់ពីចិត្តឱ្យគ្រប់ភាគីទាំងអស់​ដែលមានទាំងប្រជាពលរដ្ឋ ក្រុមហ៊ុនប្រមូលសំរាម អាជ្ញាធរដែនដី អង្គសង្គមស៊ីវិល ត្រូវតែចូលរួមឱ្យបានគ្រប់ៗគ្នាដើម្បីបរិស្ថានស្អាត និងសុខមាល​ភាព​សាធារណៈល្អ បើមិនដូច្នេះ​ទេការគ្រប់គ្រងសំរាម និងកាកសំណល់នឹងមិនមានប្រសិទ្ធភាពឡើយ។ ហើយបញ្ហាសំរាមរាយ​ប៉ាយ​នេះ នឹងបំបាក់​សោភ័ណភាព​ទីក្រុងភ្នំពេញដ៏ស្រស់ត្រកាលរបស់កម្ពុជាជាក់ជាមិនខាន។

អ្នកជំនាញបរិស្ថាន បានស្នើឱ្យគ្រប់ភាគីពាក់ព័ន្ធបង្កើនការផ្សព្វផ្សាយសំដៅពង្រឹង​ការយល់ដឹងទៅដល់​ប្រជា​ពល​រដ្ឋដែលជាចំណុចសំខាន់បំផុត ព្រោះការចូលរួមរបស់ពលរដ្ឋគឺជាយន្តការ​គ្រប់គ្រងសំរាម​បានយ៉ាង​ល្អបំ​ផុត។ មួយវិញទៀត​អ្នកជំនាញ​បានមើលឃើញថា​ពលរដ្ឋកម្ពុជាមួយចំនួន​នៅពុំសូវមានចំណេះដឹង​ស្តីពីការគ្រប់​គ្រង​សំរាម និងការចូលរួមឱ្យបានផុលផុសនោះទេ។

បើទោះបីជាបែបណាក៏ដោយ ក្រសួងបរិស្ថានសង្ឃឹមយ៉ាងមុតម៉ាំថា ប្រជាពលរដ្ឋ ក្រុមហ៊ុន និងអាជ្ញាធរដែនដី និងគ្រប់ភាគីពាក់​ព័ន្ធផ្សេងៗទៀតនឹង​ប្រឹងប្រែងយក​អស់កម្លាំងកាយចិត្​តដើម្បី​គ្រប់គ្រង​ថង់ប្លាស្ទិក​ឱ្យមាន​ប្រសិទ្ធភាពបំផុត៕

ដោយ៖ ស៊ុន មេសា

វីដេអូ៖ Khmer Time

ព័ត៌មានបន្ថែម

សិស្សានុសិស្សសាលាបឋមសិក្សាថ្នល់កែងថ្លែងអំណរគុណជូនចំពោះឯកឧត្តមបណ្ឌិត អ៊ាង សុផល្លែត និងលោកជំទាវ ជា សុផាកន្នី
ថ្ងៃ អង្គារ, 19 មិនា, 2024 សិស្សានុសិស្សសាលាបឋមសិក្សាថ្នល់កែងថ្លែងអំណរគុណជូនចំពោះឯកឧត្តមបណ្ឌិត អ៊ាង សុផល្លែត និងលោកជំទាវ ជា សុផាកន្នី
រយៈពេល៥ថ្ងៃ សមត្ថកិច្ចបានឃ្លុំដីទំហំជិត៤ពាន់ហិកតា និងបញ្ជូនជនសង្ស័យ១នាក់ទៅតុលាការ
ថ្ងៃ ចន្ទ, 18 មិនា, 2024 រយៈពេល៥ថ្ងៃ សមត្ថកិច្ចបានឃ្លុំដីទំហំជិត៤ពាន់ហិកតា និងបញ្ជូនជនសង្ស័យ១នាក់ទៅតុលាការ
មន្រ្តីជាន់ខ្ពស់ក្រសួងបរិស្ថានបន្តចុះផ្សព្វផ្សាយយុទ្ធសាស្រ្តរបស់រាជរដ្ឋាក្នុងការគ្រប់គ្រងធនធានធម្មជាតិ នៅក្នុងភូមិសាស្រ្តខេត្តពោធិ៍សាត់
ថ្ងៃ ចន្ទ, 18 មិនា, 2024 មន្រ្តីជាន់ខ្ពស់ក្រសួងបរិស្ថានបន្តចុះផ្សព្វផ្សាយយុទ្ធសាស្រ្តរបស់រាជរដ្ឋាក្នុងការគ្រប់គ្រងធនធានធម្មជាតិ នៅក្នុងភូមិសាស្រ្តខេត្តពោធិ៍សាត់